Nieruchomaść

«U niekatorych kvaterach prablemy z voknami jość da hetaha času». Jak žyviecca ŭ adzinym u Biełarusi śpiralnym domie

Niezvyčajny hmach na vulicy Kulašova, 1a, fasad jakoha zakručvajecca vakoł svajoj vosi, vyrasła na ŭskrainie Mahilova letam 2020 hoda. Dahetul budynak zastajecca adzinym takim na ŭsiu krainu, piša Onliner.

Usiaho ŭ domie 17 pavierchaŭ. Kožny ź ich zrušany adnosna papiaredniaha na niekalki hradusaŭ. Sam fasad budynka razhornuty na 34 hradusy. Z-za asablivaściaŭ płaniroŭki ŭ kvaterach atrymalisia niestandartnymi. Uładalniki niekatorych ź ich havorać: dyzajnieram pryjšłosia pałamać hałavu nad tym, jak arhanizavać prastoru. U kvaterach pieraharodkami adździeleny tolki sanvuzły. 

Prajekt hetaha doma raspracavali ŭ instytucie «Mahiloŭhramadzianprajekt». U 2017 hodzie jaho navat acanili dypłomam druhoj stupieni na CHII Nacyjanalnym fiestyvali architektury.

Pa słovach hałoŭnaha architektara prajektua AAT «Instytut «Mahiloŭhramadzianprajekt» Volhi Dolnikavaj, jany sapraŭdy cikavilisia chmaračosam Kałatravy ŭ šviedskim Malmio, inšymi zakručanymi budynkami, pierš čym sieści za prajektavańnie mahiloŭskaj novabudoŭli. Jana havoryć, što kančatkovaja abjomna-płanirovačnaja forma zjaviłasia nie adrazu. Adnoj sa składanych zadač, pa słovach hałoŭnaha architektara, było ŭviazać leśvičnyja maršy sa śpiralepadobnaj formaj budynka. 

Volha pryznavałasia: kudy praściej było b sprajektavać u tym ža abjomie ofisny budynak ź vialikimi oŭpen-śpiejsami na kožnym paviersie — tut ža pryjšłosia narezać prastoru na asobnyja kvatery i pracavać ź ich płaniroŭkami, kab kožny varyjant byŭ zručnym dla žyćcia. U vyniku atrymałasia tak, što dvuch absalutna adnolkavych płanirovačnych rašeńniaŭ u domie niama.

«Płaniroŭki ŭ našych kvaterach — strašny son dla dyzajnieraŭ»

Ale, niahledziačy na ​​praryŭnyja architekturnyja idei, mnohija žychary paśla ŭsialeńnia sutyknulisia z šeraham prablem. Navasioły skardzilisia na panaramnaje škleńnie, jakoje prapuskaje zimovy viecier, a taksama na choład u kvaterach. Zrešty, zabudoŭščyk — Mahiloŭski domabudaŭničy kambinat — ad prablem nie adchryščvaŭsia, a apieratyŭna ich likvidavaŭ. 

— My ŭstupili ŭ dolevaje budaŭnictva, kali dom byŭ uźviedzieny na ŭzroŭni piataha paviercha. Acanili z žonkaj niezvyčajnuju architekturu i vyrašyli pierajechać. Klučy atrymali letam 2020-ha, a zajechać zmahli tolki praz hod, u listapadzie 2021-ha, — raspaviadaje adzin z žycharoŭ, Anton. — Litaralna adrazu vyjaviłasia prablema z aknom u dziciačym pakoi: ź jaho mocna dźmuła. Padčas ekśpiertyzy budaŭniki praśvidravali adtulinu ŭ ramie i zaŭvažyli, što ŭnutry niama pieny: padradčyk niajakasna ŭstanaviŭ ramu. Paśla taho jak hety niuans ustaranili, tempieratura ŭ pakoi padniałasia na 2 hradusy. Humki i zaviesy taksama byli zamienieny. U cełym zaraz nijakich prablem u kvatery niama. 

Pa słovach mužčyny, u niekatorych kvaterach zabudoŭščyk da hetaha času likviduje prablemy takoha kštałtu. Havoryć, pryčyna ŭ tym, što niekatoryja kvatery pustavali i pierapradavalisia pa niekalki razoŭ. Sam Anton taksama vyrašyŭ pradać svaju dvušku: siamji z troch čałaviek nie chapaje miesca na 70 «kvadratach». 

— Płaniroŭki ŭ našych kvaterach — jak strašny son dla dyzajnieraŭ. Usie jany niestandartnaj płaniroŭki, ź jakoj atrymoŭvajecca vycisnuć adzin nievialiki asobny pakoj. Nam stała ciesna. Vystavili na prodaž za $96 tys. pa kursie. Jaje sabiekošt, zrazumieła, nižej, ale dom zdadzieny, ramont u kvatery zrobleny — zasialajsia i žyvi. Darečy, z-za jaho ŭsadžvańnia dzie-nidzie na ścienach zjavilisia raskoliny. U nas navat tresnuła adna šyrokafarmatnaja plitka. 

Ludmiła i Źmicier taksama sutyknulisia ź niepryjemnymi siurpryzami. 

— U niekatorych kvaterach prablemy z voknami jość da hetaha času. U nas humki mianiali try razy. Da hetaha zimoj i vosieńniu było vielmi choładna, — kaža Ludmiła. — Častkova prablema vyrašyłasia, ale z voknaŭ da hetaha času miescami dźmie, ale nie krytyčna. Treba mianiać zaviesy, jakija kaštujuć 700 rubloŭ. Zrabić heta možna za svaje hrošy. Ja viedaju, tyja, chto žyvie ŭ kvaterach ź pieršaha pa piaty pavierch, z takimi prablemami nie sutyknulisia, tamu što viatry nie takija mocnyja, jak na ŭzroŭniach vyšej. U cełym kažuć, što ŭ domie ŭ adnych vokny stajać idealna, u inšych — napierakos. Nakolki ja viedaju, padradčyki byli roznyja. 

Ludmiła ličyć, jašče adna asablivaść kvater u hetych damach — niestandartnaja płaniroŭka, jakaja nie dazvalaje razhulacca. 

— Mnohija kuplali kvatery i płanavali padzialić prastoru na pakoi, ale zrabić heta nie tak prosta. U mianie była čatyrochpakajovaja kvatera ŭ chruščoŭcy na 70 «kvadrataŭ». Kuchnia była kampaktnaja, ale astatnija pamiaškańni i kalidor — całkam prastornyja. Kali ja kuplała tut kvateru płoščaj 52 «kvadraty», dumała, ich budzie dastatkova. U vyniku nam udałosia vyłučyć tolki nievialikuju spalniu. 

Jašče adzin uładalnik žylla ŭ novabudoŭli — Siarhiej. Jon pierajechaŭ sa zvyčajnaj panelki, jak tolki daviedaŭsia, što DSK płanuje ŭźvieści ŭ «spalniku» śpiralny dom. Havoryć, adrazu vyrašyŭ ustupić u dolevaje budaŭnictva. Upeŭnivaje, što nijakich prablem z voknami ŭ jaho asabliva nie było, ale zabudoŭščyk zamianiŭ humki pa harantyi. Ad pierajezdu bačyć adny plusy. 

— Usie prablemy ŭ novabudoŭli lažać na plačach tavarystva — jany vyrašajucca davoli chutka. Ja žyvu na 13-m paviersie, u mianie z voknaŭ adkryvajecca cudoŭny dalahlad. Viedaju, mnohija susiedzi dadatkova ŭciaplali ścieny, bo ŭ kvatery było choładna. U nas takich prablem nie było, — padsumoŭvaje Siarhiej. 

Volha (imia źmieniena pa jaje prośbie) žyvie na 17-m paviersie i śćviardžaje, što joj pašancavała krychu mienš: u jaje ŭ kvatery zimoj chaładnavata, a letam horača. Prablemy z voknami zabudoŭščyk vyrašyŭ davoli apieratyŭna, tamu pretenzij da jaho niama. 

— U mianie nie samaja vialikaja płošča — 58 «kvadrataŭ». Ale ciapła ad batarej u chałodny pieryjad času mnie ŭsio roŭna nie chapaje. Pryjšłosia pakłaści ciopłyja padłohi. Na etapie ŭładkavańnia byŭ niuans z płaniroŭkaj: nam pryjšłosia pryciahnuć dyzajniera, kab zakryć paŭkruhłyja ​​kałony, jakija raźmiaščajucca pasiarod kvatery. Ale ŭ cełym mnie padabajecca hety dom pa častcy architektury. Praŭda, svaju kvateru ja ŭžo pradaju: płanuju pierajazdžać u Miensk. Acanili jaje ŭ $64 tys.

Kamientary da artykuła