Саміт НАТА паказаў адсутнасць моцнага лідара накшталт Чэрчыля — Bild
Таго, хто прызнаў бы Пуціна пагрозай раней, чым 24 лютага 2022 года. Таго, хто сапраўды вынес урокі з гісторыі, а не выкарыстоўвае яе толькі як пусты гук.
13.07.2024 / 10:49
Прэм'ер Фінляндыі Аляксандр Стаб, прэзідэнты ЗША і Францыі Джо Байдэн і Эмануэль Макрон, генеральны сакратар НАТА Енс Столтэнберг. Фота: Photo by Kent Nishimura / Getty Images
Журналіст Bild Філіп Пятаў аналізуе саміт НАТА, які завяршыўся ў Вашынгтоне. Публікуем пераклад яго калонкі:
У НАТА ўваходзяць 32 краіны. Дзясяткі тысяч танкаў і самалётаў. Мільёны салдат. Сотні мільярдаў еўра ваеннага бюджэту. Самаму магутнаму абароннаму альянсу свету не хапае толькі аднаго: сапраўднага лідара.
Бо пры ўсёй моцы НАТА не ўдалося прадухіліць напад Расіі на еўрапейскую краіну. І дагэтуль НАТА дазваляе Пуціну бамбаваць украінскія дзіцячыя бальніц. А абяцанне абараняць кожны дзюйм тэрыторыі НАТА?
Яго не паўтаралі б так часта, калі б сапраўды былі ўпэўненыя ў гэтым. Бракуе палітыка, здольнага выканаць задачу стагоддзя — абараніць наш вольны свет. Таго, хто прызнаў бы Пуціна пагрозай раней, чым 24 лютага 2022 года. Таго, хто сапраўды вынес урокі з гісторыі, а не выкарыстоўвае яе толькі як пусты гук.
Кагосьці накшталт легендарнага брытанскага прэм'ер-міністра Уінстана Чэрчыля. Перад тварам нацысцкай пагрозы ён зразумеў, што супакаенне і баязлівасць — шлях у прорву. І быў гатовы ўзяць на сябе лідарства.
Стомлены прэзідэнт ЗША, нерашучы канцлер Германіі, эгацэнтрычны прэзідэнт Францыі — яны не такія. Можа, гэта мужная прэм'ер-міністр Эстоніі Кая Калас?
Міру патрэбен новы Уінстан Чэрчыль. І тэрмінова, як ніколі, — піша Філіп Пятаў.