Stała viadoma imia i zahuły rasijskaha «šef-kuchara», jaki byŭ nasamreč ahientam
Byłaja zorka realici-šou pracavaŭ na FSB. A jahony rodny brat — u inšym špijonskim hniaździe — Parłamienckim schodzie Sajuza Biełarusi i Rasii.
26.07.2024 / 13:55
Kirył Hraznoŭ. Fota: kirillgryaznoff / instagram
Le Monde nazvała imia rasijskaha špijona, jakoha abvinavačvajuć u sprobie «destabilizavać» Alimpijskija hulni ŭ Paryžy. Heta 40-hadovy Kirył Hraznoŭ.
Žurnalisty vyśvietlili, što mužčyna zakončyŭ paryžskuju kulinarnuju škołu Le Cordon Bleu, braŭ udzieł u kulinarnym realici-šou na rasijskim telebačańni. A taksama ŭ prajekcie «Vybiery mianie» na telekanale «Domašnij», dzie za jaho zmahalisia šeść dziaŭčat.
Na svajoj staroncy ŭ instahram mužčyna paznačyŭ siabie ŭ jakaści kulinara ŭ «Dačnym adkazie» — pieradačy, jakaja idzie na NTV. Pry hetym na jahonuju staronku ŭ hetaj sacyjalnaj sietcy padpisana ŭsiaho 10,4 tysiač čałaviek, što dla Rasii niašmat. A pasty źbirajuć dzsiatki i sotni, ale nie miljony łajckaŭ.
U adnym z svaich pastoŭ mužčyna nazyvaje siabie «realnym pacanom ź Piermi», u inšym udakładniaje, što pražyŭ u hetym horadzie dvaccać hadoŭ.
Apošnija zdymki ŭ svaim profili Hraznoŭ raźmiaściŭ amal dziesiać miesiacaŭ nazad. Heta fota ź jaho viasiella.
Kirył Hraznoŭ i jaho abrańnica. Fota: kirillgryaznoff / instagram
Jak piša francuzskaje vydańnie, Kirył Hraznoŭ nikoli nie raskazvaŭ svaim francuzskim siabram ni ab svajoj raniejšaj karjery ŭ śfiery finansaŭ u jakaści jurysta ŭ rasijskim inviestycyjnym fondzie, ni ab pracy ŭ firmie pa źlićci i pahłynańni ŭ Luksiemburhu. Tym bolš ab svajoj misii ad imia Fiederalnaj słužby biaśpieki (FSB).
Aficyjna Hraznoŭ trapiŭ u fokus uvahi niekalkich jeŭrapiejskich śpiecsłužbaŭ u mai 2024 hoda. Ale mnohaje pakazvaje, što jaho raskusili šmat hadoŭ nazad.
Šerah ekskluziŭnych dakumientaŭ, atrymanych Le Monde, Der Spiegel i The Insider, dazvalajuć sapraŭdy prasačyć padarožža hetaha ahienta ŭ Francyju i pralić śviatło na ciesnyja suviazi, jakija jon doŭhi čas padtrymlivaŭ z rasijskaj raźviedkaj.
Jak piša The Insider, u mai Hraznoŭ mieŭ vylecieć sa Stambuła ŭ Paryž. Ale tak napiŭsia, što ŭ Stambule jaho nie tolki nie pasadzili na samalot, ale i zanieśli ŭ čorny śpis.
Na taksi mužčyna pajechaŭ u Bałharyju. Tam jon znoŭ napiŭsia i pačaŭ raskazvać vypadkovym ludziam ab tym, što ŭ Paryž adpraviŭsia nie prosta tak, a z sakretnym zadańniem.
Vidavočcy, jakija paźniej paviedamili ab padazronym čałavieku palicyi, zhadvajuć, što Hraznoŭ pahražaŭ «Jany nadoŭha zapomniać hetuju Alimpijadu!», nie tłumačačy što maje na ŭvazie kankretna.
Sprabujučy dakazać svaju prynaležnaść da śpiecsłužbaŭ, mužčyna tros niejkim paśviedčańniem. Śviedki zhadvajuć, što čuli, jak Hraznoŭ telefanavaŭ kamuści i davaŭ spravazdaču, što naniaŭ dla zadańnia jašče adnaho małdavanina z Kišyniova i ŭsio idzie pa płanie.
Skryn staronki Kiryła Hraznova ŭ instahram
Suviazi sa śpiecsłužbami
Žurnalisckaje rasśledavańnie pakazała, što Hraznoŭ maje daŭnija suviazi sa śpiecsłužbami.
Le Monde raskazvaje ab elektronnych listach, jakija ŭ 2009-2010 hadach małady na toj čas dypłamavany juryst luksiemburžskaj firmy atrymlivaŭ na svoj adras. Jaho prasili pravieryć ankiety niekatorych rasijskich raźviedčykaŭ. Adno z takich paviedamleńniaŭ jon pierasłaŭ pa elektronnaj pošcie vysokapastaŭlenamu supracoŭniku HRU, imia jakoha vydańnie nie nazyvaje.
U toj ža čas, jak piša vydańnie, vypusknik jurydyčnaha fakulteta Piermskaha ŭniviersiteta zbliziŭsia z členam pałaty łordaŭ Vialikabrytanii Robiertam Skidelskim — brytanskim ekanamistam ź jaŭrejskimi litvackimi karaniami. U 2016—2021 hadach brytanski łord byŭ členam rady dyrektaraŭ «Rasnafty». U 2023 hodzie stanuć viadomy jaho suviazi z rasijskimi aliharchami.
Adpaviedna z dakumientam, ź jakimi aznajomilisia žurnalisty, u 2019 hodzie bilet na samalot z Paryža ŭ Maskvu dla Hraznova byŭ nabyty Uładzimiram Bandarčukom, jaki, pa mienšaj miery da 2000 hoda byŭ hałoŭnym inśpiektaram Kantrolnaj słužby FSB (vajskovaja častka 53916).
Žurnalisty źviartajuć uvahu, što svaimi dobrymi suviaziami ź śpiecsłužbami Kirył Hraznoŭ moža być udziačny bratu Dźmitryju, jaki zajmaje pasadu načalnika Hałoŭnaha ŭpraŭleńnia pravavoha i dakumientacyjnaha zabieśpiačeńnia Parłamienckaha schodu Sajuznaj dziaržavy — jašče adnaho špijonskaha hniazda rasijskaj ahientury.
Pa słovach partniora Le Monde va Uschodniaj Jeŭropie, Kiryła Hraznova i jaho brata ŭ Rasii vaziŭ toj ža kiroŭca, što i Andreja Čakanava, ahienta HRU, jaki ciapier zajmaje pasadu načalnika hałoŭnaha ŭpraŭleńnia ŭ aparacie kiraŭnictva Parłamienckaha schodu.
Zvyčajnyja znajomyja Hraznova ŭ Francyi i Luksiemburzie ničoha nie padazravali.
Lie Monde pryvodzić słovy adnaho z francuzskich znajomych Kiryła Hraznova: «U stanie ałkaholnaha apjanieńnia jon moža kazać łuchtu, jak i ŭsie astatnija. … Ale jon sapraŭdny kuchar, heta moža paćvierdzić luby, navat kali jon hatuje sabie łokšynu chutkaha pryhatavańnia».
A taksama słovy siabroŭki mužčyny, jakija byli skazany za niekalki hadoŭ da jaho zatrymańnia: «Tvaja prablema z ałkaholem u kančatkovym vyniku budzie kaštavać tabie vielmi doraha».
Rasijanina abvinavačvajuć u sprobie destabilizacyi padčas Alimpijady