Efiektyŭnaść ukrainskich dronaŭ za hod upała ŭ čatyry razy
Pracavać dronam-kamikadze stanovicca ŭsio składaniej.
25.07.2024 / 14:20
Fota: Efrem Lukatsky / AP
«Dola paśpiachovych apieracyj udarnych dronaŭ zaraz składaje kala 10%. Hod tamu heta było 40%», — skazaŭ Bild niamiecki vajenny ekśpiert. Situacyju ŭ Danieckaj vobłaści jon nazvaŭ «niadobraj», bo rasijanie nastupajuć i mohuć «abyści z fłanhu ŭkrainskich abaroncaŭ ci navat udaryć im u tył». Takaja pahroza isnuje, naprykład, u rajonie Bachmuta ci Tarecka.
Inšy vajenny ekśpiert, jaki vajavaŭ za USU, paviedamiŭ: «Vialikaja prablema ŭ tym, što US RF stanoviacca ŭsio lepšymi i lepšymi ŭ vykarystańni hłušyłak, jakija stvarajuć radyjopieraškody. Pracavać dronam-kamikadze stanovicca ŭsio składaniej, bo spačatku treba šukać prałomy ŭ rasijskaj sistemie padaŭleńnia radyjočastot. Heta aznačaje, što ŭsio mienš i mienš dronaŭ dasiahajuć svajoj mety».
Ukrainski sałdat paviedamiŭ Bild, što «na 1000 km frontu ŭ nas 400 zachodnich BTR, sapraŭdnyja kontrataki niemahčymyja».
Pavodle jaho słoŭ, «niedastatkova prosta dobra padrychtavać ekipaž» zachodniaj mašyny, kali aficery USU pry hetym «nie navučany ahulnavajskovamu boju» ź ich užyvańniem. Heta pryvodzić da «fatalnych pamyłak», kali sprava dachodzić da vykarystańnia zachodniaj zbroi ŭ bai.
«Hałoŭnaja prablema ŭ tym, što za dva hady rasijanie navučylisia pravilna vykarystoŭvać svaje vajenna-pavietranyja siły. Jany skidajuć na nas tysiačy bombaŭ kožny miesiac, nanosiačy vializnuju škodu.
Rasijskaja taktyka bambavańniaŭ nie dazvalaje nam abaraniać harady i vioski z dastatkovaj kolkaściu ludziej. Bo sałdatam patrebnyja pazicyi, kab abaraniać ich. A bambardiroŭščyki RF zahadzia rujnujuć dzieviać damoŭ ź dziesiaci i tamu vydatna viedajuć, što my siadzim u padvale apošniaha. Mienavita na im jany kancentrujuć svoj prycelny ahoń», — raspavioŭ aficer USU.