Сілавікі просяць у беларусаў за мяжой паведаміць свой адрас ці выслаць дамову арэнды. Што вядома?
Усё часцей сілавікі шукаюць кантакты беларусаў, якія выехалі з краіны, і просяць іх даслаць свой адрас пражывання. Распавядаем, што адбываецца.
15.07.2024 / 22:07
Калаж «Нашай Нівы»
Мы знайшлі каля 20 выпадкаў, калі беларусам, што цяпер за мяжой, пісалі сілавікі і пыталіся адрас пражывання. Гэта былі як былыя палітвязні, гэтак і проста людзі, якія выехалі пасля 2020 года. Частка з іх даслала свой адрас, частка — не.
Некаторых прасілі выслаць дамовы арэнды жылля. Іншых, на каго завялі крымінальныя справы, — даслаць распіску: пазначыць, дзе жывеш, і напісаць, што калі вернешся ў Беларусь, абавязуешся явіцца ў органы.
Юрыстка «Вясны» Святлана Галаўнёва тлумачыць, навошта сілавікам адрасы беларусаў:
- Чалавек знаходзіцца на ўліку пасля адбыцця пакарання, і, каб сілавікам больш не працаваць па ім, трэба пацверджанне, што чалавек з'ехаў.
- Заведзена крымінальная справа, і міліцыі трэба падставы, каб падаць у вышук і такім чынам завяршыць працу па крымінальнай справе.
- Патрэбныя падставы, каб распачаць крымінальную вытворчасць.
Пры камунікацыі з сілавікамі юрыстка раіць даваць толькі неабходны мінімум інфармацыі, звесткі пра ваша месца пражывання лепш не раскрываць.
«Лепей за ўсё ветліва растлумачыць, што вы гэтую інфармацыю па тэлефоне казаць не будзеце. І ўвогуле скарыстаецеся сваім правам не сведчыць супраць сябе і сваіх блізкіх», — кажа Святлана.
Навошта сілавікі выпытваюць пра тэлеграм-акаўнты беларусаў, нават тых, хто за мяжой?