788 ukrainskich vajskoŭcaŭ źnikli bieź viestak u bajach za siało Krynki Chiersonskaj vobłaści
Tam znachodzicca płacdarm USU na levym bierazie Dniapra.
18.07.2024 / 07:16
Ślidstvo.info
788 ukrainskich vajskoŭcaŭ źnikli bieź viestak u chodzie abarončaj apieracyi ŭ vioscy Krynki, dzie z vosieni 2023 hoda znachodzicca nievialiki płacdarm USU na levym bierazie Dniapra ŭ Chiersonskaj vobłaści. Heta źviestki palicyi Ukrainy z kastryčnika 2023-ha da kanca červienia 2024 hoda, havorycca ŭ artykule «Ślidstvo.Info», jaki praanalizavała «Mieduza».
Za toj ža pieryjad, pavodle infarmacyi ŭkrainskich pravaachoŭnych orhanaŭ, z Krynak udałosia vyvieźci i pachavać 262 zabitych vajskoŭcaŭ USU.
Pry padrychtoŭcy materyjału žurnalisty pahavaryli ź dziasiatkam matrosaŭ, łodačnikaŭ i miedykaŭ z roznych bryhad marskoj piachoty, jakija albo sami byli ŭ Krynkach, albo dastaŭlali tudy ludziej. Bolšaść ź ich raspaviali, što abarona vioski z samaha pačatku była «zvyšciažkaj zadačaj z abmiežavanym resursam». «Asabliva ciažka było tudy zachodzić u kastryčniku na zimu», — raspavioŭ adzin z aficeraŭ, jaki ŭdzielničaŭ u hetaj apieracyi.
Niekatoryja z udzielnikaŭ vysadki ŭ Krynkach ličać, što spačatku abaraniać siało i sprabavać pašyrać płacdarm jašče było mahčyma. Adnak kali ŭ kancy zimy Krynki ŭ chodzie bajoŭ i abstrełaŭ byli całkam źniščany, zadača pa ŭtrymańni hetych pazicyj stała dla mnohich vajennych «darohaj u adzin kaniec». Pry hetym «Ślidstvu.Info» ŭdałosia adšukać ludziej, jakija byli ŭ Krynkach trojčy.
Marpiechi, jakija havaryli z žurnalistami, śćviardžajuć, što rasijskija vajskoŭcy pałonnych u Krynkach nie biaruć. Adnak, adznačaje vydańnie, u śpisach vajennapałonnych, pryznačanych dla abmienu, sustrakajucca imiony bajcoŭ, źnikłych u rajonie vioski.
Krynki — siało na levym bierazie Dniapra ŭ Chiersonskaj vobłaści. Vojski RF zachapili jaho ŭ samym pačatku poŭnamaštabnaha ŭvarvańnia va Ukrainu. U 2023 hodzie USU ŭdałosia ŭ chodzie kontrnastupu zamacavacca ŭ Krynkach i stvaryć tam nievialiki płacdarm.
U lutym 2024 hoda na toj momant jašče ministr abarony Rasii Siarhiej Šajhu na sustrečy z Uładzimiram Pucinym zajaviŭ, što US RF «začyścili» Krynki. Ukrainski bok nazvaŭ hetyja zajavy»manipulacyjaj i falsifikacyjaj faktaŭ».
Materyjał «Ślidstvo.Info» ab płacdarmie USU ŭ Krynkach vyjšaŭ na fonie paviedamleńniaŭ ŚMI, u tym liku ŭkrainskich, pra toje, što vajskoŭcy Ukrainy adyšli ź siała.
Ukrainskaja vajskovaja krynica raspaviała Bi-bi-si, što USU pakinuli Krynki, ale ŭtrymlivaje inšyja płacdarmy na levym bierazie Dniapra. Pradstaŭnik apieratyŭna-stratehičnaj hrupoŭki USU «Taŭryja» Dźmitryj Lichavy zajaviŭ «Ślidstvu.Info», što ŭkrainskija vajskoŭcy praciahvajuć abarončuju apieracyju na levym bierazie Dniapra ŭ Chiersonskaj vobłaści, u pryvatnaści, u rajonie Krynak.