KR padpisała miemarandum z ukrainskim fondam, zasnavalnik jakoha prasłaviŭsia frazaj «ukraincy zasłužyli vajnu»
Hety fond prapanavała dla supracy błohierka Taćciana Martynava.
12.07.2024 / 12:29
Deputaty Kaardynacyjnaj rady vyrašyli nie tolki vypuścić zajavu z asudžeńniem rasijskaha ŭdaru pa kijeŭskaj dziciačaj balnicy «Achmatdziet», ale i sabrać hrošy na dapamohu ŭkraincam. Uźnikła pytańnie, na jaki rachunak źbirać.
Lidarka frakcyi «Chopić Bajacca» Taćciana Martynava prapanavała dla hetych metaŭ źviarnucca ŭ fond «Omrijana Krajina». «Heta maje siabry, ja za ich ručajusia, — patłumačyła błohierka. — U ich zvyčajna jość svabodnyja rachunki pad vałanciorskija prajekty. Takim čynam my atrymlivajem pravieranych kontrahientaŭ u Kijevie, minimizujem straty na pieravodach i prazrystuju spravazdačnaść».
Taćciana Martynava na debatach na «Biełsacie»
U vyniku sakrataryjat Kaardynacyjnaj rady abvieściŭ pra rašeńnie realizoŭvać sumiesnyja prajekty z hetym ukrainskim dabračynnym fondam. Taćcianie Martynavaj daručali zaklučyć miemarandum ab supracoŭnictvie.
Ale ideja miemaranduma vyklikała ździŭleńnie ŭ mnohich deputataŭ Kaardynacyjnaj rady.
«Skažycie, u nas ciapier KR budzie zaklučać miemarandumy z usimi arhanizacyjami typu NKA i fondami, ź jakimi jość suviazi i adnosiny ŭ delehataŭ KR?», — zapytałasia ŭ čacie dla abmierkavańnia Śviatłana Mackievič.
«Ja nie suprać, ale jakoje dačynieńnie fond, zarehistravany pryvatnaj asobaj va Ukrainie, maje dačynieńnie da demakratyčnych sił Ukrainy? Kali my razhladajem KR jak palityčny subjekt, to padpisańnie miemarandumu z fondam vyhladaje jak minimum dziŭna, asabliva kali inicyjatary nie mohuć adkazać na pytańni, navošta heta patrebna KR», — dadaŭ staršynia kiraŭničaj supołki biełarusaŭ Urocłava Jan Markaŭ.
Martynava adkazała jamu: «Jak minimum, kab mieć mahčymaść i instrumienty realnych dziejańniaŭ dla dapamohi ŭkraincam u baraćbie z rasijskaj ahresijaj. A nie prosta pustyja zajavy publikavać, jakija ni na što nie ŭpłyvajuć. Palityčny subjekt? Ok. Na palityku jakoj krainy my možam paŭpłyvać? Palityčnaja vaha KR u śviecie pakul kala nula. Pavysić jaho možna tolki realnymi dziejańniami, jakija buduć abjadnoŭvać namahańni biełarusaŭ u kankretnych kirunkach».
Tym nie mienš deputaty pačali huhlić, što za «Omrijana Krajina». Vyjaviłasia, što heta arhanizacyja, u jakoj jość dvoje zasnavalnikaŭ — fiłosaf-futurołah Alaksiej Tałkačoŭ, a taksama Julijana Tałkačova, jakaja pazicyjanuje siabie jak niejra-enierhietyčny kiniezijołah i seks-kouč.
Ich fond ujaŭlaje saboj «hłabalny ruch pasijanaryjaŭ i stvaralnikaŭ śvietłaj budučyni».
Futurołah Alaksiej Tałkačoŭ. Fota ź jaho fejsbuka
Alaksiej Tałkačoŭ napisaŭ niekalki knih, ale ŭ internecie zhadvajecca pieradusim jak aŭtar skandalnaha vykazvańnia «ŭkraincy zasłužyli hetu vajnu».
«Ciapierašniaja vajna źjaŭlajecca zakanamiernym nastupstvam 30 hadoŭ našaj biezhaspadarlivaści, razhildziajstva, ehaizmu, kradziažu, maralnaj dehradacyi i hnili. My pra*rali krainu, jakaja ŭ 1991 hodzie pa ŭzroŭni VUP tolki ŭ 5-7 razoŭ sastupała Kitaju. Usio spuścili, raskrali, razburyli. Ničoha i nikoha nie šanavali. Čamu tak? Tamu što «ŭrvać sabie», ehaizm, chitradupaść, «na*rać na ŭsich» stała maralnym kreda našych ludziej», — napisaŭ Tałkačoŭ u svaim dopisie ŭ fejsbuku ŭ lipieni 2023 hoda, na druhi hod vajny. Jaho mierkavańnie vyklikała rezanans u sacsietkach, sabrała kala 50 tysiač repostaŭ.