Netflix vypuściŭ svoj «Dekamieron», i kansiervataraŭ jon moža šakavać
Raskazvajem pra novy sieryjał ad Netflix pa matyvam Bakača.
04.08.2024 / 08:00
Fota: kadr z trejlera
Siaredzina 14-ha stahodździa, Italija ŭ razhar epidemii bubonnaj čumy. Bahaciei razam sa słuhami baviać čas na vile za miežami Fłarencyi dy adnačasova chavajucca ad śmiarotnaj niebiaśpieki. A kab čas u karancinie ciahnuŭsia chutčej, maładziony raskazvajuć adzin adnamu roznyja historyi — niekatoryja ź ich trapnyja, a niekatoryja nu vielmi razbeščanyja.
Tak pačynajecca «Dekamieron», tvor 14 stahodździa, jaki abieśśmiarociŭ imia svajho aŭtara Džavani Bakača. Siužety z «Dekamierona» malavali Sandra Batyčeli i Mark Šahał, filmy pa tvory zdymali Pjer Pazalini i Fiederyka Fielini — i heta tolki samyja znakamityja z daŭžeznaha śpisu tvorcaŭ, jakija prykłali ruki da hetaj historyi.
Ale zabudźcie pra pieršakrynicu, bo ŭ netfliksaŭskim «Dekamieronie» ad jaje mała što zastałosia. My pa-raniejšamu ŭ pradmieściach začumlenaj Fłarencyi, i z nami bolšaść hierojaŭ tvora Bakača — maładyja arystakratki Pampinieja, Fiłamiena, Niejfiła i ich spadarožniki dy spadarožnicy. A voś historyi ad ich my čujem tolki ŭ niekalkich epizodach, astatniaje — raskaz pra samich bahaciejaŭ i ich žyćcio ŭ zamknionaj vile, pakul śvietu, jaki jany viedali, zdajecca, prychodzić kaniec.
Niaciažka zdahadacca, što ŭ takich umovach maładziony žadajuć viesialicca, byccam u apošni raz. U pačatku jany jašče sprabujuć zachavać prestyž, i najbolš heta prajaŭlajecca praz asobu bahamołki Niejfiły, jakaja zmahajecca z «hrachoŭnymi dumkami». Ale vielmi chutka maski padajuć, i piersanažy zapaŭniajuć žyćcio hulankami dy seksam — zrešty, hetamu spryjaje i asoba ŭładalnika viły, adnaho z samych zahadkavych hierojaŭ.
Fota: kadr z trejlera
Hetaja viersija «Dekamierona» źniataja ŭ stylistycy čornaj kamiedyi, tamu asabliva adčuvalnym hledačam moža być niaprosta jaje hladzieć. Sprečnyja rysy hierojaŭ tut daviedzienyja da absurdu, i tamu piersanažy časam vyhladajuć karykaturna. Da prykładu, zhadajem Pampinieju, jakaja tak choča vyjści zamuž, što hatovaja padmanuć i susiedziaŭ pa vile, i navat siabie samu.
Žarty ŭ sieryjale prostyja, a niedzie ŭ siaredzinie adčuvaješ, što siužet pravisaje i, zdajecca, užo nie moža ździvić cikavym pavarotam. Ale ŭ apošnich sieryjach «Dekamieron» vypraŭlajecca: situacyja napružanaja, i hieroi, navat bieznadziejnyja ŭ pačatku, pakazvajuć, što čas na vile źmianiŭ ich da lepšaha.
Tak, hetyja źmieny ŭsio jašče nie vyvodziać sieryjał u ranh vysokaintelektualnaha vidovišča, i kali jość achvota pašukać tut kpiny nad kłasikaj, znajści ich možna budzie lohka. Adnak pahladzicie na heta ź inšaha boku: chiba «Dekamieron» Bakača z usimi jaho historyjami, dzie taksama jość volnaje kachańnie i seks, nie byŭ skandalnym i źniavažlivym dla 14-ha stahodździa? Viadoma, što katalickaja carkva asudziła hety tvor, i sam Bakača paźniej vykazvaŭ škadavańnie, što napisaŭ takuju «amaralnuju» knihu. Dyk čamu ž «Dekamieron» 21-ha stahodździa musić być mienš skandalnym?
Prysłuha, jakaja minimalna prysutničała ŭ knizie, u sieryjale nabyvaje žyvoje abličča, chacia i trochi karykaturnaje, jak i ich pany. Aŭtary adaptacyi robiać toje, što naŭrad ci dazvoliŭ by sabie Bakača — jany demanstratyŭna hrebujuć pryncypam kłasavaj niaroŭnaści. Tut niezakonnaje dzicia pretenduje na bahaćcie, słužanka robicca dvarankaj (i nie adna), arystakratki traplajuć u pramym sensie na dno ci načujuć u nadta niečakanym miescy. Zrešty, jakaja roźnica, chto tut dvaranie, a chto — sialanie, kali za bramaj — śmierć, i jana ŭsio bližej?
Fota: kadr z trejlera
Ale nie ŭsie bahatyja nastolki, kab chavacca ad čumy na vile, i hierojaŭ nahaniajuć prajavy hetaj niespraviadlivaści. Možna źmianiać identyčnaść, siabravać i nie tolki sa słužankami, ale što ŭ 14-m, što ŭ XXI stahodździ nikudy nie schavaješsia ad kłasavaj niaroŭnaści, jak i ad ułasnaj śmiarotnaści.
Siužet Bakača hienijalny i tym, što heta — pazačasovaja historyja. Paru hadoŭ tamu, u časy pandemii, było b lohka ŭjavić sabie hrupu siabroŭ, jakija na čas łakdaŭnu vyjechali žyć za horad. Takija siabry taksama, jak Pampinieja i jaje sučaśniki, mahli b bavić čas za fajnymi historyjami i hulankami. Zaadno jany b adčuvali, byccam śviet navokał niezvarotna źmianiajecca, i tamu samy čas atrymlivać maksimum asałody ad žyćcia, navat kali b baćki nie ŭchvalili toje, jak jany heta robiać.
U hetuju prostuju ramku, jakuju nam daŭ Bakača, stvaralniki sieryjała ŭnieśli svajo napaŭnieńnie — atrymałasia žyva.
«Hałavałomka 2» — niejmavierny pośpiech ci pasrednaść? Što adbyvajecca sa studyjaj Pixar
Biełarus u Ńju-Jorku źniaŭsia ŭ cełym siezonie sieryjała. Kolki ž atrymałasia zarabić?