Mintrans uvioŭ novyja praviły. Taksisty razzłavalisia
Prablema ŭźnikła z-za płatnych kursaŭ, jakija daviadziecca prajści kiroŭcam. A jany kaštujuć niemałyja hrošy.
11.07.2024 / 09:25
Fota: Tochka.by
Ukaz «Ab aŭtamabilnych pieravozkach pasažyraŭ» abaviazaŭ taksistaŭ prachodzić pierapadrychtoŭku. Dla taho kab trapić u rejestr lehalnych pieravozčykaŭ. Pieravozčyki hetamu nie vielmi rady. Navučańnie na novych kursach kaštuje amal 500 rubloŭ i doŭžycca cełyja dva tydni. Žurnalist Tochka.by raźbiraŭsia ŭ pytańni.
Pracoŭnyja budni
U redakcyju patelefanavaŭ taksist Mikałaj sa Słucka, razmova atrymałasia emacyjnaja. «Ja ŭžo prajšoŭ navučańnie dla kiroŭcaŭ aŭtamabilaŭ taksi. A ciapier nas jašče i abaviazvajuć pavyšać kvalifikacyju. Kursy ŭ takim vyhladzie i pa takoj canie mianie nie zadavalniajuć», — pačaŭ taksist.
Prachodzić pavyšeńnie kvalifikacyi treba tym, chto pracuje ŭ taksi bolš za piać hadoŭ. Takoje patrabavańnie dziejničaje jašče z 2008 hoda. Raniej za im sačyli nie stroha, tolki vydavali pradpisańni pry pravierkach.
Ciapier ža Mintrans padyšoŭ da pytańnia bolš surjozna. Chto nie pavysić kvalifikacyju — toj nie patrapić u rejestr lehalnych pieravozčykaŭ. Času adviali da 1 žniŭnia 2024 hoda.
Znoŭ u škołu
Aŭtaškoła «Aŭtaprava» adna ź niamnohich u Minsku, jakaja vydaje siertyfikaty pavyšeńnia kvalifikacyi kiroŭcaŭ taksi. Dyrektar aŭtaškoły Juryj Biertaš pierapadrychtavaŭ z pačatku hoda ŭžo piać hrup pa 20 čałaviek.
Košt navučańnia — Br450, a z 1 žniŭnia vyraście da Br500. Takaja cana farmujecca zychodziačy z vydatkaŭ na zarobak instruktara i arendu aŭtadroma.
«Dla pravincyi cana kursaŭ zavobłačnaja», — kaža Mikałaj.
Jon taksuje pa 12 hadzin i atrymlivaje čysty zarobak u dzień kala 40 rubloŭ.
Pryčym kursy praciahłyja — dva tydni. Kožny dzień iduć zaniatki. Mała taho što hetyja dni atrymlivajucca biez zarobku, dyk jašče i traty na darohu abo pražyvańnie.
Prahrama kursaŭ — 55 hadzin. Ź ich 16 hadzin — miedycynskaja padrychtoŭka, 1 hadzinu — viedy PDR, asnovy kiravańnia — 7 hadzin.
Praktyka pakazvaje, što mnohija taksisty nie viedajuć, jak pravilna pierachoplivać rul abo vykanać tak zvany «łasiny» test — rezki manieŭr. Adpracoŭvajuć na kursach i efiektyŭnaje pieraryvistaje tarmažeńnie. Usio na asabistych mašynach — tak bolš zvykła.
Fota: Tochka.by
Astatni čas — na aŭtadromie: zajezd u boks z dvuch bakoŭ, razhon i spynieńnie pierad słupkami, «źmiejki», jazda pa ślizkim pakryćci, jakoje papiarednie zalivajuć vadoj.
Situacyju rastłumačyli ŭ Mintransie:
«Rejestr aŭtamabilnych pieravozak pasažyraŭ u nierehularnych znosinach stvarajecca ŭ ramkach ukaza Łukašenki №32 «Ab aŭtamabilnych pieravozkach pasažyra « i pačnie pracu z 1 žniŭnia 2024 hoda. Tyčycca jon u tym liku taksistaŭ. Elektronny resurs abjadnaje pieravozčykaŭ roznych formaŭ ułasnaści i akumuluje infarmacyju ab usich dyśpietčara, kiroŭcach i mašynach. Takija miery pryniaty dla zabieśpiačeńnia vysokaha ŭzroŭniu biaśpieki i jakaści pasłuh, stvareńnia ŭmoŭ dla dobrasumlennaj kankurencyi na rynku».
U krainie dziejničajuć 10 navučalnych arhanizacyj (jany jość u kožnaj vobłaści), jakija siertyfikavany pravodzić pavyšeńnie kvalifikacyi vadzicielaŭ katehoryi B. U prahramie navučańnia akcent zrobleny pierš za ŭsio na zabieśpiačeńnie biaśpieki darožnaha ruchu, heta značyć na praktyku kiravańnia i ŭmacavańnie tearetyčnych viedaŭ PDR.
Uspomnić usio
Mikałaj usio roŭna pierakanany, što na kursach nie daviedajecca ničoha novaha dla siabie.
«Novyja kursy praviarajuć toje, što i tak užo ŭmieju. U haraž ja mahu zajechać choć z zapluščanymi vačyma», — praciahvaje jon.
Pretenzii taksista zrazumieć možna. Daviadziecca jeździć u stalicu dva tydni ci žyć tam. Plus kursy hrošaj kaštujuć.
Fota: Tochka.by
«Teoryju daloka nie ŭsie z taksistaŭ adrazu zdajuć. I niamnohija ź pieršaha razu dakładna ŭ boks zajazdžajuć. Tamu kursy pierapadrychtoŭki vyznačana patrebnyja», — paryruje Juryj Biertaš.
Mierkavańni padzialilisia, ale spračacca niama pra što. Pa słovach Mikałaja, dyrektar jaho taksaparku ŭžo sabraŭ rabotnikaŭ u kamandziroŭku. Patrabavańnie abaviazkovaje — dziavacca niama kudy.