Va Ukrainie nie paśpieli da vajny ekstradziravać biełarusa, jakoha šukaŭ Interpał. Ciapier nie viedajuć, što ź im rabić
Vydańnie «Mocnyja naviny» źviarnuła ŭvahu na cikavy pravavy kazus, jaki adbyvajecca va Ukrainie z žycharom Homiela Aleham Charaŭcom. Jon byŭ abjaŭleny ŭ vyšuk Interpała pa kryminalnych artykułach jašče zadoŭha da padziej 2020-ha i 2022-ha hadoŭ i zatrymany va Ukrainie. Ale pieradać Biełarusi jaho da pačatku vajny nie paśpieli, choć źbiralisia.
09.07.2024 / 22:33
U spravie homielca Aleha Charaŭca sudovaja ŭłada Ukrainy ŭpierłasia ŭ pravavy tupik. Navat sudovyja instancyi pryznajuć, što biełarus na terytoryi Ukrainy znachodzicca ciapier niezakonna, ale što ź im rabić — nichto nie viedaje. Pry hetym navat termin dziejańnia jahonaha biełaruskaha pašparta skončyŭsia.
Padrabiaznaści hetaj nieardynarnaj historyi «Mocnyja naviny» daviedalisia z rašeńniaŭ sudoŭ, apublikavanych na partale Adzinaha rejestra sudovych rašeńniaŭ Ukrainy.
U Biełarusi Aleha Charaŭca ŭžo amal 10 hadoŭ chočuć pryciahnuć da kryminalnaj adkaznaści za ŭčynieńnie złačynstvaŭ, praduhledžanych č. 4 art. 206 KK (adkrytaje vykradańnie majomaści (rabavańnie), ździejśnienaje paŭtorna ŭ asabliva bujnym pamiery), č. 3 art. 209 KK (machlarstva ŭ bujnym pamiery) i č. 4 art. 209 (machlarstva, ździejśnienaje paŭtorna ŭ asabliva bujnym pamiery).
Detalnaj infarmacyi pra jahonyja hrachi niama, ale termin pa sukupnaści śviecić prystojny — da 13 hadoŭ za rabavańni i da 10-ci — za machlarstva.
U lipieni 2015 hoda pastanovaj śledčaha Homielskaha haradskoha adździeła SK mužčynu abjavili ŭ vyšuk z abrańniem miery strymańnia ŭ vyhladzie ŭtrymańnia pad vartaj.
U studzieni 2018-ha vyšukam homielca zaniaŭsia Interpał — «z metaj aryštu i nastupnaj ekstradycyi dla pryciahnieńnia da kryminalnaj adkaznaści». U kancy taho ž hoda Charaŭca zatrymali ŭ Kijeŭskaj vobłaści i ŭziali pad vartu.
Niahledziačy na pazicyju ŭkrainskaj Hienprakuratury, jakaja vystupała za vydaču ŭciekača inicyjataru vyšuku, praces ekstradycyi zaciahnuŭsia. Pry hetym sam biełarus, kali jaho vypuścili ź SIZA i abmiežavali svabodu chatnim aryštam, nasupierak sudovaj pastanovie źmianiŭ miesca žycharstva i pasialiŭsia ŭ Adeskaj vobłaści. Tam jaho paŭtorna zatrymali i adpravili ŭ śledčy izalatar, ale potym znoŭ vypuścili pad chatni aryšt.
U studzieni 2022 hoda Ofis Hienieralnaha prakurora Ukrainy vynies pastanovu ab vydačy Charaŭca Biełarusi. Adnak jon i jahony advakat abskardzili pastanovu, a pakul jaje razhladali, to pačałasia vajna i stała nie da Charaŭca.
Paśla ž praces ekstradycyi ŭvohule staŭ niemahčymy, pakolki Ukraina vyjšła z Kanviencyi ab pravavoj dapamozie i pravavych adnosinach pa hramadzianskich, siamiejnych i kryminalnych spravach 1993 hoda, jakoj rehulavalisia adnosiny pamiž Ukrainaj i Biełaruśsiu, u tym liku jakija tyčylisia vyšuku i vydačy złačyncaŭ.
Paśla taho mužčynu dvojčy zatrymlivali i štrafavali za niezakonnaje znachodžańnie ŭ krainie, štrafy sumaj 5,1 tysiačy hryŭniaŭ (blizu 125 dalaraŭ) jon spraŭna apłačvaŭ. Pry hetym vyśvietliłasia, što adzinym dakumientam u jaho na rukach byŭ pašpart hramadzianina Biełarusi, termin dziejańnia jakoha skončyŭsia ŭ mai 2023 hoda.
Na hetaj padstavie ŭ krasaviku hetaha hoda mihracyjnaja słužba adpraviła homielca ŭ punkt časovaha znachodžańnia zamiežnych hramadzian i źviarnułasia ŭ Prymorski rajonny sud Adesy z pazovam ab zatrymańni Charaŭca «z metaj identyfikacyi i zabieśpiačeńni vysyłki za miežy terytoryi Ukrainy».
Ale sud u zadavalnieńni pazovu admoviŭ, adznačyŭšy ŭ rašeńni, što zatrymańnie adkazčyka «z ulikam ciapierašniaj palityčnaj situacyi supiarečyć standartam jeŭrapiejskaha prava».
Taksama ŭźnikli prablemy ź identyfikacyjaj asoby biełarusa. Paćvierdzić jaho piersonu mahli tolki ŭ biełaruskaj ambasadzie, adnak, jak adznačana ŭ rašeńni suda, «dypłamatyčnyja adnosiny pamiž Ukrainaj i Respublikaj Biełaruś na hety momant faktyčna spynienyja», a zatrymańnie z metaj prymusovaj departacyi pryviadzie da «biespadstaŭnaha pazbaŭleńnia voli».
Tamu pakul sud vyrašyŭ pieradać Charaŭca na paruki pryvatnamu pradpryjemstvu «Łean», dzie jon pracaŭładkavany na pasadzie mieniedžara pa prodažach.
Sierbski sud pastanaviŭ ekstradziravać biełaruskaha režysiora Andreja Hniota
Biełaruś ekstradziravała hramadzianina Litvy, jaki byŭ u vyšuku Interpała