Як глыбока прасунуліся ўкраінцы ў Курскай вобласці да вечара 7 жніўня?
6 жніўня 2024 года Узброеныя сілы Украіны ўвайшлі на тэрыторыю Расіі ў раёне горада Суджа Курскай вобласці. Маштаб аперацыі УСУ пакуль застаецца невядомым, але «Медуза» сабрала па адкрытых пацверджаных крыніцах інфармацыю, якая дае ўяўленне пра тое, як далёка ўдалося прасунуцца ўкраінскім вайскоўцам.
07.08.2024 / 23:17
Геалакаваныя па адкрытых даных месцы баявых дзеянняў у раёне Суджы
Некалькі батальёнаў 22-й механізаванай брыгады УСУ, узмоцненыя спецназам і сродкамі супрацьпаветранай абароны (і, магчыма, батальёнамі іншых рэгулярных брыгад) у ноч на 6 жніўня перайшлі мяжу Курскай вобласці і да вечара 7 жніўня глыбока ўклініліся ў расійскую абарону.
Ім супрацьстаялі вельмі слабыя сілы — памежнікі і пяхота з аднаго са створаных у 2023 годзе «палкоў прыкрыцця мяжы», часткова складзенага з вайскоўцаў тэрміновай службы. Гэта значыць, фактычна мясцовая тэрабарона амаль без бранятэхнікі.
Усё, што змагло супрацьпаставіць, верагодна, нечаканай атацы расійскае камандаванне — удары авіяцыі (самалётаў і верталётаў), а таксама АТРК «Іскандэр» па ўкраінскіх калонах, якія ішлі ў наступленне. Некалькі адзінак бранятэхнікі УСУ былі падбітыя, але наступ гэта не спыніла. Быў збіты як мінімум адзін расійскі верталёт.
Мяркуючы па апублікаваных відэа, да вечара 7 жніўня УСУ дасягнулі наступных поспехаў:
- Пасля сутак баёў захапілі прапускны пункт «Суджа» на мяжы Сумскай і Курскай абласцей. Некалькі дзясяткаў расійскіх памежнікаў трапілі ў палон.
- Была захопленая газавымяральная станцыя «Суджа» (частка інфраструктуры галоўнага расійскага газаправода, які пампуе газ у Еўропу праз тэрыторыю Украіны) за некалькі сотняў метраў ад прапускнога пункта.
- На захад ад прапускнога пункта УСУ хутка прасунуліся ўглыб тэрыторыі Расіі, дасягнулі дарогі Рыльск — горад Суджа ў раёне Свердлікава, дзе трапілі пад удары расійскай авіяцыі і аператыўна-тактычных ракет.
- Асноўная частка групоўкі УСУ павярнула па трасе ў напрамку Рыльска. Былі захопленыя вёскі Леанідава і Зялёны Шлях каля трасы. Расійскія «ваенкары» паведамілі, што перадавыя атрады УСУ дасягнулі ўскраін Коранева далей па трасе на Рыльск, але пацвярджэнняў гэтаму няма.
- Нягледзячы на чуткі і панічныя паведамленні «ваенкараў», УСУ пакуль не ўвайшлі (і, магчыма, нават не спрабавалі) у саму Суджу, хоць і падышлі да яе па меншай меры з захаду (а па чутках, і з поўдня). Пры гэтым кварталы горада былі сур'ёзна пашкоджаныя ўкраінскімі абстрэламі. У Суджы застаецца шмат мірных жыхароў.
- Прарваўшы першую рэдкую лінію абароны, украінскія сілы, верагодна, паспрабавалі дзейнічаць у стылі Балаклейска-Купянскага наступлення 2022 года: па дарогах вакол Суджы былі «выкінутыя» штурмавыя і дыверсійныя групы, якія паспрабавалі дэзарганізаваць расійскі тыл і прадухіліць падыход рэзерваў Узброеных сіл РФ.
- Да вечара 7 жніўня буйныя расійскія рэзервы, прыбыцця якіх у раён прарыву можна было б чакаць у першыя гадзіны або дні наступлення (у выпадку, калі б яны былі ў наяўнасці ў Курскай вобласці), у бой так і не ўступілі.
У Курскай вобласці ўвялі надзвычайнае становішча, пад кантролем Украіны 350 кв. км
Інфармацыя пра смерць тэлепрапагандыста Яўгенія Паддубнага не пацвердзілася
З'явіліся ФОТА і ВІДЭА, як дзясяткі расійскіх вайскоўцаў бяруцца ў палон у Курскай вобласці
Стала вядома, як рыхтуюцца да магчымага падыходу УСУ на Курскай АЭС