Vučonyja znajšli tanny i naturalny srodak ad abłysieńnia
Jaho krynica znachodzicca ŭ arhaniźmie čałavieka i nie vyklikaje pabočnych efiektaŭ.
09.08.2024 / 22:33
Ilustracyjnaje fota: vecteezy.com
Jak piša Science Focus, hrupa vučonych z Univiersiteta Šefiłda i Univiersiteta COMSATS u Pakistanie vypadkova vyjaviła novy mietad lačeńnia spadčynnaha typu abłysieńnia, jaki źjaŭlajecca najbolš raspaŭsiudžanym u śviecie.
Vučonyja daśledavali ŭpłyŭ monacukrydu dezaksirybozy (2dDR), jakaja źjaŭlajecca častkaj DNK, na zahojvańnie ran. U čas dośledaŭ nad myšami aŭtary zaŭvažyli pabočny efiekt. Akramia paskoranaha hajeńnia ran na ŭčastkach skury, apracavanych hielem z dezaksirybozaj, naziraŭsia paskorany rost vałasoŭ.
Adznačany efiekt vučonyja źviazvajuć sa zdolnaściu hetaha monacukrydu sadziejničać utvareńniu novych kryvianosnych sasudaŭ, jakija pavialičvajuć prytok kryvi da vałasianych falikułaŭ, što vyklikaje rost vałasoŭ. Vyniki daśledavańnia apublikavanyja ŭ časopisie Frontiers in Pharmacology.
Aŭtary adznačajuć, što dla taho, kab daśledavać vyjaŭleny efiekt hłybiej, jany stvaryli madel straty vałasoŭ u myšej. Dla hetaha im rabili injekcyi testasteronu (viadoma, što jaho praźmiernaja kolkaść źjaŭlajecca naturalnaj pryčynaj abłysieńnia ŭ mužčyn), što vyklikała stratu poŭści. Zatym vučonyja rehularna nanosili hiel z dezaksirybozaj na skuru, jakaja była pazbaŭlenaja poŭści.
Ekśpierymient pakazaŭ, što paśla 21 dnia ŭžyvańnia hielu vałasianoje pokryva ŭ myšej z abłysieńniem pa mužčynskim typie adnaŭlałasia na 80-90%, što padobna pa efiektyŭnaści da najaŭnaha ciapier na rynku preparatu dla adnaŭleńnia vałasoŭ minaksidziła (minoxidil). Ale ŭ adroźnieńnie ad jaho, naturalny monacukryd nie maje pabočnych efiektaŭ kštałtu łuščeńnia skury, śvierbu ci piakoty.
Aŭtary adznačajuć, što daśledavańnie pakul znachodzicca na rańniaj stadyi, ale pieršyja vyniki źjaŭlajucca šmatabiacalnymi. Mahčyma, u budučyni źjavicca novy naturalny srodak dla stymulacyi rostu vałasoŭ nie tolki pry andrahiennaj ałapiecyi, ale i ŭ vypadku ich straty (u tym liku brovaŭ i viejkaŭ) z-za chimijaterapii.
Pamiž pažadaju i ahidaju: vałasy na ciele ŭ roznych kulturach i epochach
Čamu my łysiejem i što z hetym rabić — tłumačyć dermatołah
Apytali dziaŭčat, jak jany staviacca da mužčyn z łysinaj i załysinami. I pahavaryli z daktarami