На найбуйнейшым у свеце фестывалі мастацтваў прэзентавалі арт-інсталяцыю ў гонар беларускіх палітвязняў
Да 26 жніўня ў сталіцы Шатландыі Эдынбургу ў рамках найбуйнейшага фестывалю мастацтваў Fringe дэманструецца мастацкая інсталяцыя «Галасы, якія праціскаюцца скрозь краты» з імёнамі больш за 1400 беларускіх палітвязьняў, паведамляе Радыё Свабода са спасылкай на нямецка-швейцарская праваабарончую арганізацыю Libereco.
03.08.2024 / 15:10
Libereco.org
У двары Summerhall імёны больш за 1400 палітвязняў вывесілі на асобных таблічках на англійскай і беларускай мовах.
«Гэтая экспазіцыя, якая займае амаль 50 квадратных метраў, паказвае маштабы палітычнага прыгнёту ў Беларусі, паколькі кожная таблічка сімвалізуе гады турэмнага зняволення, страчаныя надзеі, дэпрэсію, дрэннае здароўе і зламаныя жыцці столькіх нявінных людзей. Але яна таксама сымбалізуе мужнасць і непадпарадкаванне тысяч беларусаў, якія не паддаліся спробам рэжыму Лукашэнкі прымусіць людзей замаўчаць і спыніць любое іншадумства», — паведамляе Libereco.
У будынку Summerhall на адной са сценаў таксама выставілі 15 рэпрадукцый малюнкаў беларускіх палітвязняў, якія тыя даслалі з турмы сваім сем’ям і блізкім.
Эдынбургскі фестываль мастацтваў Fringe лічыцца найбуйнейшым фестывалем мастацтваў у свеце. На працягу трох тыдняў жніўня горад Эдынбург вітае творцаў з усяго свету ў розных відах мастацтваў — тэатр, танцы, цырк, кабарэ, дзіцячыя шоу, мюзіклы, опэра, музыка і інш.
Сёлета ў фэстывалі Fringe, які праходзіць 2-26 жніўня, удзельнічаюць прадстаўнікі 58 розных краін.