Raskazvajem, chto taja 50-hadovaja minčanka Aksana, jakuju zatrymali pa viartańni z Polščy
Hubazikaŭcy nazyvajuć jaje administratarkaj čata biełarusaŭ Kališa, ale hetamu niama paćvierdžańniaŭ.
26.07.2024 / 07:00
Aksana Nachajka. Fota ź jaje staronki Ukantakcie
Dziakujučy prajektu DIT my vyśvietlili, što zatrymanuju kličuć Aksana Nachajka. Jon 50 hodaŭ, jana rodam ź Minska. Nachajka doŭha pracavała biblijatekaram u Nacyjanalnaj biblijatecy, paśla ŭ strachavych kampanijach i turfirmach.
Nieviadoma, kali jana pierajechała ŭ Polšču, ale ŭ čat «Biełarusy Kališa» ŭstupiła ŭ śniežni 2023-ha. Viadoma, što ŭ polskim horadzie Kališ jana pracavała ŭ nievialikaj kramie.
Aksana vielmi aktyŭnaja: udzielničaje ŭ kvizach i mierapryjemstvach, lubić doŭhija vandroŭki i viełamarafony. Toje samaje jana pisała i ŭ čacie — raspaviadała pra toje, kudy možna schadzić u horadzie i sprabavała dapamahčy biełarusam u ich patrebach.
Aksana Nachajka padčas viełamarafona. Fota ź jaje staronki Ukantakcie
Adznačym, što ŭ čacie nie abmiarkoŭvajucca palityčnyja naviny i heta adznačana ŭ praviłach. Usia «palityka» adtul vydalałasia. Ale heta nie abaraniła Aksanu ad zatrymańnia.
U videa HUBAZiK Nachajka kaža, što «była administrataram čata «Biełarusy Kališa»». My nie viedajem, ci heta praŭda, hubazikaŭcy nie publikujuć anijakich dokazaŭ. U toj ža čas Nachajka ŭ čacie pisała ad siabie, a administratar pisaŭ ad akaŭnta čata. Pry hetym u telehramie možna naznačyć čałavieka «administrataram» dziela taho, kab dadać jamu podpis u samim čacie i nie davać administratarskich pravoŭ.
U samim čacie ŭ najlepšyja časy było 60 čałaviek, ale, zrazumieła, ciapier častka ludziej vyjšła adtul.
Nieviadoma, što ciapier z Aksanaj i ŭ čym jaje vinavaciać.
Što novaha praviarajuć u telefonach na miažy pry viartańni ŭ Biełaruś