Vysokatechnałahičnaja amierykanskaja zbroja pracuje suprać Rasii, ale nie doŭha — The Wall Street Journal
Maskva vučycca pieramahać zachodnija vysokatechnałahičnyja bojeprypasy. U vyniku jany stanoviacca bieskarysnymi.
10.07.2024 / 18:17
HIMARS. Fota: Getty Images
Jak piša The Wall Street Journal, artyleryjskija snarady Excalibur tvaryli cudy, kali letam 2022 hoda źjavilisia na ŭkrainskim poli boju. Snarady, jakija kirujucca pa GPS, z chirurhičnaj dakładnaściu paražali rasijskija tanki i artyleryju. Ale heta praciahvałasia niadoŭha.
Užo praź niekalki tydniaŭ rasijskaja armija pačała prystasoŭvacca, vykarystoŭvajučy mahutnyja srodki radyjoelektronnaj baraćby. Joj atrymałasia stvaryć pieraškody dla GPS-naviadzieńnia i ŭzryvalnikaŭ. U vyniku snarady albo źbivalisia sa šlachu ci nie ŭzryvalisia, albo i toje i druhoje razam.
Da siaredziny minułaha hoda bojeprypasy M982 Excalibur, raspracavanyja kampanijami RTX i BAE Systems, stali praktyčna bieskarysnymi i bolš nie vykarystoŭvajucca, havorać ukrainskija kamandziry. Jany ž adznačajuć, što hetyja tannyja, univiersalnyja bojeprypasy možna było b vykarystać znoŭ, kali b jany byli madernizavanyja. Ale hetaha nichto nie robić.
Całkam vyjšła z užytku i zusim novaja sistema — bomba małoha dyjamietra naziemnaha bazavańnia, vyrablenaja Boeing i šviedskaj kampanijaj Saab. Jak adznačajuć ukrainskija i zachodnija aficyjnyja asoby, zbolšaha heta adbyłosia z-za rasijskaj radyjoelektronnaj baraćby. Bomba bolš nie vykarystoŭvajecca va Ukrainie ŭ čakańni kapitalnaj madernizacyi.
Anałahičnaja dola spaścihła i niekatoryja inšyja vidy zbroi, jakija demanstravali technałahičnuju pieravahu Zachadu. Naprykład, z-za rasijskich pieraškod značna źniziłasia efiektyŭnaść kasietnaha snarada BONUS — sumiesnaj raspracoŭki Francyi i Šviecyi, a taksama rakiet GMLRS z GPS-naviadzieńniem, jakija zapuskajucca sistemami HIMARS.
Adchileńnie ad 10 da 30 mietraŭ źjaŭlajecca roźnicaj pamiž traplańniem i promacham dla rakiety GMLRS typu M31 z unitarnaj bojehałoŭkaj, jakaja ź vialikim pośpiecham vykarystoŭvałasia ŭ 2022 hodzie dla paražeńnia rasijskich bunkieraŭ, kamandnych centraŭ, pantonaŭ, składoŭ uzbrajeńnia i abaronienaha abstalavańnia.
U toj ža čas źnižeńnie dakładnaści nie źjaŭlajecca prablemaj dla rakiety GMLRS typu M30, jakaja pry ŭdary absypaje vialikuju płošču valframavymi šarykami. Pa słovach ukrainskich vajskoŭcaŭ, Ukraina praciahvaje vykarystoŭvać hety bojeprypas dla paražeńnia pazicyj rasijskaj artyleryi ŭ ramkach kontrbatarejnaha ahniu.
Praciahvajuć nanosić udary pa darahich rasijskich celach i niekatoryja ź inšych vidaŭ zachodniaj vysokadakładnaj zbroi, pastaŭlenaj zusim niadaŭna. Ale ŭkrainskija vajskoŭcy i zachodnija ekśpierty ŭ halinie abarony adznačajuć, što tolki pytańnie času, kali Rasija navučycca źmianšać efiektyŭnaść i palapšać pakazčyki pierachopu.
Dla Ukrainy čas źjaŭlajecca istotnym faktaram. Staranna abmiežavanaje i pastupovaje ŭkaranieńnie šmatlikich zachodnich sistem dało Rasii mahčymaść minimizavać ich uździejańnie.
Kali havorka zachodzić pra zbroju ŭkrainskaj vytvorčaści, takuju jak bieśpiłotniki, to, jak adznačaje vydańnie, spasyłajučysia na słovy adnaho z supracoŭnikaŭ ukrainskaj raźviedki, madeli, raspracavanyja ŭsiaho niekalki miesiacaŭ tamu, užo nieefiektyŭnyja na poli boju z-za technałohij, jakija pastajanna raźvivajucca.
Fota: AP Photo/Efrem Lukatsky, File
«Heta jak abnaŭlać prahramnaje zabieśpiačeńnie na telefonie — nam i rasijanam davodzicca rabić heta kožny miesiac, kab iści ŭ nahu z časam… Ale kali my atrymlivajem zbroju z Zachadu, to ŭ hetym vypadku vytvorca redka choča što mianiać u prahramnym zabieśpiačeńni, jakoje jon pastaviŭ šmat hadoŭ tamu», — cytuje vydańnie słovy supracoŭnika ŭkrainskaj raźviedki.
Pa słovach adnaho z kiraŭnikoŭ amierykanskaj abaronnaj kampanii, mnohija z amierykanskich uzbrajeńniaŭ, jakija pastaŭlajucca Ukrainie, ujaŭlajuć saboj staryja sistemy, jakija pastupova zdymajucca z uzbrajeńnia amierykanskimi vajskoŭcami i zamianiajucca bolš sučasnymi dy, jak praviła, daražejšymi praduktami, jakija nie abaviazkova pieradajucca Kijevu. Heta nie daje vytvorcam stymułaŭ dla madernizacyi sastarełych vysokadakładnych bojeprypasaŭ.
U toj čas, jak šmatlikija sučasnyja zachodnija vysokadakładnyja bojeprypasy dla paražeńnia celaŭ, prynamsi častkova, spadziajucca na spadarožnikavuju navihacyju, ułasnyja vysokadakładnyja bojeprypasy Rasii, takija jak snarady «Krasnapal», vykarystoŭvajuć łaziernaje naviadzieńnie bieśpiłotnikaŭ «Arłan-30», jakija praciahvajuć pracavać navat biez GPS-navihacyi.
ZŠA pastavili Ukrainie supastaŭnyja artyleryjskija snarady M712 Copperhead, ale ŭkrainskija siły redka vykarystoŭvajuć ich z-za niedachopu sumiaščalnych dronaŭ dla abaznačeńnia celaŭ, kažuć ukrainskija vajskoŭcy.
Zusim niadaŭna Rasija šyroka pradstaviła ŭdaskanaleny kamplekt spadarožnikavaha naviadzieńnia «Kamieta-M», jaki značna bolš ustojlivy da ŭkrainskich pieraškod i dazvoliŭ užyvać rasijskija płaniernyja bomby z razburalnym efiektam suprać ukrainskich pazicyj.
Jak adznačaje vydańnie, pośpiechi Rasii ŭ halinie elektronnych srodkaŭ supraćdziejańnia stvarajuć stratehičnuju prablemu dla ZŠA i ich sajuźnikaŭ.
Zachodniaja vajennaja daktryna doŭhi čas hruntavałasia na pierakanańni, što dakładnaść moža pieramahčy masu, a heta aznačaje, što dobra nacelenyja ŭdary mohuć nanieści škodu bolš šmatlikamu vorahu, pamianšajučy nieabchodnaść u vializnych vydatkach na vojski, tanki i artyleryju.
Adnak hetaje śćviardžeńnie nie było pravierana ŭ bujnoj vajnie da Ukrainy. Ukaranieńnie tam zachodniaj zbroi pakazała — toje, što mahło spracavać suprać armii Sadama Chusejna, talibaŭ abo bajevikoŭ IDIŁ, nie abaviazkova spracuje suprać sučasnych uzbrojenych sił Rasii abo Kitaja.
Adnak zachodnija vajskoŭcy pierakonvajuć, što, niahledziačy na vidavočnyja pośpiechi Maskvy ŭ baraćbie sa starymi pakaleńniami zachodniaj vysokadakładnaj zbroi, niekatoryja z bolš składanych sistem utojvajucca dla taho, kab Rasija, a praź jaje i Kitaj, nie zmahli raspracavać efiektyŭnyja kontrzachady. U patencyjnaj vajnie ZŠA i ich sajuźniki buduć mieć značna bolš mahutny patencyjał.
U toj ža čas niekatoryja ŭkrainskija aficyjnyja asoby i zachodnija vajskovyja analityki vykazvajuć zakłapočanaść tym, što, na ich dumku, amierykanskija vajskovyja čynoŭniki i abaronnyja kampanii minimizujuć prablemy, ź jakimi sutykajucca sistemy vysokadakładnaha naviadzieńnia va Ukrainie, abo śpisvajuć ich na drennuju padrychtoŭku ŭkrainskich vojskaŭ.
Stała viadoma, jakuju zbroju ZŠA dazvolać vykarystoŭvać na terytoryi Rasii
Hiermanija dazvoliła Ukrainie nanosić udary pa terytoryi Rasii niamieckaj zbrojaj. Ale jość niuans
Pačaŭsia praces pieradačy źniščalnikaŭ F-16 Ukrainie — pieršyja samaloty ŭžo na šlachu ŭ krainu