Łatvija fiksuje bolš sprobaŭ praryvu svajoj miažy ź Biełaruśsiu mihrantami
U apošnija dni pavialičyłasia kolkaść sprobaŭ niezakonnaha pierasiačeńnia łatvijska-biełaruskaj miažy, paviedamiŭ načalnik Dziaržaŭnaj pamiežnaj achovy Łatvii Huncis Pujats.
04.07.2024 / 16:44
Učastak łatvijska-biełaruskaj miažy ŭ Krasłaŭskim krai. Fota: Wikimedia Commons
«U apošnija try dni my sutykajemsia z davoli intensiŭnaj płyńniu asob, jakija žadajuć trapić u Łatviju nielehalna. Učora było spyniena 62 takija sproby, pazaŭčora — 51, a da hetaha — 47. Za apošnija try dni my znoŭ bačym, što achvotnyja nielehalna praniknuć u Łatviju aktyvizavalisia niepasredna ŭ kirunku Łatvii, i, adpaviedna, ich kolkaść źmienšyłasia ŭ susiednich z nami krainach — Litvie i Polščy», — skazaŭ Pujats, jakoha cytujuć miascovyja miedyja.
Sioleta Dziaržaŭnaja pamiežnaja achova Łatvii praduchiliła niezakonnaje pierasiačeńnie łatvijska-biełaruskaj miažy z boku 2770 čałaviek. 12 čałaviek pryniali ŭ Łatviju pa humanitarnych mierkavańniach.
Pujats zajaviŭ, što nakiravańnie płyni mihrantaŭ u Łatviju źjaŭlajecca metanakiravanaj akcyjaj biełaruskich słužbaŭ.
«Masiravanyja sproby praktyčna na praciahu ŭsiaho hoda rabilisia ŭ napramku Polščy. Ciapier my heta bačym za apošnija try dni niepasredna ŭ kirunku Łatvii. My nazirali heta i letaś, kali sa žniŭnia pa kastryčnik Łatviju vybrali jak asnoŭnuju krainu-mišeń dla nielehalnaj mihracyi», — rastłumačyŭ kiraŭnik łatvijskaj Dziaržpahranachovy.
Jon adznačyŭ, što stanoŭčym faktam źjaŭlajecca raniejšaje stvareńnie infrastruktury dla abmiežavańnia nielehalnaj imihracyi. U toj ža čas Pujats pryznaŭ, što nastupnyja letnija miesiacy buduć dla pamiežnikaŭ napružanymi, tamu Dziaržpahranachova źviarnułasia pa dapamohu da nacyjanalnych uzbrojenych sił.
U studzieni hetaha hoda ministry abarony Estonii, Łatvii i Litvy ŭchvalili stvareńnie sumiesnaj bałtyjskaj zony abarony na ŭschodniaj miažy, dzie krainy miažujuć z Rasijaj i Biełaruśsiu.
Paśla papiaredžańnia ad Kitaja kolkaść mihrantaŭ na polskim kirunku skaraciłasia ŭ razy — HRAFIK
Łatvija pabuduje na miažy z Rasijaj i Biełaruśsiu paŭnavartasnuju liniju abarony
Nielehały, što pierajšli miažu ź Biełaruśsiu, uryvajucca ŭ damy łatvijcaŭ
Polšča i krainy Bałtyi prosiać pra abarončuju liniju na miažy z Rasijaj i Biełaruśsiu