Hramadziancy ZŠA i Rasii zaprasili 15 hadoŭ kałonii pa spravie ab dziaržzdradzie za danat u 51 dalar
Spravu razhladaje toj ža sudździa, što asudziŭ na 16 hadoŭ Evana Hierškoviča.
08.08.2024 / 13:51
Dziaržabvinavačańnie zapytała 15 hadoŭ pazbaŭleńnia voli dla hramadzianki Rasii i ZŠA Ksienii Chavany (Karelinaj) pa spravie ab dziaržzdradzie — za achviaravańnie ŭ 51,8 dalara va ŭkrainski dabračynny fond, piša Bi-bi-si.
Dziaržavinieńnie zapytała dla Chavany 15 hadoŭ pazbaŭleńnia voli, paviedamiŭ jaje advakat paśla zaviaršeńnia sprečak bakoŭ. Pa słovach advakata, prysud budzie vyniesieny 15 žniŭnia.
Sprava Chavany słuchajecca ŭ Śviardłoŭskim abłasnym sudzie, praces idzie ŭ zakrytym režymie. Spravu razhladaje sudździa Andrej Miniejeŭ, jaki raniej prysudziŭ inšaha hramadzianina ZŠA, žurnalista Evana Hierškoviča, da 16 hadoŭ kałonii za špijanaž.
Ksienija Chavana (Karelina — jaje dziavočaje proźvišča), pa viersii FSB, jakoje viało śledstva, «ź lutaha 2022 hoda (…) inicyjatyŭna ažyćciaŭlała pieravod hrašovych srodkaŭ u intaresach adnoj z ukrainskich arhanizacyj, jakija paśla nakiroŭvalisia na nabyćcio ŭzbrojenymi siłami Ukrainy pradmietaŭ taktyčnaj miedycyny, ekipiroŭki, srodkaŭ paražeńnia i bojeprypasaŭ».
Pravaabarončy prajekt «Pieršy adździeł», jaki śpiecyjalizujecca na spravach ab dziaržaŭnaj zdradzie, pisaŭ sa spasyłkaj na svaje krynicy, što padstavaj dla spravy staŭ adziny pieravod, zrobleny Chavanaj u pieršy dzień poŭnamaštabnaha ŭvarvańnia Rasii va Ukrainu.
Dziaŭčyna, pavodle infarmacyi pravaabaroncaŭ, pieraviała 51,8 dalara ŭ zasnavany ŭ ZŠA fond humanitarnaj dapamohi ŭkraincam Razom for Ukraine.
U toj ža čas vydańnie RBK sa spasyłkaj na advakata dziaŭčyny pisała, što Chavana pryznała vinu ŭ pieravodzie hrošaj USU.
Ab zatrymańni 32-hadovaj hramadzianki Rasii i ZŠA stała viadoma 20 lutaha 2024 hoda. Heta adbyłosia ŭ Jekaciarynburhu, kudy jana prylacieła z Łos-Andželesa, kab naviedać svajakoŭ. Hramadzianstva ZŠA, miarkujučy pa sacsietkach dziaŭčyny, jana atrymała ŭ kancy 2021 hoda.
Pavodle infarmacyi «Pieršaha adździeła», jaje zatrymali jašče ŭ kancy studzienia supracoŭniki patrulna-pastavoj słužby nibyta za mat u hramadskim miescy, choć rapart byŭ składzieny supracoŭnikami FSB. Pa administracyjnaj spravie ab drobnym chulihanstvie jaje aryštavali na 14 sutak.
Ale jašče da vychadu sa śpiecpryjomnika joj aformili zatrymańnie pavodle kryminalnaj spravy ab dziaržaŭnaj zdradzie, paśla čaho sud adpraviŭ jaje na dva miesiacy ŭ SIZA.
Takaja praktyka — spačatku aryšt pa administracyjnaj spravie pa nadumanaj padstavie, a zatym uzbudžeńnie kryminalnaj spravy ab dziaržzdradzie — stała ŭ Rasii vielmi raspaŭsiudžanaj u apošnija dva hady na fonie rezkaha rostu kolkaści spraŭ ab dziaržzdradzie, adznačali pravaabaroncy.