«Jon nie moža pieramahčy ŭ bitvie z časam». Viadomy akcior Džordž Kłuni zaklikaŭ Bajdena vyjści z prezidenckaj honki
Akcior, jaki źjaŭlajecca adnym z arhanizataraŭ zboru srodkaŭ na vybarčuju kampaniju prezidenta, upeŭnieny, što kali Demakratyčnaja partyja pojdzie na vybary z Džo Bajdenam, to nie zmoža ich vyjhrać.
11.07.2024 / 07:17
Fota: David Livingston / WireImage / Getty Images
Znakamity amierykanski akcior i adzin z arhanizataraŭ zboru srodkaŭ dla Demakratyčnaj partyi Džordž Kłuni zaklikaŭ Džo Bajdena vyjści ź pieradvybarnaj honki. Pra heta jon napisaŭ u kałoncy dla New York Times, piša Bi-bi-si.
Jak padkreśliŭ akcior u publikacyi, Džo Bajden za svaju palityčnuju karjeru vyjhraŭ vielmi šmat bitvaŭ, adnak jon «nie moža pieramahčy ŭ bitvie z časam».
Akcior u publikacyi nazyvaje siabie «pažyćciovym demakratam» i nahadvaje pra toje, što šmatkroć udzielničaŭ u zbory srodkaŭ dla prezidenckich kampanij kandydataŭ-demakrataŭ.
Pa słovach Kłuni, jon sustreŭsia z Džo Bajdenam try tydni tamu i zrazumieŭ, što hety čałaviek užo nie padobny da Bajdena 2010 hoda, i navat na Bajdena 2020 hoda.
«Heta byŭ toj ža čałaviek, jakoha my ŭsie bačyli padčas debataŭ [z Trampam]. Lidary našaj partyi pavinny spynić kazać nam, što 51 miljon čałaviek nie bačyli taho, što jany na samaj spravie bačyli», — adznačyŭ Džordž Kłuni.
Pa słovach akciora, usia sprava va ŭzroście i ni ŭ čym bolš. Jon upeŭnieny, što kali Demakratyčnaja partyja pojdzie na vybary z Džo Bajdenam, to nie zmoža ich vyjhrać.
Zajava Džordža Kłuni prahučała praź niekalki hadzin paśla taho, jak były śpikier Pałaty pradstaŭnikoŭ Nensi Pełosi zajaviła, što ŭ Bajdena zastałosia mała času, kab vyrašyć, ci varta jamu zastavacca ŭ prezidenckaj honcy paśla pravalnych debataŭ u kancy minułaha miesiaca.
U efiry MSNBC, adkazvajučy na pytańnie, ci padtrymlivaje jana namier prezidenta ZŠA pieraabracca, jana adkazała: «prezident sam vyrašaje, ci budzie jon bałatavacca. My ŭsie zaklikajem jaho pryniać hetaje rašeńnie, bo času zastajecca ŭsio mienš».
Cisk na 81-hadovaha Bajdena z metaj zaachvocić jaho vyjści ź pieradvybarnaj honki ŭzmacniŭsia paśla debataŭ z Donaldam Trampam, padčas jakich jon vyhladaŭ razhublena i nieadnarazova hublaŭ chod dumki (u intervju ABC News Bajden tłumačyŭ heta tym, što «byŭ vymatany» i «adčuvaŭ siabie žudasna»).
Paśla tych debataŭ niekalki sponsaraŭ Demakratyčnaj partyi publična papiaredzili, što spyniać vydzialać srodki na kampaniju, kali Bajden nie vyjdzie z honki.
Adnak u paniadziełak dniom Bajden pravioŭ telefonnuju razmovu sa sponsarami Demakratyčnaj partyi i zapeŭniŭ ich, što zastajecca ŭ pieradvybarnaj honcy.
Bajden zajaviŭ, što vyjdzie ź pieradvybarnaj honki tolki «pa ŭkazańni Usiavyšniaha»
«Ja kiruju hetym śvietam» — Bajden
Tramp znoŭ prapanavaŭ Bajdenu pravieści debaty ŭ najbližejšyja dni
Bieły dom abvierhnuŭ zajavy ŚMI pra sumnievy Bajdena nakont jaho abiralnaści