Machlary ź Minska atrymali asabistyja danyja biełarusa i rabili falšyvyja zaprašeńni na vizy. Prablema moža być hłabalnaj
Biełarus aformiŭ zaprašeńnie na vizu dla svajoj siastry ŭ vajavody. Ale praz paŭhoda atrymaŭ paviedamleńnie ad nieznajomaj jamu dziaŭčyny: vyjaviłasia, što nieviadomyja ad imia mužčyny rabili zaprašeńni dla ŭjezdu ŭ Polšču, piša Most.
30.07.2024 / 17:33
Mužčyna dzivicca: jak jahonyja źviestki mahli apynucca ŭ machlaroŭ i jak šmat lipavych dakumientaŭ tyja paśpieli zrabić.
«Ja ŭ asadku — jana advaliła amal 1000 u. a. za fejkavuju papierku»
Uzimku biełarus zrabiŭ zaprašeńnie dla svajoj siastry. Kab atrymać dakumient, mužčyna źviarnuŭsia da vajavody. Praz paŭhoda paśla afarmleńnia dakumientaŭ jon atrymaŭ niezvyčajnaje paviedamleńnie ad nieznajomaj dziaŭčyny, taja napisała jamu ŭ Telegram.
— Vy mnie zrabili zaprašeńnie, i mnie admovili ŭ vizie, ci možna padać na apielacyju, — pracytavaŭ paviedamleńnie nieznajomki mužčyna. — Ja ŭ asadku — słova za słova i vyśvietliłasia: ad majho imia z maimi danymi joj i jaje mužu zrabili zaprašeńni.
Akazałasia, što dakumientami zajmałasia «minskaja kantora». Dziaŭčyna padała fota zaprašeńniaŭ — tam byli ŭkazany asabistyja źviestki mužčyny i jaho kantakty.
— Jana napisała budučy ŭ poŭnaj upeŭnienaści, što zaprašeńnie sapraŭdnaje. Advaliła amal 1000 u. a.za hetuju fejkavuju papierku, — ździŭlajecca mužčyna.
Jon padzialiŭsia historyjaj u adnoj z emihranckich hrup u Facebook i pacikaviŭsia, što jamu rabić.
— Ja znachodžusia ŭ Polščy. Što ja mahu zrabić, kudy źviartacca? Bajusia ŭjavić, kolki ŭ vyniku čałaviek zmahło zrabić vizy pa takich fejkavych papierkach, — dadaŭ jon.
Mierkavańni kamientataraŭ padzialilisia. Adnyja prapanavali raskručvać schiemu ź nieznajomaj dziaŭčynaj. Inšyja zadalisia pytańniem, ci nie źliŭ vajavoda źviestki biełarusa.
Krynica: «Z užonda była ŭciečka danych mienavita biełarusaŭ»
Žurnalist Most źviazaŭsia sa śpiecyjalistam, jaki dapamahaje biełarusam afarmlać vizy, i paprasiŭ prakamientavać situacyju.
— Ja viedaju, što zusim niadaŭna byŭ surjozny vizavy skandał. Pa-pieršaje, padrablalisia piačatki ŭžonda: prosta rabiłasia bałvanka i staviŭsia «podpis inśpiektara» — kručok — heta ad bałdy rabiłasia, — zajaviła krynica.
— Pa-druhoje, z užonda była ŭciečka danych ludziej — heta tyčyłasia mienavita biełarusaŭ sa stałym pabytam i hramadzianstvam.
Krynica adznačyła, što ŭ padobnych situacyjach adziny mahčymy sposab prakantralavać situacyju — źviarnucca ŭ kancylaryju užonda i ŭdakładnić, ci zamaŭlałasia na vaša imia zaprašeńnie.
Pakarać machlaroŭ budzie składana, ličyć surazmoŭca. U pieršuju čarhu pad udar trapić nie kantora, a ich klijenty, jakim usio ž udałosia atrymać vizy.
— Pa jaho fejkavaj papiercy mahli zrabić 15 viz, uziaŭšy za heta nieviadoma kolki hrošaj. Kali jon [aŭtar publikacyi ŭ fejsbuk-hrupie] ciapier vyniesie heta palakam, to, naturalna, pamiežniki mohuć pravieryć tyja zaprašeńni. U vyniku ludzi atrymajuć anulacyju i departacyju — trapiać u čorny śpis. Zrazumieła, što čałaviek choča, kab spraviadlivaść pieramahła, ale jon moža naškodzić ni ŭ čym nie vinavatym ludziam.
Na dumku krynicy, i sama biełaruska stała achviaraj minskich machlaroŭ.
— Heta prosta čałaviek, jaki kupiŭ lipavaje zaprašeńnie, — adznačyŭ surazmoŭca. — Dziaŭčyna dakładna nie razvodziła, jana prosta znajšła ŭ dakumiencie kantakt asoby, jakaja zaprašała, i źviazałasia ź joj.
Pryčym admova była źviazanaja nie z padroblenym štampam abo podpisam, «palaki ciapier admaŭlajuć prosta tak u vizach», — dadała krynica.
Vienhryja? Italija? Ci Hrecyja? Dzie možna chutka i lohka aformić šenhienskuju vizu
Jeŭrakamisija zapatrabavała ad Vienhryi rastłumačyć spraščeńnie ŭjezdu dla rasijanaŭ i biełarusaŭ
Ruki dryžać, ślozy ljucca: novy trend biełaruskaha tyktoku — raspakoŭka vizy
«Jany kruhłasutačna stajać?» Na Niamizie ludzi vystrailisia ŭ ahramieznuju čarhu — voś navošta VIDEA