Tureckija zaŭziatary źbirajucca masava pakazać «voŭčaje vitańnie» na matčy Turcyja — Niderłandy
Futbolnyja fanaty z Turcyi zaklikali zaŭziataraŭ, jakija buduć u subotu na stadyjonie ŭ Bierlinie padčas matču Turcyja — Niderłandy, pakazać tak zvanaje «voŭčaje vitańnie», za jakoje dyskvalifikavali hieroja pajadynka abaroncu Mierycha Demirała, jaki vyznačyŭsia dublem u hulni.
05.07.2024 / 11:59
Hledačam prapanujuć prademanstravać hety žest padčas vykanańnia nacyjanalnaha himna Turcyi, piša Bild.
«Ciapier uvieś śviet budzie hladzieć pramuju tranślacyju taho, jak 50 tysiač čałaviek robiać znak šeraha vaŭka! I niachaj jany pasprabujuć zabaranić heta!» — piša ŭ kamientarach adzin z karystalnikaŭ.
U minułym matčy hulec zbornaj Turcyi Merych Demirał adśviatkavaŭ zabity hoł u varoty Aŭstryi, pakazaŭšy «voŭčaje vitańnie». Hety žest vykarystoŭvajuć tureckija pravaekstremisty, jakija prytrymlivajucca ideałohii rasavaj pieravahi. Paśla hetaha incydentu UEFA adchiliła Demirała na dva nastupnyja matčy.
Aficyjna Ankara nijak nie asudziła žest futbalista — naadvarot, Ministerstva zamiežnych spraŭ Turcyi nazvała rasśledavańnie UEFA suprać Demirała nieprymalnym. Tureckija ultras, u svaju čarhu, zajaŭlajuć, što «voŭčaje vitańnie» — heta «nacyjanalny simvał tureckaha naroda», jaki nie maje dačynieńnia da rasizmu.
U Hiermanii za rucham Ülkücü, čalcy jakoha vykarystoŭvajuć «voŭčaje vitańnie», sočyć Upraŭleńnie pa abaronie kanstytucyi. U Turcyi hetaje pryvitańnie vykarystoŭvajecca, naprykład, ultranacyjanalistyčnaj «Partyjaj nacyjanalistyčnaha ruchu», jakaja ličycca partnioram urada Redžepa Erdahana.
Na fonie skandału z Demirałam prezident Turcyi abjaviŭ pra svoj vizit na čverćfinał u Bierlin u subotu.
Čvercfinały startujuć siońnia matčami Hiermanija — Ispanija (19:00) i Francyja — Partuhalija (22:00).
UEFA dyskvalifikuje tureckaha abaroncu za nacyjanalistyčny žest na Jeŭra-2024
Turcyja stała apošnim čverćfinalistam Jeŭra-2024 u niervovaj dueli z Aŭstryjaj VIDEA
Hulec zbornaj Hiermanii pafarbavaŭ vałasy ŭ niezvyčajny koler pierad matčam ź Ispanijaj