Padsankcyjnyja luksavyja aŭto ŭrastajuć u ziamlu ŭ łatvijskaj vioscy na miažy ź Biełaruśsiu. Siarod ich jość navat «Majbach»
Pryniaty miesiac tamu novy pakiet sankcyj kančatkova zakryŭ darohu ŭ Biełaruś mašynam z abjomam ruchavika bolšym za 1,9 litra. Pahladzicie, jakija aŭto zachraśli na padvorku pryhraničnaj łatvijskaj vioski.
29.07.2024 / 17:45
Fota: telehram-kanał «Bolšoj avtobłoh/Sweet Car»
Maybach, Gelentwagen i nie tolki
U telehram-kanale «Bolšoj avtobłoh/Sweet Car» apublikavali fota i videa z padvorku ŭ łatvijskaj vioscy, jakaja znachodzicca niepadalok ad Biełarusi.
Aŭtar videa nazyvaje premijalnyja aŭto na tranzitnych numarach «zabrošankami».
Na videa možna ŭbačyć niekalki lehkavušak BMW, siarod jakich jość premijalny siedan 7-sieryi. Mašyny pryparkavanyja prosta pobač ź ciaplicami.
Taksama jość pazadarožniki BMW X7, Mercedes-Benz GLE i Mercedes-Benz G500 (u narodzie «hielik») i navat adzin Maybach GLS. Usiaho na padvorku možna naličyć kala 10 aŭto, jakija dahetul zastajucca ŭ Łatvii.
Fota: telehram-kanał «Bolšoj avtobłoh/Sweet Car»
Adznačym, što haspadaram hetych aŭto pašancavała kudy bolš, čym ułaśnikam niekalkich dziasiatkaŭ mašyn, jakija łatvijskaja mytnia zatrymała pry sprobie vyjechać na ich u Biełaruś.
Pavodle infarmacyi telekanała «Nastojaŝieje Vriemia. Bałtija», łatvijskaja mytnia zatrymała kala 40 aŭtamabilaŭ, bo mieła padazreńni, što kančatkovy punkt pryznačeńnia hetych aŭto nie Biełaruś, a Rasija. Kali padčas dadatkovaj pahłyblenaj pravierki budzie dakazana, što byli parušany sankcyi, to hetyja aŭtamabili mohuć kanfiskavać.
Placoŭka na łatvijskaj mytni, na jakoj zachoŭvajucca aŭtamabili, jakija čakajuć na dadatkovuju pravierku. Fota: skrynšot ź videa.
Nahadajem, što Łatvija zastavałasia apošniaj krainaj ES, što vypuskała praz svaju miažu aŭtamabili ŭ Biełaruś, jakija znachodzilisia pad sankcyjami ŭ Rasii. Pieršaj ekspart takich aŭto ŭ Biełaruś faktyčna zabaranili Polšča, a zatym Litva.
Raniej vialikuju kolkaść premijalnych aŭto, jakija tak i nie trapili ŭ Biełaruś, błohiery zaśniali na litoŭskim viaskovym padvorku na miažy ź Biełaruśsiu, a taksama na parkoŭcy rynku «Harunaj» u Vilni.