99-hadovy biełarus vyrašyŭ atrymać paśviedčańnie ab naradžeńni
Michaił Fiodaravič Łoś ź vioski Indyčy Kamianieckaha rajona ŭ pašparcie maje tolki hod naradžeńnia — 1925, ale zamiest daty — zahadkavyja «iksy». Situacyju zachaciełasia vypravić.
24.07.2024 / 07:59
Fota: Kamenec.by
Tamu padsumoŭvajučy svoj žyćciovy šlach, vyrašyŭ atrymać novy pašpart z dataj naradžeńnia. A dla hetaha nieabchodna paśviedčańnie ab naradžeńni, ale mietryka daŭno stračana ŭ chvalach žyćciovych padziej, piša Kamenec.by.
Volha Žyhalskaja, načalnik adździeła ZAHS, kaža:
— Takija zvaroty z prośbaj adnavić datu naradžeńnia davoli redkija. U Michaiła Łasia majecca adziny dakumient, dzie nazvanaja data jaho naradžeńnia, — 15 lutaha, mahčyma, ź jaho ž słoŭ, — heta vajenny bilet, vydadzieny ŭ 1963-m, ale hetaha niedastatkova. Staršynia suda Kamianieckaha rajona Aksana Škiel, jakaja vyjazdžała da Michaiła Fiodaraviča dadomu dla apytańnia, źviarnułasia ŭ Hrodzienski nacyjanalny histaryčny archiŭ. Ale atrymany adkaz, što mietryčnaj knihi za 1925 hod z Arepickaj carkvy (Žabinkaŭski rajon), dzie chryścili małoha Michaiła, u ich niama.
Śviatar hetaha chrama paraiŭ źviarnucca ŭ jeparchijalny archiŭ u Breście, ale taksama pryjšoŭ admoŭny adkaz. Byli zroblenyja zapyty i ŭ rajvajenkamat, i ŭ rajadździeł hramadzianstva i mihracyi — toje ž samaje.
U vyniku źviarnuli ŭvahu na zapisy ŭ paślavajennaj haspadarčaj knizie i na niekalkich jaje staronkach vyjavili vyšejnazvanuju datu naradžeńnia. Padčas razmovy dačka i ŭnučka Michaiła Fiodaraviča ŭspaminajuć, jak kožny hod 15 lutaha vinšavali jaho z dniom naradžeńnia, zatym usioj siamjoj išli ŭ Śviata-Pakroŭskuju carkvu ŭ Arepičach… Akramia taho, zapis u vajennym bilecie taksama ŭsio ž staŭ arhumientam.
Na 31 lipienia, pa ŭzhadnieńni ź Michaiłam Fiodaravičam, pryznačana vyjaznoje pasiadžeńnie suda ŭ jaho domie. I jak tolki ŭstupić u zakonnuju siłu rašeńnie suda, jamu budzie ŭručana paśviedčańnie ab naradžeńni.