Пракурор папрасіла 24 гады для абвінавачанага ў жорсткім забойстве дзяўчыны-касіра
Абвінавачаны сцвярджае, што не хацеў забіваць, а толькі планаваў абрабаваць.
07.08.2024 / 14:27
Фота: Onliner.by
Дзяржаўны абвінаваўца папрасіла 24 гады пазбаўлення волі ў калоніі ўзмоцненага рэжыму для абвінавачанага ў забойстве 20-гадовай Таццяны Пятровай — касіркі абменнага пункта ў Заводскім раёне Мінска, піша «Спутнік».
Дзяржаўны абвінаваўца таксама папрасіла суд аштрафаваць 49-гадовага Аляксандра Дударчыка на 60 базавых (2400 рублёў).
«Віна Дударчыка ў забойстве з асаблівай жорсткасцю і разбоі цалкам даказаная», — заявіла дзяржаўны абвінаваўца.
У судзе выступіла і маці забітай дзяўчыны, якая папрасіла суд пры прызначэнні пакарання Дударчыку ўлічыць, што ён па-зверску пазбавіў жыцця яе дачку.
У сваю чаргу адвакат Дударчыка, выступаючы ў спрэчках, пераконваў суд у тым, што ў абвінавачанага не было намеру забіваць дзяўчыну.
Па словах абаронцы, Дударчык не схільны да гвалтоўных дзеянняў і яго ў пэўнай ступені справакавала тое, што ахвяра праявіла смеласць і аказала супраціў.
«Ён усведамляе жах здзейсненага», — сказала адвакат.
Пры гэтым яна адзначыла, што няма падстаў аспрэчваць абвінавачванне ў забойстве з асаблівай жорсткасцю.
Пры прызначэнні пакарання адвакат папрасіла суд улічыць чыстасардэчнае раскаянне абвінавачанага.
У апошнім слове ў судзе абвінавачаны Дударчык папрасіў прабачэння ў маці забітай, заявіў, што раскайваецца.
Прысуд Дударчыку будзе абвешчаны 12 жніўня а 17:00.
Забойства было здзейснена з асаблівай жорсткасцю — дзяўчыне было нанесена 19 нажавых колата-рэзаных ран, у галаву, шыю, рукі, таксама былі пранікальныя нажавыя раненні ў вобласць брушной поласці. Дзяўчына памерла на месцы ад атрыманых раненняў.
Пацярпелай па справе праходзіць маці забітай дзяўчыны. Яна і яе муж заявілі грамадзянскія пазовы ў дачыненні да Дударчыка кампенсацыі маральнай шкоды — на дваіх 100 тысяч рублёў. Ён заявіў, што прызнае патрабаванні.
Дударчык быў затрыманы ў студзені 2024 года, у дачыненні да яго была ўзбуджаная крымінальная справа.
Як вынікае з матэрыялаў справы, выйсці на Дударчка атрымалася дзякуючы геномнай экспертызе — на месцы злачынства быў знойдзены раменьчык, які адарваўся ад яго пальчаткі. Дадзены рэмень з'яўляецца рэчавым доказам па справе.
Мужчыну затрымалі, калі ён ішоў на працу, амаль праз 15 гадоў, піша Onliner.by.
Даставілі ў РУУС, сталі правяраць на паліграфе — і падчас гэтай праверкі ён зразумеў, за што затрыманы. Тады вырашыў расказаць пра злачынства.
— Вырашылі прызнацца, калі стала вядома, што вы датычныя?
— Зразумеў, што шукаюць па гэтым злачынстве.
— Чаму самі з 2009 па 2024 год не прызналіся?
— Скажу шчыра, было страшна.
У абвінавачанага спыталіся, ці быў ён у абменніку да 10 снежня 2009 года, — правяраюць, ці мог раней пакінуць сляды на месцы злачынства.
Сказаў, што не.
Мужчына не згодны з абвінавачваннем у пытанні пра пагрозы забойствам:
— Я не планаваў забіваць, нават не планаваў прыносіць нейкую цялесную шкоду.