Va Ukrainie aktyvisty patrabujuć rasśledavać dziejnaść biełaruskaha «karala kantrabandy»
Užharadski haradski i rajonny sud Zakarpackaj vobłaści abaviazaŭ abłasnoje Śledčaje ŭpraŭleńnie Nacyjanalnaj palicyi pačać dasudovaje rasśledavańnie dla pravierki faktaŭ, vykładzienych u zajavie hramadskaj arhanizacyi «Non-stop» ab niezakonnym handli cyharetami i ałkaholem biznesoŭca Artura Hranca, jaki maje biełaruski pašpart, piša «Radyjo Svaboda».
25.07.2024 / 16:01
Artur Hranc. Fota: go-ns.org.ua
Jak vyśvietlili aktyvisty hramadskaj arhanizacyi, Artur Hranc za čas poŭnamaštabnaj vajny Rasii suprać Ukrainy staŭ «adzinym lidaram prodažu cyharet praź sistemy Duty Free». Arhanizacyja nazvała jaho «karalom kantrabandy».
Zhodna ź infarmacyjaj arhanizacyi, Artur Hranc — bienieficyjar ukrainskaha TAA «Djuti Fri Triejdinh», jakoje zajmajecca biezakcyznym prodažam cyharet praź sistemu Duty Free.
U apublikavanym materyjale aktyvistaŭ zhadvajecca, u pryvatnaści, punkt propusku «Parubnaje — Siret» na miažy z Rumynijaj. Tolki ŭ 2022 hodzie tam realizavali 4 252 700 pačak cyharet — pa 25 pačak na kožnaha hramadzianina, jaki pierasiakaŭ miažu.
Jak adznačajecca ŭ rasśledavańni aktyvistaŭ, kampanija Artura Hranca afarmlała prodaž cyharet na hramadzian, jakija pierasiakali miažu, a nasamreč pradavała tytuń kantrabandystam, jakija dalej realizoŭvali tavar u krainach Jeŭrasajuza.
Pavodle źviestak arhanizacyi «Non-stop», Artur Hranc vałodaŭ kramami biazmytnaha handlu ŭ kijeŭskich aeraportach «Baryspal» i «Žulany», a taksama ŭ inšych aeraportach Ukrainy.
«Tolki za listapad-śniežań 2020 hoda kramy biazmytnaha handlu ŭ aeraporcie «Kijeŭ» («Žulany») «pradali pasažyram, farmalna, pavodle dakumientaŭ, 530 584 błoki cyharet — pa 23 błoki na kožnaha čałavieka. Nasamreč ludzi navat nie viedali, što jany «nabyli» skryni cyharet. U toj ža čas hetyja tytuniovyja vyraby razvozilisia ŭ nielehalnyja handlovyja punkty na terytoryi Ukrainy, dzie ich realizavali za hatoŭku», — adznačajecca ŭ rasśledavańni hramadskaj arhanizacyi.
Anałahičnuju schiemu vykarystoŭvali i pry realizacyi ałkaholnych napojaŭ — akcyzny padatak nie spłačvaŭsia, bo farmalna pradukcyja nibyta vyvoziłasia za miažu.
Pavodle infarmacyi aktyvistaŭ, Artur Hranc vałodaje bolš jak 35 kramami biazmytnaha handlu ŭ Biełarusi i «maje partniorstva z Kiraŭnictvam spraŭ prezidenta Respubliki Biełaruś, na padstavie čaho možna mierkavać, što biznesoviec źjaŭlajecca partnioram Łukašenki».
Aktyvisty śćviardžajuć, što Artur Hranc maje biełaruskaje hramadzianstva, a dva jahonyja syny — David i Arman — žyvuć u Padmaskoŭi i majuć va ŭłasnaści niekalki handlovych kampanij, takich jak TAA «Avanhard» i TAA «Mika Chołdynh». Taksama pobač ź imi žyvie i zajmajecca biznesam u śfiery handlu ichni brat Maren Hranc, jaki źjaŭlajecca ŭłaśnikam TAA «Mah-Intier».
Artur Hranc — kancavy bienieficyjar 12 ukrainskich kampanij, niekatoryja ź jakich zarehistravanyja na Kipry, jak miarkujuć aktyvisty, «dla paźbiahańnia padatkaŭ i vyvadu hrošaj, atrymanych ad realizacyi złačynnych schiem».
U 2020 hodzie praz adnu z takich kampanij Artur Hranc staŭ ułaśnikam ukrainskaha časopisa Forbes.
Na padstavie svaich materyjałaŭ arhanizacyja źviarnułasia ŭ niekalki ŭkrainskich sudoŭ z patrabavańniem pravieści pravierku «niezakonnaha afarmleńnia» prodažu tytuniovych vyrabaŭ i ałkaholnych napojaŭ na asobaŭ, jakija pierasiakali miažu ŭ kirunku jeŭrapiejskich krain.
Artur Hranc naradziŭsia va Ukrainie. Paśla raspadu SSSR jahonyja baćki pierajechali ŭ Biełaruś, dzie jon skončyŭ Biełaruski dziaržaŭny ŭniviersitet.
Va Ukrainie jon žyŭ na padstavie dazvołu na žycharstva, ale ŭ 2021 hodzie vyjechaŭ z Ukrainy ŭ Ispaniju, dzie ŭ jaho jość nieruchomaść.
Pavodle ŭkrainskich ŚMI, Artur Hranc maje reputacyju paśpiachovaha i ŭstojlivaha biznesoŭca. Jon nie kamientavaŭ publična takija abvinavačańni.
Jak Śviata-Jelisaviecinski žanočy manastyr pieratvaryŭsia ŭ sapraŭdny biznes-chołdynh
Što saboj ujaŭlaje i z kaho składajecca sietka rasiejskaha ŭpłyvu ŭ Biełarusi