Stratnaje pradpryjemstva padaryła bus homielskamu AMAPu — «z ulikam dziaržaŭnaj važnaści»
Da aficyjnaha Dnia niezaležnaści Turaŭski małočny kambinat pieradaŭ pasažyrski aŭtobus padraździaleńniu UUS Homielskaha abłvykankama, piša «Fłahštok».
04.07.2024 / 13:30
Fota: «Homielskaja praŭda»
Transpartny srodak maje kandycyjanier, umiaščaje 16 čałaviek i budzie vykarystany dla pieravozki asabovaha składu, paviedamiła hazieta abłvykankama sa spasyłkaj na deputata parłamienta Valancina Bajko — praŭładnaha biźniesmiena, jaki ŭ 2016 hodzie staŭ uładalnikam kantrolnaha pakieta akcyj Turaŭskaha małočnaha kambinata.
Pavodle jaho słoŭ, «rašeńnie ab umacavańni materyjalna-techničnaj bazy pryniata z ulikam dziaržaŭnaj važnaści i hramadskaj značnaści zadač, jakija vykonvajucca bajcami AMAPa pa zabieśpiačeńni achovy hramadskaha paradku i majomasnaj biaśpieki hramadzian Homielskaj vobłaści, jakija ŭźnikajuć na terytoryi pryhraničnych rajonaŭ ryzyk».
Valancin Bajko (sprava). Fota: «Homielskija viedamaści»
Jak homielski AMAP budzie dapamahać achoŭvać miažu, deputat nie patłumačyŭ. Ale zajaviŭ, što rašeńnie ab nabyćci aŭtobusa dla siłavikoŭ było pryniata na niadaŭnim schodzie akcyjanieraŭ pradpryjemstva. Padorany bus — biełaruskaj vytvorčaści. Pa masavych «chapunach» u 2020 hodzie hamialčanie viedajuć, što raniej amapaŭcy časta pieramiaščalisia na mikraaŭtobusach Ford Transit.
Fota: «Homielskija viedamaści»
U publikacyi taksama śćviardžajecca, što taki žest — «pakazalny prykład, jak paśpiachovaje pradpryjemstva kłapocicca ab pravaachoŭnikach».
Adnak viadoma, što Turaŭski małočny kambinat znachodzicca ŭ pieradbankrutnym stanie — paśpiachovym jaho nijak nie nazavieš. Jak raskazvaŭ «Fłahštok», adnoj z pryčyn finansavaha kryzisu stali prablemy z pastaŭkami pradukcyi ŭ Rasiju. Čystaja strata pa vynikach hoda 2023 hoda skłała 40,4 młn BYN.
Siłaviki zatrymali dalnabojščyka, jaki ŭ čat-ruletcy «naploŭ, što vajavaŭ»
Vyjšaŭ na volu hrodzienski biznesmien, jaki ŭ 2020-m paskardziŭsia na siłavikoŭ