Kurejčyk patłumačyŭ, u čym hałoŭnaja pieravaha Kaardynacyjnaj rady novaha sklikańnia nad starym składam
Praca Kaardynacyjnaj rady treciaha sklikańnia pačałasia z razborak i sprečak nakont sumiaščeńnia pracy ŭ KR i Abjadnanym pierachodnym kabiniecie, a taksama nakont aktualnaści dziejnaha Statuta. U vyniku statut užo častkova źmienieny. Ale sprečki pamiž apanientami ŭnutry orhana nie spyniajucca. Adzin z samych zaciatych udzielnikaŭ abmierkavańnia ŭ adkrytym čacie KR — Andrej Kurejčyk. Mnohija jaho apanienty kryŭdziacca na vyrazy, jakija abiraje dramaturh i režysior, ale jon pa-raniejšamu hnie svaju liniju.
04.07.2024 / 07:00
«U adstojvańni svaich pohladaŭ niama ničoha drennaha. A novaja Kaardynacyjnaja rada adstojvaje inšyja padychody, nie takija, jakija byli ŭ druhim sklikańni», — tłumačyć Andrej Kurejčyk, jaki bałatavaŭsia ŭ KR ad śpisu Paŭła Łatuški.
«Naša Niva» raspytała Kurejčyka, jakija inšyja padychody jon maje na ŭvazie.
Andrej Kurejčyk. Fota: kureichik
Surazmoŭca ličyć, što abranym palitykam prychodzicca adbudoŭvać užo zrujnavany orhan.
«Na žal, lidarstva Jahorava i jaho kamandy daviało da poŭnaj straty davieru hramadstva da KR, što abjektyŭna adlustravałasia ŭ niežadańni biełarusaŭ navat pryniać udzieł u hałasavańni. 6700 hałasoŭ — heta prysud KR druhoha sklikańnia. Novy skład adbudoŭvaje hety zrujnavany orhan, ale, na žal, natykajecca na sinija palcy starych funkcyjanieraŭ, jakija, prajhraŭšy vybary, uziali taktyku na tatalnaje błakavańnie pracy. Bolšaść dyskusij u nas — mienavita vakoł hetaha».
Pry hetym u dyskusijach Kurejčyk nie bačyć ničoha drennaha:
«Ja žyvu ŭ ZŠA, i kožny, chto naziraŭ za tym, jak prachodziać debaty ŭ Kanhresie, ci bačyŭ debaty Bajdena z Trampam, mahli zaŭvažyć, što dyskusii tut iduć vielmi žorstka i pryncypova».
Hałoŭnaje, na jaho pohlad, kab usio heta nie pieratvarałasia ŭ brudnuju palityčnuju hulniu.
«Ci heta demakratyčna — praź niezakonnuju biurakratyju imknucca skasavać mandaty svaich bolš papularnych kankurentaŭ? Ci heta pavaha da vybarcaŭ, da biełarusaŭ, jakija ryzykavali, hałasujučy? Druhoje pytańnie — finansavaja achajnaść papiaredniaha kiraŭnictva. Na žal, spadar Jahoraŭ admoviŭsia ad poŭnaj dakumientalnaj spravazdačy, jak taho patrabavaŭ statut. My dahetul nie viedajem, praź jakija firmy, arhanizacyi i fizičnych asob papiaredniaje kiraŭnictva raźmiarkoŭvała srodki KR, bo svajoj jurasoby ŭ KR niama. Jahoraŭ nie stvaraŭ jaje admysłova. Jość nadzieja, što kantrolna-revizijnaja kamisija KR zdoleje pravieści hety aŭdyt».
Na dumku Kurejčyka, Kaardynacyjnaja rada była biurakratyčna sfarmavanym orhanam, kudy nichto nikoha nie vybiraŭ, tamu pieramieny — heta naturalnaja źjava.
«Kali demakraty pryjduć da ŭłady ŭ Biełarusi, my taksama nie pavinny pierapisvać staryja praviły? Žyć pa łukašenkaŭskaj Kanstytucyi i prytrymlivacca rašeńniaŭ jahonych sudoŭ i čynoŭnikaŭ? Statut KR — heta nie 10 zapavietaŭ. Kali hetyja praviły niedemakratyčnyja, supiarečlivyja, jurydyčna niedakładnyja, dyskryminacyjnyja da vybaru hramadzian, dyk što, pa ich žyć da truny?», — pryvodzić arhumient surazmoŭca.
Adnym z rašeńniaŭ novaj Kaardynacyjnaj rady było adkryć čat asnoŭnaha składu dla dyskusij, pytańni deputatam prapanoŭvajuć zadavać naŭprost u kamientarach aficyjnaj supołki. Z taho, što nie pierastaje cikavić ludziej: chiba sumiaščeńnie mandata i pracy ŭ Kabiniecie nie adabjecca na jakaści abodvuch kirunkaŭ?
«My imkniemsia da parłamienckaj madeli respubliki. Tamu i treba brać praktyki parłamienckich respublik. Nie ZŠA, ci Rasii i łukašenkaŭskaj Biełarusi, a Brytanii, Kanady, Polščy, Čechii, Izraila, Litvy, Łatvii, Estonii. Amal va usich parłamienckich respublikach urad farmujecca z deputataŭ parłamienta. I jany pracujuć i ŭ parłamiencie, i va ŭradzie. Mienavita parłamiencki instytut pavinien stać kadravaj krynicaj biełaruskaha demakratyčnaha ŭrada. Nie treba prydumlać rovar.
Tamu i znachodžańnie ŭ Kabiniecie pradstaŭnikoŭ kaalicyi bolšaści ŭ KR — Paŭła Łatuški, Aliny Koŭšyk, Juryja Hubareviča, a ciapier zamiest Valeryja Kavaleŭskaha jašče i Uładzimira Astapienki — całkam łahična i adpaviadaje duchu i praktykam mienavita parłamienckaj respubliki. Treba iści dalej: kab usie pradstaŭniki APK pryznačalisia z KR», — ličyć Kurejčyk.
U surazmoŭcy šmat nadziej na KR viersii 3.0.
«Mienavita tamu, što ŭ adroźnieńnie ad KR-2 novaja Rada — heta całkam lehitymny abrany instytut parłamienckaha typu.
Pieršyja dva rašeńni, jakija zrabiła KR — heta prazrystaść čataŭ dla vybarcaŭ i padtrymka Andreja Hniota, čym my pakazali sapraŭdnyja pryjarytety novaha sklikańnia: transparentnaść i kankretnyja spravy pa padtrymcy biełarusaŭ.
Tak, pracoŭnaja hrupa ciapier pravodzić adkrytyja pasiedžańni, na jakich usie delehaty majuć mahčymaść abmiarkoŭvać prapanovy pa novym Statucie. Pry Jahoravie takich mahčymaściaŭ nie było. Naprykład, Pałažeńnie ab mandacie, pryniataje «jahoraŭskaj» bolšaściu ŭ KR-2 u apošni dzień kadencyi, kab skasavać vybar biełarusaŭ i vyklučyć z Rady Koŭšyk, Łatušku i Hubareviča, prymałasia nie tolki nasupierak Statuta, ale i biez pracoŭnaj hrupy, abmierkavańniaŭ i ahulnych pasiedžańniaŭ. Tamu novaja KR značna padniała ŭzrovień pravavoj kultury ŭ hetym sensie».
Kurejčyk upeŭnieny, što novaja Rada ŭličyć pamyłki staroha sklikańnia i prapracuje ich.
«My nie budziem paŭtarać staryja pamyłki toj biurakratyčnaj namienkłatury. Heta budzie orhan efiektyŭnaj pracy, prazrysty, transparentny, sumlenny, heta budzie mocny hołas biełaruskaha hramadstva. Heta budzie instytut nie sam pra siabie, «reč u sabie», biurakratyja dziela biurakratyi, a pra realnyja prablemy ludziej, pra realnuju baraćbu, pra stratehii i jaskravuju, enierhičnuju palityku», — ličyć surazmoŭca.
Za što kankretna najpierš budzie zmahacca kamanda, u jakuju ŭvachodzić Kurejčyk?
«Ja adznaču palapšeńnie situacyi ź vizami i dazvołami na žycharstva dla biełarusaŭ. Instytucyjanalnuju padtrymku biełaruskaha hramadstva i artykulacyju i advakacyju jaho intaresaŭ. Sacyjalnyja lifty dla novych imionaŭ i lidaraŭ u biełaruskaj palitycy. Raspracoŭku stratehičnych dakumientaŭ, darožnych mapaŭ i płanaŭ dla biełaruskich demakratyčnych sił».
«Dyskredytacyja i dehradacyja». Knyrovič padzialiŭsia mierkavańniem pra razborki ŭ KR