My znajšli śpis «terarystaŭ» ad KDB, jaki zhubiŭsia na piać miesiacaŭ. Ciapier u im amal 450 biełarusaŭ
Sajt KDB, na jakim raniej publikavaŭsia śpis, nie pracuje ź lutaha paśla ŭzłomu «Kibierpartyzanaŭ». Za hety čas śpis značna pavialičyŭsia.
10.07.2024 / 16:20
Novyja ludzi ŭ terarystyčnym śpisie. Źleva naprava źvierchu ŭniz: Kaciaryna Šablinskaja-Ivanova, Iryna Haŭryłovič, Siarhiej Bunata, Dzianis Kučynski. Fota: Ukantakcie, pimeyes.com. Kałaž «Našaj Nivy»
Adnak vyśvietliłasia, što pakul sajt KDB nie pracuje, čekisty vyrašyli publikavać jaho ŭ admysłovym telehram-kanale. Apošni raz jon abnaŭlaŭsia 28 červienia.
Virusaŭ u fajle, zdajecca, niama. Prynamsi, u hetym peŭny siervis-ahrehatar Virustotal, ale my nie raim adkryvać fajł na ŭłasnym kampjutary.
Ź lutaha 2024-ha, kali «Kibierpartyzany» ŭzłamali sajt KDB, u śpis dadałosia 46 proźviščaŭ. Ź ich realnych terarystaŭ dzieviać čałaviek — heta ludzi, jakich dadali tudy pa rezalucyjach AAN.
Bolš za tryccać novych «terarystaŭ» asudžanyja ŭ Biełarusi. Naprykład, u śpis dadali maładuju maci Kaciarynu Šablinskuju-Ivanovu, ipešnika z Baranavičaŭ Siarhieja Bunatu, žančynu, jakaja maje syna ź invalidnaściu, Nadzieju Łapcionak, byłoha vajskoŭca Dzianisa Kučynskaha, 18-hadovaha pieršakurśnika BDPU Hiermana Lebiedzieva i 43-hadovuju minčanku Irynu Haŭryłovič.
Jość i tyja, chto źbieh ad pieraśledu i asudžany zavočna. U śpisie źjavilisia imiony Volhi i Andreja Pavukoŭ, kolišniaha ŭdzielnika kamandy Viktara Babaryki i sakratara Kaardynacyjnaj rady Ivana Kraŭcova, a taksama palitołaha Dźmitryja Bałkunca.
Na siońnia ŭ śpisie 1160 imionaŭ. Ź ich 450 — heta ludzi, uklučanyja tudy pa palityčnych matyvach (ź ich dva hramadzianina Ukrainy), amal 40% ad usiaho śpisu.
Uniasieńnie ŭ śpis nakładaje značnyja abmiežavańni. Naprykład, «terarystam» nielha pieravieści hrošy ŭ SIZA abo kałoniju. Pa vyzvaleńni žyć taksama niaprosta — naprykład, niemahčyma adkryć rachunak u banku i amal niemahčyma ŭładkavacca na dobruju pracu.
67-hadovaja biełaruska viarnułasia sa Šviecyi. Ciapier joj pahražaje da dziesiaci hadoŭ turmy
Biznesoŭcu z Maładziečna dali šeść hadoŭ kałonii za danaty Pałku Kalinoŭskaha i «Bajsołu»