Admianili palaŭničy fiestyval, jaki źbiralisia pravieści ŭpieršyniu
Pieršy nacyjanalny palaŭničy fiestyval, zapłanavany na siaredzinu žniŭnia, admianili. Praviadzieńnie maštabnaha mierapryjemstva pieraniesiena na 2025 hod pa pryčynie likvidacyi arhanizacyjami lasnoj haspadarki nastupstvaŭ maštabnych burałomaŭ.
29.07.2024 / 19:57
Zdymak ilustracyjny. Fota: Wikimedia Commons
Nacyjanalny palaŭničy fiestyval źbiralisia ŭpieršyniu pravieści ŭ Biełarusi z 16 pa 18 žniŭnia 2024 hoda. Forum pavinien byŭ prajści na terytoryi dziaržaŭnaj pryrodaachoŭnaj ustanovy «Respublikanski łandšaftny zakaźnik «Nalibocki».
Arhanizatarami fiestyvalu byli zajaŭlenyja Ministerstva lasnoj haspadarki, RDHA «Biełaruskaje tavarystva palaŭničych i rybałovaŭ», RUP «Biełdziaržpalavańnie».
U anonsie mierapryjemstva zajaŭlałasia, što novy maštabny palaŭničy fiestyval arhanizavany kamandaj prafiesijanałaŭ. Jany abiacali, što achvotnyja atrymajuć zarad emocyj, pasprabujuć svaje siły i prademanstrujuć umieńni ŭ roznych aktyŭnaściach. Siarod inšaha ŭ prahramie forumu značylisia śviatočny kancert i dyskateka, a na zakančeńnie prapanoŭvałasia pahladzieć malaŭničy fiejervierk.
Adnak mienš čym za try tydni da daty fiestyvalu Minlashas abviaściŭ ab admienie forumu. U jakaści pryčyny dla pryniaćcia takoha rašeńnia ŭ ministerstvie nazvali likvidacyju nastupstvaŭ maštabnych burałomaŭ.
«Usie siły i resursy haliny ciapier skancentravanyja na raspracoŭcy vietravalna-burałomnych lesasiek. Niepahadź tolki dadaje pracy lesavodam. Ludzi i technika pracujuć u režymie non-stop», — paviedamili ŭ Minlashasie.
Tam adznačyli, što admienienyja i inšyja kulturna-masavyja mierapryjemstvy, arhanizavanyja pradpryjemstvami lasnoj haspadarki. Usie jany, jak i pieršy nacyjanalny palaŭničy fiestyval, płanavalisia ŭ žniŭni.
Ciapier maštabny forum abiacajuć pravieści ŭ 2025 hodzie.
Ad novaha razhułu niepahadzi ŭ Biełarusi paciarpieli dva čałavieki — MNS
U Biełarusi z-za ŭrahanu zahinuli siem čałaviek
Zamiest SMS — vyćcio siren. MNS choča pamianiać sistemu apaviaščeńnia padčas niepahadzi
Minlashas zaklikaŭ biełarusaŭ najbližejšymi tydniami nie chadzić u hryby
Łukašenka vyznačyŭ dedłajny dla likvidacyi nastupstvaŭ urahanu