СК распавёў падрабязнасці жудаснага ДТЗ пад Магілёвам. У ім загінуў 5-гадовы хлопчык і яго бацька
Сямʼя на аўтамабілі Volkswagen, вадзіцель якога не справіўся з кіраваннем, вярталася з лецішча ў Магілёў.
14.07.2024 / 10:44
Скрын відэа СК
Паводле папярэдніх звестак, увечары 13 ліпеня паблізу вёскі Фойна кіроўца Volkswagen, здзяйсняючы абгон спадарожнай фуры, страціў кантроль над кіраваннем. Іншамарка выехала на сустрэчную паласу, дзе сутыкнулася з аўтамабілем Audi, які буксаваў прычэп.
У выніку ДТЗ 34-гадовы жыхар Магілёва і яго 5-гадовы сын, якія знаходзіліся ў Volkswagen, памерлі на месцы.
Жонка загінулага мужчыны і іх 3-гадовая дачка шпіталізаваныя.
Двое 18-гадовых жыхароў Клімавіцкага раёна з Audi таксама знаходзяцца ў бальніцы.
На месцы здарэння ўсю ноч працавалі следчыя. СК піша, што сямʼя на аўтамабілі Volkswagen вярталася з лецішча ў Магілёў. Дзеці перавозіліся ў дзіцячых прыладах.
Узбуджана крымінальная справа па ч. 3 арт. 317 (парушэнне правілаў дарожнага руху, што пацягнула па неасцярожнасці смерць дзвюх або больш асоб) Крымінальнага кодэкса Беларусі.