Suśvietna viadomy bajec Chabib Nurmahamiedaŭ admoviŭsia padtrymać vajnu va Ukrainie — ciapier jaho atakuje Kreml
Eks-čempijon UFC admoviŭ kiraŭniku administracyi prezidenta, i dziaržava pačała kampaniju suprać byłoha narodnaha hieroja
06.08.2024 / 17:41
Uładzimir Pucin i Chabib Nurmahamiedaŭ. Skrynšot videa BBC
Dahiestanski bajec źmiešanych adzinaborstvaŭ Chabib Nurmahamiedaŭ — adzin z najviadomiejšych spartsmienaŭ śvietu. Za prafiesijnuju karjeru jon nie paciarpieŭ nivodnaj parazy, byŭ čempijonam UFC u lohkaj vazie, a jaho supraćstajańnie ź irłandcam Konaram Makhreharam było adnoj z samych miedyjnych padziej suśvietnaha sportu. U Rasii jon ličyŭsia narodnym hierojem, ź im asabista sustrakaŭsia Uładzimir Pucin.
Adnak paśla pačatku poŭnamaštabnaj vajny Rasii suprać Ukrainy adnosiny ź dziaržavaj u Nurmahamiedava razładzilisia. Jak vyśvietliła vydańnie «Projekt», heta źviazana ź jaho adkrytaj admovaj publična padtrymać vajnu.
Kreml spadziavaŭsia na padtrymku Nurmahamiedava ŭ pačatku poŭnamaštabnaha ŭvarvańnia va Ukrainu. Rodny dla Chabiba Dahiestan u pieršyja miesiacy vajny byŭ u lidarach pa kolkaści zahinułych, a vosieńniu 2023 hoda tam prajšli najbujniejšyja ŭ Rasii pratesty suprać mabilizacyi.
Tym nie mienš, za dva hady Chabib ni razu nie vykazaŭsia ŭ padtrymku vajny, choć jaho pra heta prasili niepasredna z administracyi prezidenta. U pieršyja miesiacy poŭnamaštabnaj vajny, kali Nurmahamiedaŭ znachodziŭsia ŭ Łos-Andželesie, jamu šmat razoŭ telefanavali z administracyi, u tym liku jaje kiraŭnik Anton Vajna i jahony pieršy namieśnik Siarhiej Kiryjenka.
Chabib praihnaravaŭ prośby z vysokich kabinietaŭ i publična nie padtrymaŭ vajnu. Zamiest hetaha jon pahavaryŭ pra mir va Ukrainie z Donaldam Trampam. Eks-prezident ZŠA raskazvaŭ pra hetuju razmovu tak:
«Chabib padyšoŭ da mianie paśla adnaho z bajoŭ MMA. Vy napeŭna skažacie, što jon adzin ź lepšych bajcoŭ u śviecie. Jon skazaŭ mnie: «Spadziajusia, vy zmožacie pieramahčy, tamu što my pavinny spynić vojny, spynić zabojstvy». Jon taki razumny, jon razumieje heta!.. Ja kažu pra Rasiju i Ukrainu. Tak šmat ludziej pamirajuć. I ja dumaju, heta vydatna, što Chabib padyšoŭ da mianie z hetym: «My pavinny spynić kanflikt».
U Kramli, pavodle źviestak «Projekta», hetaj razmovaj byli vielmi niezadavolenyja. Padstavaj dla pakazalnaj pomsty spartsmienu staŭ terakt u Dahiestanie 23 červienia, kali ŭzbrojenyja bajeviki napali na cerkvy i palicejskich u Machačkale i Derbiencie. Tady vyjaviłasia, što ŭ terakcie ŭdzielničaŭ Hadžymurat Kahiraŭ, jaki treniravaŭsia ŭ kłubie Chabiba, i rasijskija ŭłady razharnuli kampaniju suprać spartsmiena, a taksama stvaryli składanaści ź viartańniem u Rasiju.
Spačatku Chabiba za maŭčańnie paśla teraktu raskrytykavaŭ prapahandyst Uładzimir Sałaŭjoŭ. Da jaho padklučylisia i praŭładnyja błohiery dy kanały. Tak, telehram-kanał Brief naohuł abvinavaciŭ Chabiba ŭ sieparatyźmie — maŭlaŭ, Nurmahamiedaŭ usprymaje heta nie jak terakt, a jak baraćbu za niezaležnaść Dahiestana. Adrazu paśla teraktu rachunki Nurmahamiedava aryštavali za daŭhi pa padatkach, a ŭ jaho barcoŭskuju škołu pryjšli ź pieratrusami.
Sam Chabib paśla pačatku poŭnamaštabnaj vajny pastupova admoviŭsia ad usich svaich biznes-prajektaŭ u Rasii, jahony centr adzinaborstvaŭ zakryŭsia ŭ mai 2024 hoda — jakraz u toj momant, kali da jaho ŭźnikli pieršyja pretenzii ŭ siłavikoŭ.
Pa viersii «Projekta», Nurmahamiedaŭ nie padtrymaŭ vajnu šmat u čym z-za ciesnaj suviazi jahonaj siamji z Ukrainaj. Jahony baćka Abdułmanap vučyŭsia ŭ Pałtavie, tam ža prynamsi da 2022 hoda byŭ zarehistravany dziadźka Chabiba Nurmahamied.
U inšaha dziadźki spartsmiena Aleksa jość ukrainskaje hramadzianstva, sam Chabib adzin čas vystupaŭ za ŭkrainski kłub, źbiraŭsia pradstaŭlać Ukrainu i pretendavaŭ na pašpart. Jon jeździŭ treniravacca ŭ Pałtavu ŭ tym liku paśla anieksii Rasijaj Kryma.
Rasijski apazicyjanier, jaki vyjšaŭ pa abmienie viaźniami: Dla mianie niedapuščalna dapamahać USU
Ilja Jašyn na pieršaj pres-kanfierencyi na svabodzie: Mianie nie vyzvalili, a vyhnali z krainy