Zamiežniki pišuć u sacsietkach, što źbirajucca ŭ Biełaruś pa biaźvizie. A ich uprošvajuć pieradumać
U anhłamoŭnaj sacsietcy Reddit usio bolš pastoŭ ad zamiežnikaŭ, jakija chočuć naviedać našu krainu. Biełaruskija karystalniki ŭ žachu — jany nahadvajuć jeŭrapiejcam pra dośvied Ryka Kryhiera. Čyje arhumienty macniejšyja?
24.07.2024 / 12:35
Mirski zamak
Dniami ŭ Reddit źjaviŭsia post ad mužčyny, jaki ŭ inšych publikacyjach pisaŭ pra siabie jak pra niezaležnaha žurnalista. Raniej jon źbiraŭ infarmacyju pra pierapraŭku mihrantaŭ u Biełaruś — chutka jon źbirajecca ŭ našu krainu, kab źniać tut materyjał pra mihrantaŭ.
Inšyja karystalniki nazvali jaho zadumu vielmi drennaj, bo ŭ Biełarusi žurnalisty časta traplajuć pad udar. Tamu śmieły zamiežnik, na dumku kamientataraŭ, moža być zatrymanym za svaju pracu. Ale ž mužčynu heta nie spužała — na zakliki admianić padarožža jon reahavaŭ tolki padziakaj za mierkavańnie. Na dumku hetaha zamiežnika, kali jon dakładna vyvučyć faktary ryzyki i padrychtujecca, jaho pajezdka projdzie dobra.
Taksama ŭ Biełaruś sabraŭsia litoviec, jaki maje biełaruskija karani i zaŭždy chacieŭ naviedać našu krainu. U kamientarach jon adznačyŭ, što za biełaruskaj palitykaj nie nadta sočyć. Jamu adkazali, što ryzyka pajezdki ŭ Biełaruś nasamreč nievialikaja, ale ž kali im nasamreč zacikaviacca siłaviki, to možna pravieści šmat hadoŭ u biełaruskaj turmie.
Siarod inšych u Biełaruś taksama źbiralisia jechać amierykaniec i 19-hadovaja irłandka — apošniuju, adnak, kamientatary zdoleli adhavaryć. Častka ź ich napisała, što kali dziaŭčyna budzie trymacca dalej ad palitycy ci nie rabić hłupstvaŭ nakštałt užyvańnia narkotykaŭ, jaje padarožža ŭ Biełaruś budzie biaśpiečnym. Ale inšyja paraili irłandcy vybrać inšyja miescy dla vandroŭki i pryjechać u Biełaruś paźniej, kali kraina dakładna budzie biaśpiečnaja dla zamiežnikaŭ.
Pad uražańniem turystaŭ biełarusy stali pisać pasty z zaklikami nie jechać u krainu, pryčym hety zaklik datyčycca i biełarusaŭ zamiežža. Inšaziemcam nahadali pra śmiarotny prysud niemcu Ryka Kryhieru, biełarusam — pra los ajcišnicy, jakaja pajechała na radzimu z daviedkaj pra kampiensavany danat ad siłavikoŭ i atrymała ŭ vyniku šeść hadoŭ kałonii.
Nie ŭsie ŭ heta pavieryli: niechta pytaŭsia, ci nasamreč Kryhier vinavaty, niechta kazaŭ, što nie pamiataje vypadkaŭ, kab zamiežnikaŭ brali ŭ Biełarusi ŭ palityčnyja zakładniki. Adzin kamientatar miarkuje, što takoje padarožža budzie bolš niebiaśpiečnym dla žycharoŭ krain, jakija majuć drennyja adnosiny ź biełaruskim režymam, i što naŭrad ci kitajski ci kazachski turyst znojduć u Biełarusi prablemy.
Byli i sumnyja žarty: «Ale ja chaču naviedać maju dvojčy addalenuju ciotku z boku prapradziaduli, i ja zbolšaha pa-za palitykaj! Ci biaśpiečna pryjechać u Biełaruś?»
Adzin z karystalnikaŭ, amierykaniec, padzialiŭsia svajoj historyjaj. Minułym letam jon trochi razdumvaŭ pra toje, kab pajechać u Biełaruś na intensiŭ pa ruskaj movie — prahrama była vielmi tannaja, i mužčyna vyrašyŭ, što pahružeńnie ŭ rasijskamoŭnaje asiarodździe dapamoža jamu.
Ale ŭrešcie ad hetaj idei jon admoviŭsia. Amierykancu nie spadabałasia, jak jon musić atrymlivać biełaruskuju vizu, taksama jaho naściarožyła abjava na sajcie Dziarždepartamienta ZŠA — naviersie staronki było napisana tłustym šryftam vialikaha pamieru i vialikimi čyrvonymi litarami DON'T GO TO BELARUS [NIE JEDŹCIE Ŭ BIEŁARUŚ].
Zrešty, Dziarždep i dahetul nie źmianiŭ svaje parady pa padarožžach u našu krainu: amierykancy rajać nie jechać u Biełaruś praz saŭdzieł krainy ŭ vajnie va Ukrainie, praź niebiaśpieku represij i toje, što amierykanskija dypłamaty mała čym mohuć dapamahčy svaim suajčyńnikam u Biełarusi.
Ajcišnica z Hrodna viarnułasia dadomu z Polščy. Jaje zatrymali i buduć sudzić
Siłaviki cisnuć na baćkoŭ viadoŭcaŭ tyktok-kanała «Lusterka»