«Людзі, я вярнулася ў СССР. Яшчэ і 170 рублёў за гэты кашмар!» Блогерка абурылася начной чаргой у падатковую
Індывідуальныя прадпрымальнікі ноччу дзяжураць пад падатковымі. Праблема ўзнікла праз змены ў Падатковым кодэксе.
05.07.2024 / 16:02
Скрыншоты відэа
З 1 ліпеня 2024 года ўсе падатковыя дэкларацыі прымаюцца толькі ў электронным выглядзе: для ІП абавязковым стала падключыцца да сістэмы электроннага дэкларавання і атрымаць электронны ключ. Раней іпэшнікі маглі рабіць гэта па жаданні (але шмат каму прыходзілася падключацца да сістэмы добраахвотна-прымусова, бо на гэтым настойвалі падатковыя інспектары).
Пра складаную сітуацыю ў тыктоку распавяла абураная блогерка пад нікам MamaClub.by.
— Начныя дзяжурствы ў падатковай. Людзі, я вярнулася, здаецца, у Савецкі Саюз. Сёння раніцай я запісалася ў чаргу — гэта ў час электронных чэргаў. Чаму я раніцай не магу прыйсці, узяць талончык і прайсці?
Жанчына растлумачыла, што людзі, якія стаяць у чарзе пад падатковай, пачалі весці свой спіс — туды яна запісалася. У 18.00 ёй прыйшлося зноў прыехаць на месца і чакаць 37 хвілін толькі дзеля таго, каб яе адзначылі ў гэтым спісе (бо інакш яна б згубіла месца ў чарзе).
— За цэлы дзень падатковая прыняла ўсяго дваццаць чалавек, каб даць электронны ключ. Дваццаць! Людзі, у вас чэргі, а вы прымаеце дваццаць у дзень?! Дык вось, першыя дваццаць чалавек у спісе, якія пойдуць заўтра, будуць усю ноч дзяжурыць. Таму што ствараюцца нейкія левыя спісы.
Блогерка падкрэсліла, што ранкам яе нумар у чарзе быў 120. Калі ўсё будзе добра, яна падасць дакументы на атрыманне электроннага ключа толькі праз тыдзень — у наступную пятніцу.
— Гэта калі не ўзнікнуць яшчэ нейкія дадатковыя спісы, калі яшчэ нешта не зменіцца за гэтыя пяць працоўных дзён. Гэта значыць, я кожны дзень буду ездзіць у падатковую, потым начное дзяжурства стаяць тут, замест таго, каб спаць. Вы чаго, людзі?! Я заплаціла яшчэ 170 рублёў за гэты кашмар! Я ўвогуле не разумею, што адбываецца. Проста трэш.
За 16 гадзін ролік у тыктоку набраў 110 тысяч праглядаў. У каментарыях аўтарцы раяць пашукаць варыянты падаць дакументы не ў Мінску, а недзе ў іншым горадзе, дзе чэргі менш.
Падатковая змяніла ўмовы праверкі фізасоб — вось як
Падатковая апублікавала поўны спіс аўто, за якія прыйдзецца плаціць падаткі ў дзесяціразовым памеры
ІП цяпер змогуць падаваць дэкларацыі толькі ў электронным выглядзе
Падатковая паклала вока на чаявыя, якія кліенты пакідаюць у кавярнях