Chto takaja Kamała Charys — adzin z najbolš imaviernych kandydataŭ u prezidenty ZŠA ad demakrataŭ zamiest Bajdena
Paśla vychadu Džo Bajdena z prezidenckaj honki ŭ ZŠA pohlady prykavanyja da vice-prezidentki Kamały Charys, jakuju jon nazvaŭ svajoj pierajemnicaj. Kamała ŭžo zajaviła pra svoj udzieł u honcy. Raskazvajem jaje historyju.
22.07.2024 / 00:57
Kamała Charys. Fota: Gage Skidmore/flickr.com/CC BY-SA 2.0
Kamale Charys 59 hadoŭ. Rodam jana z horada Okłand u štacie Kalifornija. Jaje baćki — Šamała Charys, daśledčyca raku rodam ź Indyi, i ekanamist Donald Charys rodam ź Jamajki, piša The Washington Post. Kamała maje adnu siastru, Maju, jakaja ciapier stała jurystkaj i taksama datyčnaja da Demakratyčnaj partyi ZŠA.
Baćki Kamały byli hramadskimi aktyvistami, tamu jašče dziciom jana była na mitynhach za hramadzianskija pravy.
Z časam jana i sama ŭklučyłasia ŭ aktyvizm. Naprykład, u 1980-ja, kali Charys była studentkaj, jana ŭdzielničała ŭ demanstracyjach suprać aparteida, jakija tady prachodzili ŭ ZŠA.
Skončyŭšy ŭniviersitet u 1989-m, Kamała Charys pajšła pracavać u prakuraturu, dzie śpiecyjalizavałasia na rasśledavańni spraŭ pra seksualny hvałt nad dziećmi.
Kamała Charys paziruje dla partreta z nahody abrańnia prakuroram San-Francyska u 2004-m. Fota: MARCIO JOSE SANCHEZ/Associated Press
U 2003-m jana vyjhrała ŭ baraćbie za pasadu prakurora akruhi San-Francyska. Charys stała pieršaj žančynaj na hetaj pasadzie. Praź siem hadoŭ jaje abrali hienieralnym prakuroram Kalifornii.
Na pasadzie prakurora Kalifornii Charys admoviłasia padtrymać zakony ab admienie śmiarotnaha pakarańnia. Taksama vystupiła ŭ padtrymku zakona, jaki rabiŭ prahuły pravaparušeńniem, za jakoje adkazvali baćki. Prahułaŭ stała mienš, ale jaje žorstka krytykavali za zanadta strohija miery.
Kamała Charys na pasadzie prakurora Kalifornii. Fota: Marcio Jose Sanchez/AP
U 2013-m jana paznajomiłasia sa svaim budučym mužam, advakatam i miljanieram Duham Emchafam. Para ažaniłasia praz hod, paśla čaho Kamała stała mačychaj dvuch dziaciej Duha — Koŭła i Eły.
U 2016-m Kamała Charys uziała novuju vyšyniu — jaje abrali ŭ Sienat ZŠA. Na fonie pieramohi Trampa na vybarach prezidenta heta stała značnaj padziejaj dla Demakratyčnaj partyi ZŠA.
Kamała Charys padčas pieradvybarčaj kampanii ŭ Sienat ZŠA. Fota: Ringo H.W. Chiu/AP Photo
U 2019-m Charys zajaviła, što choča bałatavacca ŭ prezidenty ad Demakratyčnaj partyi ZŠA. U pieradvybarčych debatach jana abrynułasia na Džo Bajdena. Spačatku jaje rejtynh pačaŭ raści, ale paśla Kamała pačała kazać rečy, pra jakija ekśpierty kazali, što jany «nie vytrymlivajuć anijakaj krytyki». Rejtynhi pačali padać.
Kamała Charys ź plamieńnicaj Amaru Adžahu i mužam Duhłasam Emchofam padčas startu svajoj prezidenckaj kampanii 27 studzienia 2019-ha. Fota: AP Photo/Tony Avelar
U vyniku 3 śniežnia 2019 hoda jana admoviłasia ad udziełu ŭ kampanii, a ŭ sakaviku 2020-ha padtrymała Bajdena jak kandydata i aktyŭna ŭklučyłasia ŭ jaho kampaniju na viadučych rolach. Ekśpierty kazali, što jana «moža dać kamandzie Bajdena nieabchodnuju enierhiju». A paśla abrańnia Bajdena prezidentam Charys stała vice-prezidentkaj ZŠA.
Kamała Charys pobač z Džo Bajdenam pramaŭlaje na mierapryjemstvie ŭ honar Dnia vyzvaleńnia raboŭ 17 červienia 2021-ha. Fota: AP Photo/Evan Vucci
Charys stała pieršaj žančynaj uvohule i pieršym ciomnaskurym amierykancam, jaki zaniaŭ pasadu vice-prezidenta. Prychodziłasia joj nialohka: u padzielenym 50 na 50 pamiž respublikancami i demakratami parłamiencie joj časta davodziłasia addavać vyrašalny hołas. Z roznych pryčyn jana stała vice-prezidentkaj z adnym z najmienšych rejtynhaŭ uchvaleńnia ŭ historyi ZŠA.
Ciapier jana moža stać pieršaj žančynaj, jakaja stanie prezidentam ZŠA. Mienavita jaje Džo Bajden pradstaviŭ jak svaju pierajemnicu na vybarach u 2024-m.
«Ja rablu ŭsio, što mahu, kab abjadnać Demakratyčnuju partyju i našu nacyju dla pieramohi nad Donaldam Trampam. U nas zastałosia 107 dzion da vybaraŭ. Razam my budziem zmahacca. I razam my pieramožam», — zajaviła jana siońnia, piša CBS.
Bajden vychodzić z prezidenckaj honki
Rašeńnie źniać svaju kandydaturu Bajden pryniaŭ siońnia. Jano stała niečakanaściu dla jahonaha štaba
Kamała Charys zajaviła, što bałatujecca na pasadu prezidenta ZŠA