«Padrychtoŭka da Alimpijady prajšła nie tak, jak płanavała». Cimanoŭskaja raskazała, ź jakim nastrojem jedzie ŭ Paryž
Biahucha Kryścina Cimanoŭskaja ŭ intervju «Radyjo Svaboda» raskazała pra padrychtoŭku da Alimpijady, chvaroby, kantakty ź biełaruskimi spartoŭcami i płany pajechać u ZŠA i niekali adkryć svaju spravu.
24.07.2024 / 10:26
Na Alimpijadzie ŭ Tokia ŭ 2021 hodzie ŭ biahuchi biełaruskaj nacyjanalnaj zbornaj Kryściny Cimanoŭskaj zdaryŭsia kanflikt sa spartovymi biełaruskimi čynoŭnikami. Jaje pastavili biehčy estafietu 4×400 mietraŭ, jakoj jana nikoli nia biehała.
Na Alimpijadzie Kryścina rychtavałasia vystupić u biehu na 100 i 200 metraŭ. U vyniku spartoŭku vyklučyli z alimpijskaj kamandy — jana tak i nie paśpieła vystupić. Cimanoŭskaja taksama zajaviła, što jaje sprabavali siłaj vyvieźci z Tokia ŭ Biełaruś. Jana admoviłasia sadzicca na samalot i skazała, što ŭ aeraport jaje dastavili suprać voli. U sytuacyi braŭ udzieł premjer-ministra
Polščy, spartoŭku achoŭvała japonskaja palicyja. Urešcie Cimanoŭskaja pajechała žyć u Polšču. Ciapier 27-hadovaja lohkaatletka vystupaje za polskuju zbornuju i rychtujecca ŭziać udzieł u Alimpijadzie ŭ Paryžy, jakaja pačniecca 26 lipienia. U razmovie sa «Svabodaj» Kryścina raskazała, što adčuvaje z hetaj nahody
«Hałoŭnaje nie pieratrenavacca»
Kryścina Cimanoŭskaja havoryć, što padrychtoŭka da Alimpijady pajšła nia tak, jak jana planavała. Paśla čempijanatu Polščy ŭ lohkaj atletycy, jaki prajšoŭ u kancy červienia, jana mocna zachvareła.
«Virus, vielmi mocny. Ja lažała z temperaturaj 39,5 ceły tydzień. Źviarnułasia da lekaraŭ zbornaj Polščy. U mianie byli nastolki kiepskija analizy i ahulny stan, što mianie praz heta mahli vyklučyć sa zbornaj. Ja jeździła kožnyja dva dni pierazdavać analizy», — raskazała jana.
Dynamika była stanoŭčaj, tamu biahuchu nia vyklučyli sa spabornictvaŭ. Ciapier jana na zborach u Polščy. Z sakavika pa travień treniroŭki byli bolš abjomnyja — pa 3-4 hadziny ŭ dzień. Niepasredna pierad Alimpijadaj karaciejšyja — da dźviuch hadzinaŭ na dzień. Siłavyja, chutkasnyja i na tryvałaść. Jany nia mocna adroźnivajucca ad tych, jakija byli ŭ Biełarusi, kaža surazmoŭca.
«Trenavańni nakiravanyja na toje, kab padtrymlivać formu, davieści jaje da ideału. Pilnavać, kab nie było traŭmaŭ, chadzić da fizijaterapeŭta, rabić masaž, adnaŭlacca. Sačyć za charčavańniem. Hałoŭnaje nie pieratrenavacca, kab arhanizm byŭ adpačyły i padrychtavany na chutkija prabiežki», — patłumačyła Kryścina.
Na zborach jość nutrycyjolah, jaki składaje meniu. Trojčy na dzień u spartoŭcaŭ jość švedzki stoł, dzie jość aharodnina, miasa, pryhatavanaje na pary.
Piać razoŭ lažała z temperaturaj
Spartoŭka miarkuje, što kanflikt na papiaredniaj Alimpijadzie ŭ Tokijo, paśla jakoj jana ŭžo nie viarnułasia ŭ Biełaruś, adbiŭsia na jejnym zdaroŭi.
«Mnie zdavałasia, što hety peryjad praciakaŭ adekvatna. Ja starałasia adaptavacca da žyćcia ŭ novaj krainie i znajści siabie tut. Žyła zvyčajnaje žyćcio spartoŭca, trenavałasia, pracavała, starałasia pahladzieć cikavyja miescy. U Polščy jeździła i ŭ hory, i na mora. Starałasia adciahvać uvahu. Ale arhanizm niemahčyma padmanuć», — raskazała surazmoŭca.
Kryścina dadaje, što ŭ hod pierad Alimpijadaj jana chvareła kožnyja dva miesiacy z vysokaj temperaturaj.
«U mianie padymajecca temperatura prosta tak. Ja lažu tydniami. Za apošnija paŭhoda ja, mabyć, piać razoŭ lažała z temperaturaj. Kali skłaści ŭsie dni, što ja chvareła, to vyjdzie bolš za miesiac», — padzialiłasia spartoŭka.
Lekary pryjšli da vysnovy, što taki adkładzieny efekt daŭ stres za apošnija hady.
«Z hetym praktyčna ničoha nielha zrabić. Ja sprabuju prymać vitaminy. Starajusia paźbiahać kantaktu ź vialikaj kolkaściu ludziej. Ale heta nia vielmi dapamahaje, bo arhanizm asłableny na fonie stresu», — pryznałasia surazmoŭca.
Na Alimpijadzie ŭ Paryžy jana chacieła b prabiehčy najlepšy vynik u sezonie.
«Uličvajučy, što heta buduć 200 metraŭ, jakich ja tak i nie prabiehła ŭ Tokijo, mnie prosta chočacca prabiehčy narešcie», — adznačyła jana.
«Vystup za Biełaruś — heta vystup za ŭładu»
Spartoŭcaŭ biełaruskaj zbornaj u lohkaj atletycy sioleta nie dapuścili da Alimpijady. Adnak majuć pryjechać 17 čałaviek, jakija buduć vystupać za Biełaruś u inšych vidach. Kryścina kaža, što nikoha ź ich nia viedaje, «tamu hetaja infarmacyja nijak jaje nie datyčyć». Raniej jana padtrymlivała kantakt ź niekatorymi spartoŭcami ŭ Biełarusi.
«Adnak, kali pačałasia vajna (poŭnamaštabnaje ŭvarvańnie Rasiei va Ŭkrainu. — RS), ja ŭbačyła, što ichnaja reakcyja nie supała z majoj. I ja pierastała ź imi kamunikavać. Zastalisia tolki dva čałavieki ŭ biełaruskaj zbornaj, ź jakimi ja mahu padtrymlivać suviaź», — zaznačyła spartoŭka.
Jana dadała, što kali ŭbačyć na Alimpijadzie spartoŭcaŭ, jakija vystupajuć za Biełaruś, to nia budzie da ich padychodzić i sprabavać pahavaryć, bo jana ich nia viedaje.
«Ja nia budu padychodzić da tych, chto budzie nasić čyrvona-zialony ściah i chadzić sa ściaham Biełarusi. Heta ŭžo pryncypova», — padkreśliła jana.
Kryścina kaža, što ciapier joj nie balić toje, što jana nia moža vystupać za Biełaruś.
«Zaraz vystup za Biełaruś — heta vystup za ŭładu, jakaja ciapier u Biełarusi. Tamu ja nie chacieła b nijakaha dačynieńnia mieć ni da hetaj ułady, ni da biełaruskaha ciapierašniaha ściaha», — patłumačyła biahucha.
«Mnie b chaciełasia padymać ściah Biełarusi»
U polskaj zbornaj jana šmat z kim kamunikuje, asabliva z šaściu spartoŭkami, ź jakimi jany razam biehajuć estafety.
«Ja razumieju, što dla ich ja pryježdžaja. I ja nikoli nia budu svajoj, bo ja nie naradziłasia ŭ Polščy. Napeŭna, heta narmalna. Časam ja nie razumieju ichnych žartaŭ, słenhavych vyrazaŭ, choć ja viedaju polskuju movu. Usie śmiajucca, a ja nie razumieju. Moŭny barjer — adna z pryčyn, čamu ja nie mahu siabie na 100% adčuć svajoj», — pryznałasia Kryścina.
Jana dadała, što treba pierastroicca i ciapier padymać ściah inšaj krainy, chacia raniej vystupała pad ściaham krainy, u jakoj naradziłasia.
«Mnie b chaciełasia padymać ściah Biełarusi, ale nia toj, jaki ciapier tam aficyjny», — adznačyła jana.
Kryścina ŭdziačnaja Polščy. Miarkuje, što moža padziakavać krainie za paśpiachovyja vystupy.
«Na čempijanacie śvietu letaś my zaniali piataje miesca ŭ estafecie. I heta byŭ samy mocny vystup zbornaj za ŭsiu historyju polskaj lohkaj atletyki», — uspomniła jana.
Adnak asablivych emocyj ad taho, što vystupaje za Polšču, Kryścina nie maje.
«U lohkaj atletycy kožny abaraniaje svoj honar. U asnoŭnym usie spabornictvy kamercyjnyja, i ty pradstaŭlaješ siabie jak siabie. Tam niama niejkich asablivych adčuvańniaŭ, što siońnia ty polka, a ŭčora była biełaruska. Ty prosta Kryścina Cimanoŭskaja, i ŭsio, i biažyš jak Kryścina Cimanoŭskaja. Ja prosta jedu i rablu svaju spravu», — skazała biahucha.
Biehavaja škoła
Uvosień Kryścina planuje pajechać u ZŠA. Razam z treneram i lekarami vyrašyła, što joj varta zrabić pierapynak u spabornictvach. Prapuścić zimovy sezon i padrychtavacca da letniaha 2025 hodu. Adnavicca jana chacieła ŭ krainie, dzie budzie ciopła i šmat sonca. Čas z kastryčnika pa travień jana planuje pravieści ŭ Fłorydzie.
«Možna budzie trenavacca štodnia na vulicy. Źmiena abstanoŭki. Mahčyma, heta paŭpłyvaje na moj stan. Moža być, ja adčuju siabie lepš, adkryjecca druhoje dychańnie i ja viarnusia z novymi siłami», — patłumačyła Kryścina.
Jana nia ŭpeŭnienaja, što choča žyć u Polščy.
«Mnie šmat čaho padabajecca ŭ Polščy: što jość hory, mora, što ŭ cełym palaki vielmi ciopła prymajuć biełarusaŭ. U Polščy šmat mahčymaściaŭ dla raźvićcia, kab adkryć svoj biznes. Ale mianie biantežyć vialikaje «ale» — heta nadvorje i adsutnaść sonca vosiem miesiacaŭ na hod. Ja praz heta adčuvaju siabie vielmi kiepska», — adznačyła jana.
Kryścina choča pažyć u niekalkich krainach, kab zrazumieć, dzie choča zastacca. Pasprabavać žyćcio ŭ Partuhalii, Hišpanii, na astravach.
Jana ŭžo zadumałasia pra zaviaršeńnie karjery. U rašeńni budzie najpierš aryjentavacca na stan svajho zdaroŭja. Cimanoŭskaja chacieła b adkryć svaju spravu.
«Ja z tych ludziej, chto nia zdoleŭ by pracavać u najmie», — pryznajecca jana.
Cimanoŭskaja chacieła b adkryć biehavuju škołu i dastaŭku zdarovaha charčavańnia.
«Kab tyja, chto trenujecca, mahli charčavacca pravilna, zbalansavana, rychtavacca da spabornictvaŭ. Kab im heta mahło dapamahčy palepšyć ichnyja vyniki i być zdarovymi», — raskazała surazmoŭca.
Kryścina Cimanoŭskaja — čempijonka Biełarusi 2016 hodu ŭ biehu na 200 metraŭ, srebranaja pryziorka Čempijanatu Eŭropy siarod moładzi 2017 hodu ŭ biehu na 100 metraŭ. Majstar sportu mižnarodnaje klasy. Ad 2022 hodu hramadzianka Polščy. Udzielnica finału čempijanatu śvietu pa lohkaj atletycy 2023 hodu ŭ Budapešcie ŭ składzie polskaj nacyjanalnaj kamandy pa estafecie 4 pa 100 metraŭ.
Rasijanina abvinavačvajuć u sprobie destabilizacyi padčas Alimpijady
Pieršyja prablemy biełarusaŭ na Alimpijadzie ŭ Paryžy. Vieślary ŭžo tam, a łodki nie prapuścili
Na Alimpijadu ad Biełarusi jedzie minimalnaja ŭ historyi kolkaść udzielnikaŭ — 17 čałaviek