Upaŭnavažanaja pa pravach dziciaci ŭ Rasii syšła ad muža-śviatara da pravasłaŭnaha aliharcha
Ale heta nie adziny niepryjemny fakt u bijahrafii Maryi Lvovaj-Białovaj.
25.07.2024 / 15:18
Maryja Lvova-Białova. Fota: Mikhail Metzel, Sputnik, Kremlin Pool Photo via AP, File
Vydańnie «Viorstka» paviedamiła, što ŭpaŭnavažanaja pa pravach dziciaci ŭ Rasii Maryja Lvova-Białova syšła ad muža-śviatara da pravasłaŭnaha aliharcha Kanstancina Małafiejeva.
Małafiejeŭ — zasnavalnik telekanału «Caŕhrad» i sponsar vajny va Ukrainie. Z 2014 hoda jon znachodzicca ŭ sankcyjnych śpisach Jeŭrasajuza i ZŠA.
Pry hetym aficyjna Lvova-Białova nie raźviałasia sa svaim mužam — śviatarom Paŭłam Kahielmanam. Ź im jana paviančanaja i maje dziesiać dziaciej. Ź ich piać — pryjomnych. Siarod ich i padletak z Maryupala.
Maryja Lva-Białova razam z mužam Paŭłam Kahielmanam i 9 dziećmi. Archiŭny zdymak. Krynica: telehram-kanał Paŭła Kahielmana
Z toj pary, jak Lvova-Białova zaniała pasadu ŭpaŭnavažanaj pa pravach dziciaci ŭ 2021 hodzie, pra jaje šmatdzietnuju siamju nieadnojčy raskazvali ŚMI. Sama žančyna pastajanna vykazvajecca pra tradycyjnyja kaštoŭnaści, vieru ŭ Boha, pravasłaŭny šlub i pryjomnaje baćkoŭstva.
Paśla paŭnamaštabnaha ŭvarvańnia va Ukrainu čynoŭnica stała adkaznaj za vyvaz ukrainskich sirot u Rasiju i ich uładkavańnie ŭ pryjomnyja siemji. U sakaviku 2023 hoda Mižnarodny kryminalny sud vydaŭ ordar na jaje aryšt pa abvinavačańni ŭ niezakonnym pieramiaščeńni ŭkrainskich dziaciej.
Małafiejeŭ raźvioŭsia sa svajoj žonkaj letam 2023 hoda. Pieršyja zdahadki ab jaho ramanie ź Lvovaj-Białovaj u ŚMI źjavilisia zimoj hetaha hoda. Ale tolki 16 lipienia para pakazałasia na ludziach razam, kali padčas chresnaha chodu ŭ Jekaciarynburhu prajšlisia, uziaŭšysia za ruki.
Kanstancin Małafiejeŭ i Maryja Lvova-Białova na prezientacyi dabračynnaha prajekta «Ščaślivaje dziacinstva» ŭ 2023 hodzie. Fota: telehram-kanał Kanstancina Małafiejeva
Pa infarmacyi krynic vydańnia, čynoŭnica ciapier žyvie asobna ad dziaciej i muža.
Vydańnie śćviardžaje, što raman Małafiejeva i ŭpaŭnavažanaj pa pravach dziciaci moh sapsavać jaho adnosiny z patryjarcham Kiryłam. Ale jość viersija, što pryčynaj hetaha mahli być ambicyi miljardera, a jaho raman tolki staŭ nahodaj dla addaleńnia ad Kiryła ŭpłyvovaha kankurenta.
Niepryjemnyja fakty bijahrafii
Znachodžańnie ŭ adnosinach ź inšym mužčynam pry zakonnym mužy — nie adziny fakt, jaki psuje vobraz pryjemnaj žančyny i hramadskaj aktyvistki.
Jašče dva hady tamu vydańnie «Błoknot» pryvodziła inšyja niepryjemnyja fakty ź minułaha čynoŭnicy, jakaja da taho, jak stała ambudsmienam, była kiraŭnicaj raznastajnych dabračynnych prajektaŭ u Pienzie, što zajmalisia dapamohaj sirotam i invalidam. Siarod ich pansijanaty «Dom Vieraniki» i «Kvartał Łui».
Zhodna ź infarmacyjaj «Błoknota», supracoŭniki i sama Lvova-Białova prymušali padapiečnych «Doma Vieraniki» ź ciažkaj invalidnaściu brać kredyty, matyvujučy heta tym, što biaspłatna ich nichto nie budzie lačyć.
Vydańnie pryvodzić čatyry prykłady śmierci ciažka chvorych ludziej, što znachodzilisia va ŭstanovach, za jakija adkazvała Lvova-Białova. Śćviardžajecca, što pryčynaj byli niehumannaje staŭleńnie i adsutnaść naležnaha dahladu.