U Italii ŭkrainka ŭpała sa skały i 6 hadzin maliła svajho mužčynu-rasijanina ab dapamozie. Jon tak i nie dapamoh
Śledčym chłopiec skazaŭ, što stamiŭsia ad pavodzin dziaŭčyny i chacieŭ chutčej skončyć adnosiny.
21.07.2024 / 16:39
Ilja Batrakoŭ i Marta-Maryja Ahryzka. Skryn videa: tg3
Ab trahičnym vypadku, jaki adbyŭsia 13 lipienia na italjanskim vostravie Iskija (Ischia) paviedamlaje La Republica. 32-hadovaja ŭradženka Lvova Marta-Maryja Ahryzka žyła ŭ trejler-parku razam sa svaim partnioram, 41-hadovym rasijaninam Iljom Batrakovym.
Jak paviedamlaje palicyja, dniom Marta-Maryja pajšła prahulacca i zvaliłasia sa skały vyšynioj dva mietry. Pry padzieńni jana złamała ščykałatku. Kala troch hadzin dnia dziaŭčyna źviazałasia sa svaim partnioram praz WhatsApp i paprasiła ab dapamozie. Na praciahu nastupnych piaci hadzin jana pisała jamu niekalki razoŭ.
Siarod paviedamleńniaŭ nie tolki prośby dapamahčy, ale i prośby daravać. Ale ni jana, ni jon, jak adznačaje palicyja, nie sprabavali źviazacca z ekstrannymi słužbami.
Akramia paviedamleńniaŭ, Ahryzka sprabavała dazvanicca da svajho kachanaha. Jon padniaŭ trubku tolki a dziasiataj hadzinie viečara. Pa infarmacyi palicyi, razmaŭlali jany piać chvilin.
Paśla hetaha, jak raskazaŭ sam Batrakoŭ, jon pajšoŭ jaje šukać i znajšoŭ jašče žyvoj. Adnak zamiest dapamohi pakinuŭ «spać» u rovie.
Na nastupny dzień Martu-Maryju znajšli miortvuju. Na ciele byli paškodžańni, jakija mahła atrymać jak ad padzieńnia, tak i ad pabojaŭ.
Trejler, u jakim žyli Marta-Maryja Ahryzka i Ilja Batrakoŭ. Skryn videa: tg3
Jak vyśvietliła śledstva, Batrakoŭ šmat piŭ i raŭnavaŭ svaju partniorku. U čas prystupaŭ reŭnaści padymaŭ na jaje ruku. Žančyna dvojčy źviartałasia pa miedyčnuju dapamohu. Pieršy raz paśla atrymanych pabojaŭ, a druhi raz z apiokami druhoj stupieni — Batrakoŭ padpaliŭ na joj adzieńnie.
Byli ŭ Illi pretenzii i da koła kamunikacyi dziaŭčyny. Jaho razdražniała, što tam šmat ukraincaŭ.
Paratunak ad taksičnych adnosin Marta-Maryja šukała ŭ hrupie psichałahičnaj padtrymki, ale Batrakovu heta nie padabałasia. Adnojčy jon navat pahražaŭ joj nažom, patrabujučy spynić naviedańnie hrupy.
Pra častyja svarki pamiž partniorami žurnalistam raskazali i susiedzi. Jany śćviardžajuć, što ŭ tuju trahičnuju subotu Marta-Maryja znoŭ pasvaryłasia ź Illoj i stała źbirać čamadany.
Illu Batrakova aryštavała palicyja. Jaho abvinavačvajuć u naŭmysnym pakidańni žančyny ŭ niebiaśpiecy. Śledčyja vykazvajuć viersiju ab tym, što pryčynaj śmierci moh stać prystup sutarah.
Śledčym Batrakoŭ zajaviŭ, što «stamiŭsia ad pavodzin» svajoj partniorki i chacieŭ «chutčej skončyć ich adnosiny». A svajmu advakatu jon skazaŭ, što «nie čakaŭ, što ŭsio skončycca tak drenna».
«Ja ŭsio zrabiŭ pravilna». Rasijski rekanstruktar zabiŭ žonku i pakinuŭ manifiest u sacsietkach
U «ŁNR» na 11 hadoŭ kałonii asudzili Hieroja Rasii. Jon zabiŭ dziaŭčynu, zamočvajučy zorku hieroja