Illa Jašyn: Biełaruskija palitviaźni pavinny byli stać častkaj ździełki pa abmienie
«Abaraniajučy rasijskich palitzekaŭ, my pavinny abaraniać biełaruskich. I patrabavać, kab jany taksama traplali ŭ abmiennyja śpisy», — miarkuje rasijski palityk.
08.08.2024 / 09:09
Asudžanyja na 10 i 11 hadoŭ adpaviedna Maksim Znak i Maryja Kaleśnikava. Fota: Ramil Nasibulin/BelTA pool photo via AP, File
Vyzvaleny ŭ vyniku abmienu rasijski apazicyjanier Illa Jašyn miarkuje, što biełaruskija palitviaźni pavinny byli być častkaj ździełki i atrymać svabodu. Pra heta jon zajaviŭ 7 žniŭnia na sustrečy sa svaimi prychilnikami ŭ bierlinskim Maŭerparku. Vystup tranślavaŭ telekanał «Doždž», a Reform.news zanatavaŭ skazanaje Jašynym pra biełaruskich palitviaźniaŭ.
«Słuchajcie, voś ja ščyra mahu vam skazać, što ja vielmi asabista pieražyvaju toje, što adbyvajecca ŭ Biełarusi… i va Ukrainie, i ŭ Biełarusi… bo abiedźvie hetyja krainy mnie nie čužyja. Ja vielmi lublu i Ukrainu, i Biełaruś, šmat razoŭ tam byŭ, u mianie siabroŭ šmat i… bolš za toje, ja ŭ Biełarusi — vy budziecie śmiajacca — navat pasiadzieć paśpieŭ. Voś u hetym znakamitym Akreścina, śpiecpryjomniku. Ja ŭdzielničaŭ u adnoj z akcyj salidarnaści ź biełaruskaj apazicyjaj. Ź biełaruskim narodam, navat nie z apazicyjaj, ź biełaruskim narodam.
Ja paśpieŭ tam pasiadzieć niešta tam 10 ci 15 sutak, ja bačyŭ heta Akreścina znutry. I ja vielmi dobra razumieju, u jakich umovach tam ludzi siadziać. I ja razumieju, što, nasamreč, voś toje što ŭ Rasii adbyvajecca, heta častka taho, z čym sutykajucca palitviaźni ŭ Biełarusi. Nakolki tam dušać, źnievažajuć ludziej. Heta prosta žachliva. I Łukašenka ŭ hetym sensie absalutna niedamaŭlalny. Nu viadoma ž, što pavinny byli być i palitviaźni častkaj hetaj ździełki, biełaruskija palitviaźni.
I my z vami ŭžo daŭno nie viedajem, što tam adbyvajecca z Maryjaj Kaleśnikavaj, što adbyvajecca ź Siarhiejem Cichanoŭskim. Što z hetymi ludźmi. I my z vami pavinny prajaŭlać salidarnaść, jak mnie zdajecca. Heta nie čužaja prablema, heta nie čužaja biada. My ŭsie z vami siońnia ŭ hetym sensie salidarnyja. I ruskija, i biełarusy. Niama čužych palitviaźniaŭ. Heta našy ahulnyja ludzi. Heta ahulnaja biada. I abaraniajučy rasijskich palitzekaŭ, my pavinny abaraniać biełaruskich palitzekaŭ. I patrabavać, kab jany taksama traplali ŭ abmiennyja śpisy.
Prasić cyvilizavany śviet cisnuć na Łukašenku, kab tam prachodzili amnistyi, kab ludziej vyciahvali z turmaŭ. Bo pra rasijskich palitviaźniaŭ my chacia b viedajem, my chacia b viedajem, što adbyvajecca… a što adbyvajecca ŭ zaścienkach u Biełarusi ź miascovymi palitviaźniami?
Dy my navat nie viedajem, ci žyvy Cichanoŭski. My navat nie viedajem, ci žyvaja Maryja Kaleśnikava. I toje što robić hety [kiepski čałaviek] vusaty, heta prosta žachliva. Tamu ja chaču siońnia prosta vykazać salidarnaść ź biełaruskimi palitviaźniami i skazać: «Žyvie Biełaruś».
U Polščy patłumačyli, čamu rasijskaha špijona Rubcova nie abmianiali na Pačobuta
Ci mohuć demakratyčnyja siły vyzvalić palitviaźniaŭ praz svaju dyskredytacyju? Heta iluzija
Čamu Łosika pavinny byli vyzvalić u abmien na rasijskich špijonaŭ i čamu heta nie adbyłosia
Łatuška prakamientavaŭ prapanovu režymu vydać jaho ŭ abmien na Pačobuta