«Rasija łže nakont ekanamičnaha rostu. Sankcyi pracujuć, ich treba ŭzmacnić» — ministry finansaŭ ES
Zachodnija sankcyi, jakija rasijskaja prapahanda sprabuje pradstavić jak stymuł dla rostu ekanomiki Rasii, na samaj spravie stali pačatkam jaje resavietyzacyi, miarkujuć ministry finansaŭ vaśmi krain Jeŭrasajuza. U kałoncy dla The Guardian jany adznačyli, što efiektyŭnaść ekanamičnaha cisku na Rasiju vidavočnaja, i zaklikali ŭzmacniać jaho, piša «Ahientstvo».
24.07.2024 / 16:14
Fota: Contributor/Getty Images
Pad kałonkaj, apublikavanaj vydańniem The Guardian, stajać proźviščy ministra finansaŭ Šviecyi, Danii, Estonii, Finlandyi, Łatvii, Litvy, Niderłandaŭ i Polščy.
Ministry zajavili pra nieabchodnaść supraćstajać naratyvam rasijskaj prapahandy pra toje, što rasijskaja ekanomika ŭ dobrym stanie, a zamiežnyja sankcyi «pasłužyli stymułam dla jaje rostu».
Nasamreč, toje, što možna było b pamyłkova pryniać za «stymuł» dla rostu rasijskaj ekanomiki, źjaŭlajecca pačatkam jaje resavietyzacyi, pišuć ministry. Prykmietami hetaha pracesu jeŭrapiejskija čynoŭniki nazvali ŭzmacnieńnie kantrolu nad rynkam z boku dziaržavy, vialikija dziaržvydatki, jakija finansujucca za košt kanfiskacyi pryvatnych aktyvaŭ, i pieraaryjentacyju ekanomiki na vajskovuju pramysłovaść z «poŭnaj pahardaj» da sacyjalnaha i ekanamičnaha dabrabytu nasielnictva.
Heta nie moža być paśpiachovaj doŭhaterminovaj stratehijaj, pišuć ministry finansaŭ krain ES.
Karotkaterminovy pierahreŭ ekanomiki, vyklikany bujnymi inviestycyjami ŭ vajskovuju pramysłovaść i vielmi abmiežavanym dostupam da technałohij, chutčej za ŭsio, budzie pieraškadžać rostu pradukcyjnaści i pryviadzie da stahnacyi pryvatnaha siektara, paskareńniu inflacyi i pavieličeńniu cisku na rasijskija domahaspadarki, havorycca ŭ publikacyi.
Prykmietami niestabilnaj ekanomiki aŭtary publikacyi nazyvajuć poŭnuju zahruzku vajskovych pradpryjemstvaŭ, rekordna nizkaje biespracoŭje, uchvaleńnie Pucinym idei zamianiać pazbaŭleńnie voli papraŭčymi rabotami, rost inflacyi i cenaŭ na impartnyja tavary, a taksama dvuchrazovaje skaračeńnie likvidnych aktyvaŭ Fondu nacyjanalnaha dabrabytu, pra što pisaŭ Bloomberg.
Dla raźviazańnia prablem u ekanomicy Kramlu daviadziecca pavialičvać vydatki, što budzie, u svaju čarhu, padhaniać inflacyju i jašče bolš vyčerpvać rasijejskija hrašovyja reziervy, pišuć ministry finansaŭ.
«Kali [Uładzimir] Pucin zastaniecca na hetym šlachu, doŭhaterminovaja škoda rasijskaj ekanomicy moža być značnaj i, chutčej za ŭsio, jašče bolš padarvie davier [da palityki ŭładaŭ]», — havorycca ŭ publikacyi.
Sankcyi, nakiravanyja suprać rasijskaj ekanomiki, źmianili hieahrafiju zamiežnaha handlu Rasii, zabiaśpiečyli skaračeńnie dachodaŭ ad ekspartu ŭ 2022 i 2023 hadach prykładna na tracinu i abmiežavali dostup Kramla da pradukcyi, nieabchodnaj na poli boju, pišuć jeŭrapiejskija čynoŭniki.
Aŭtary publikacyi ličać, što treba praciahvać i rabić bolš žorstkimi sankcyi «ŭ stratehična važnych siektarach, takich jak enierhietyka, finansy i technałohii». Akramia taho, varta palepšyć vykanańnie ŭžo ŭviedzieny' sankcyj, u pryvatnaści cenavaj stoli na rasijskuju naftu, miarkujuć ministry.
Taksama jany zajavili pra nieabchodnaść uvieści lustranyja sankcyi suprać Biełarusi i akazać bolšy cisk na krainy Uschodniaj Azii i Blizkaha Uschodu, jakija dapamahajuć Rasii abychodzić sankcyi.
Słavakija i Vienhryja spyniajuć pampavać naftu praz trubapravod «Družba». Heta važna i dla Biełarusi
Rasijski vajenpram surjozna zavinavaciŭsia Biełarusi. Nie dapamahajuć navat sudy
Biełaruś užo asvoiła rasijski kredyt na impartazamiaščeńnie i prosić novy