Mahiloŭskim žurnalistam Sabaleŭskamu i Hłuškovu dali kałoniju i bujnyja štrafy
Žurnalista Alesia Sabaleŭskaha i videaapieratara Jaŭhiena Hłuškova vinavacili va ŭdziele u ekstremisckim i ŭzbrojenym farmavańniach. 31 lipienia prahučaŭ prysud, piša BAŽ.
01.08.2024 / 07:07
Jaŭhien Hłuškoŭ i Aleś Sabaleŭski. Fota: BAŽ
Alesiu Sabaleŭskamu prysudzili 4 hady źniavoleńnia ŭ kałonii, Jaŭhienu Hłuškovu — 3 hady.
Taksama abodvum pryznačanyja vialikija štrafy — kožnamu pa 200 bazavych vieličyń (heta značyć, pa 8 000 rubloŭ). Spravu raźbiraŭ sudździa Mahiloŭskaha abłasnoha suda Dźmitryj Krenžyjeŭski.
Alesia Sabaleŭskaha i Jaŭhiena Hłuškova sudzili pavodle dvuch artykułaŭ Kryminalnaha kodeksa:
— častak 1 i 3 artykuła 361—1 KK (stvareńnie ekstremisckaha farmiravańnia albo ŭdzieł u im),
— častki 1 artykuła 361—3 KK (udzieł na terytoryi zamiežnaj dziaržavy va ŭzbrojenym farmiravańni abo ŭzbrojenym kanflikcie, vajskovych dziejańniach, viarboŭka abo padrychtoŭka da takoha ŭdziełu).
Abodva žurnalisty pryznanyja palityčnymi viaźniami.
Z čaho ŭsio pačałosia?
Žurnalista i błohiera Alesia Sabaleŭskaha zatrymali 12 śniežnia 2023 hoda. Na nastupny dzień sud Kastryčnickaha rajona Mahilova pryznačyŭ jamu administracyjnaha aryšt na 10 sutak. Užo ŭ izalatary časovaha ŭtrymańnia adbyŭsia druhi administracyjny sud, žurnalistu iznoŭ pryznačyli aryšt, źvinavaciŭšy ŭ «raspaŭsiudzie ekstremisckaj pradukcyi» (č. 2 art. 19.11 KaAP). Ale i paśla druhoha aryštu na volu Sabaleŭski nie vyjšaŭ: na pačatku studzienia 2024 hoda jaho pieraviali ŭ śledčy izalatar pry turmie № 4.
Pavodle infarmacyi ad tych, chto znachodziŭsia ŭ adnoj kamiery z Sabaleŭskim u izalatary časovaha ŭtrymańnia, žurnalista źbivali padčas dopytu supracoŭniki HUBAZiK. Na jahonym ciele doŭhi čas byli vidać ślady katavańnia. Takim čynam vymahalisia pryznańni ŭ tym, što jon supracoŭničaŭ z redakcyjaj 6tv.by — vydańniem, jakoje 29 listapada minułaha hoda było pryznana «ekstremisckim farmavańniem». Na momant zatrymańnia Aleś Sabaleŭski nie supracoŭničaŭ sa ŚMI — jon adyšoŭ ad žurnalistyki i pracavaŭ u śfiery pasłuh.
Videapieratar-fryłansier Jaŭhien Hłuškoŭ byŭ zatrymany na pačatku studzienia 2024 hoda. Pakolki jon žyŭ adzin, to pra jaho zatrymańnie stała viadoma nie adrazu — znajomyja raspačali pošuki, kali zrazumieli, što jon užo niekalki dzion nie vychodzić na suviaź. Niekatory čas paśla zatrymańnia Hłuškova ŭtrymlivali ŭ IČU, a potym pieraviali ŭ śledčy izalatar pry turmie № 4.
Jaŭhien Hłuškoŭ šmat hadoŭ pracavaŭ na mahiloŭskim haradskim telebačańni, na pačatku 2000‑ch supracoŭničaŭ ź niekalkimi haradskimi partałami. Ale apošnim časam nijakaj hramadskaj ci žurnalisckaj dziejnaściu nie zajmaŭsia i vioŭ davoli zamkniony ład žyćcia.
Padrabiaznaści spravy, dzie fihurantam źjaŭlajecca videaapieratar-fryłansier Jaŭhien Hłuškoŭ, stali viadomyja ź videa, što raźmiaściŭ u svajoj stužcy blizki da mahiloŭskich milicejskich struktur telehram-kanał. U tak zvanym «prymusova-pakajalnym» videa zatrymany kaža, što z 2017 hoda supracoŭničaŭ ź internet-resursam 6tv.by, pryznanym u Biełarusi «ekstremisckim farmavańniem».