Čatyry sposaby viarboŭki ludziej za miažoj, jakija vykarystoŭvajuć biełaruskija śpiecsłužby
«Biełpoł» vypuściŭ novaje videa, u jakim raskazvaje pra mietady viarboŭki tych, chto źjechaŭ za miažu, i daje parady, jak pavodzić siabie ŭ padobnych situacyjach.
01.08.2024 / 20:34
Ilustracyjnaje fota. Krynica: Getty Images
Pryciahnieńnie da supracoŭnictva praz svajakoŭ, siabroŭ i znajomych u Biełarusi
Siabroŭ i svajakoŭ u Biełarusi śpiecsłužby spačatku psichałahična apracoŭvajuć, a paśla prosiać źviazacca z čałaviekam za miažoj, jakoha chočuć zavierbavać, i raskazać jamu pra tak zvanuju prahramu «Daroha dadomu», dać kantakty pradstaŭnika śpiecsłužbaŭ i pierakanać źviazacca ź imi.
Kali čałaviek vychodzić na kantakt z pradstaŭnikom śpiecsłužbaŭ, jamu harantujuć vyrašyć usie pytańni pry viartańni ŭ Biełaruś. Ale heta nie vykonvajecca.
Taksama čałavieka mohuć paprasić vykanać nieskładanyja i byccam by biaskryŭdnyja daručeńni — pieradać ahulnaviadomuju infarmacyju. Naprykład, paviedamić danyja pradstaŭnika demsił, adrasy ofisaŭ biełaruskaj apazicyi, raskazać pra mierapryjemstvy.
Takim čynam vykarystoŭvajecca mietodyka pastupovaha ŭciahvańnia ŭ supracu. Zatym zadačy ŭskładniajucca. Ale čałavieku ŭžo prablematyčna ad ich admovicca, bo ŭ śpiecsłužbaŭ jość na jaho kampramat. Taksama mohuć cisnuć praź biaśpieku blizkich ludziej, jakija znachodziacca ŭ Biełarusi.
U takoj situacyi «Biełpoł» rekamienduje nastupnaje.
Pa-pieršaje, nielha vieryć tamu, što vam kažuć pradstaŭniki śpiecsłužbaŭ.
Pa-druhoje, nie treba sprabavać samastojna hulać u apieratyŭnyja hulni. U vas nie atrymajecca doŭha ašukvać śpiecsłužby i ŭchilacca ad ich zadańniaŭ. U vyniku možna pahoršyć stanovišča svaich blizkich. Lepš adrazu admovicca ad kantaktaŭ z pradstaŭnikami śpiecsłužbaŭ.
Pa-treciaje: kali vyšejapisanaja situacyja adbyłasia, nieabchodna acanić ryzyki dla svaich znajomych, jakija zastalisia ŭ Biełarusi, i pastaracca chutka pryniać rašeńnie.
Viarboŭka praz kantakty za miažoj
Pry hetym sposabie zvyčajna pracuje mietodyka vykarystańnia ŭciomnuju. Jaje sutnaść u prośbach niby asabistaha, bytavoha charaktaru ad znajomych pa pracy, vučoby, miescy žycharstva. Naprykład, padvieźci kudyści na aŭtamabili, pačakać i advieźci nazad, pieradać nieznajomym ludziam niejkija pradmiety, dakumienty, hrošy ci zabrać ad ich.
Hetyja prośby tłumačacca vyrašeńniem pracoŭnych abo asabistych pytańniaŭ. Nasamreč hetyja dziejańni mohuć vykonvacca ŭ intaresach śpiecsłužbaŭ. Pry hetym pieradača hrošaj, pasyłak, nośbitaŭ infarmacyi adbyvajecca nie tolki na terytoryi adnaho horada ci krainy, ale i pamiž dziaržavami.
Za akazańnie takich pasłuh niaredka prapanujuć uznaharodu. Potym mohuć być i bolš składanyja zadańni. Heta značyć, znoŭ pracuje mietodyka pastupovaha pryciahnieńnia da supracoŭnictva.
Biełpołaŭcy zaŭvažajuć, što na fłešcy mohuć być fota vajskovych abjektaŭ abo sakretnaja infarmacyja, a hrošy mohuć pieradavacca dla ahientury za špijonskuju dziejnaść.
U takim vypadku asoba, jakuju vykarystoŭvali ŭciomnuju, moža paźbiehnuć kryminalnaha pakarańnia, ale padčas śledstva na šmat miesiacaŭ apyniecca pad aryštam.
Kab nie trapić u padobnuju situacyju, «Biełpoł» kateharyčna nie rekamienduje vykonvać takoha rodu daručeńni ad małaznajomych ludziej.
Viarboŭka pad čužym ściaham
Sutnaść hetaha mietadu ŭ tym, što čałavieku prapanuje supracoŭnictva viadomaja arhanizacyja ci ŭstanova. Prapanujecca padpisać damovu ab vykanańni peŭnych vidaŭ rabot. Nasamreč ad imia takoj arhanizacyi moža dziejničać pradstaŭnik śpiecsłužbaŭ.
Dla taho, kab nie trapić u takuju situacyju, biełpołaŭcy rekamiendujuć vieryfikavać svaje kantakty i acanić zakonnaść prapanovy. Pierad tym, jak dać svaju zhodu, varta ŭdakładnić danyja i słužbovaje stanovišča asoby, jakaja da vas źviarnułasia, pravieryć, ci isnuje taki čałaviek uvohule, jak jon źniešnie vyhladaje, jakoje jaho koła zadač i paŭnamoctvaŭ.
Padtrymlivać suviaź ź im nieabchodna praz aficyjnyja kantakty arhanizacyi, ad imia jakich jany vystupajuć.
Kali havorka idzie pra pieraličeńnie hrošaj za niejkuju pracu, to pracoŭnyja adnosiny pavinny być aformlenyja dakumientalna, a z atrymanych sum vypłačanyja padatki.
Viarboŭka praź miesiendžary
Čałavieku, jaki znachodzicca za miažoj, ź nieznajomaha elektronnaha adrasu ci praź miesiendžar pastupaje zapyt na pierapisku. Surazmoŭca nazyvaje imia i pradstaŭlajecca suajčyńnikam ci ziemlakom, raskazvaje, što źviarnuŭsia da jaho pa rekamiendacyi ahulnych znajomych.
Potym prosić dapamahčy vyrašyć niekatoryja pytańni za hrošy. Viedamstva, jakoje pradstaŭlaje surazmoŭca, abo ahulnych znajomych viarboŭščyk nie nazyvaje. Na ŭdakładniajučyja pytańni, chto jon taki, uchilajecca ad adkazu.
Prośby byvajuć roznyja — ad razdačy ahitacyjnych ulotak abo naniasieńnia pravakacyjnych nadpisaŭ da ździajśnieńnia dyviersij, napadaŭ na palityčnych i hramadskich aktyvistaŭ.
Prapanujuć hrašovuju ŭznaharodu ŭ zaležnaści ad vykananaha daručeńnia — ad dziasiatkaŭ da sotniaŭ tysiač jeŭra.
«Biełpoł» rekamienduje zadakumientavać sproby viarboŭki, zachavać elektronnuju pierapisku, uziać čas na rozdum i źviarnucca z aficyjnaj zajavaj va ŭpaŭnavažanyja struktury ŭ krainie znachodžańnia i ŭ dalejšym dziejničać zhodna ź instrukcyjami pradstaŭnikoŭ kampietentnych dziaržaŭnych orhanaŭ, u jakija vy źviarnulisia.
Razam z tym «Biełpoł» adznačaje: nie treba ŭpadać u krajnaści i bačyć ahienta ŭ lubym čałavieku.
Jak vyznačyć ahienta ŭ svaim atačeńni
«Čekist», vieteran ci špijon HUR? Mahčyma, u Polščy vykryli jašče adnaho ahienta biełaruskaha KDB