Za dyviersiju ŭ Mačuliščach sudziać 11 biełarusaŭ. A taksama Mikałaja Šviaca, jakoha ŭžo viarnuli va Ukrainu
Abvinavačańnie paćviardžaje toje, što dyviersija była paśpiachovaj. Fihurantam moža pahražać až da śmiarotnaha pakarańnia.
09.08.2024 / 15:33
Źleva naprava źnizu ŭvierch: Dzianis Sakałoŭ, Aleh Syčoŭ, Nastaśsia Pilko, Maksim Łapacin, Andrej Ściapurka
Pa spravie prachodziać dvanaccać čałaviek. Heta ludzi, jakich abvinavačvajuć u ździajnieńni dyviersii ŭ Mačuliščach, padčas jakoj byŭ paškodžany rasijski samalot A-50. Na łavie padsudnych piać biełarusaŭ.
Zhodna ź filmam ANT, usie jany zrabili tolki vielmi mały kavałak pracy. Maksim Łapacin padvioz Šviaca sa Stolina na łahojskuju trasu, Andrej Ściapurka dapamoh znajści jamu kvateru pad Minskam, Aleh Syčoŭ i Nasta Pilko dali jamu tuju samuju kvateru. A Dzianis Sakałoŭ, jaki vyjaviŭsia pryjacielem syna Iryny Abielskaj i mierkavanym danosčykam, byccam dapamoh dastavić dron i znajści pracu dla Mikałaja Šviaca.
Ź filma ANT vynikała, što ŭsie hramadzianie Biełarusi, jakich zatrymali ŭ Biełarusi, nie viedali dakładna, chto taki Šviec i ŭ čym mienavita jamu treba dapamoha.
U śpis padsudnych trapili taksama ludzi, jakich niama ŭ Biełarusi: Alaksandr Azaraŭ, Jaŭhienija Tačyckaja, Siarhiej Łoparaŭ, Vital Jakucik, Ała Jacuta, Michaił Dziomin, a taksama hałoŭny fihurant — vykanaŭca dyviersii ŭkrainiec Mikałaj Šviec, jakoha abmianiali va Ukrainu.
Vital Jakucik. Fota: tvr.by
Abvinavačańni ŭ spravie ciažkija — «akt teraryzmu» (č. 3 art. 289 KK), «prachodžańnie navučańnia dla ŭdziełu ŭ terarystyčnaj dziejnaści» (art. 290-3 KK), «sadziejničańnie ekstremisckaj dziejnaści» (č. 1 art. 361-4 KK), «finansavańnie terarystyčnaj dziejnaści» (č. 1 art. 290-1 KK), «zdrada dziaržavie» (č. 1 art. 356 KK), «udzieł u dziejańniach, jakija hruba parušajuć hramadski paradak» (č. 1 art. 342 KK), «ahienturnaja dziejnaść» (č. 1 art. 358 KK), «uvachodžańnie ŭ skład ekstremisckaha farmiravańnia» (č. 3 art. 361-1 KK), «finansavańnie ekstremisckaha farmiravańnia» (361-2 KK), «niezakonnyja dziejańni datyčna vybuchovych rečyvaŭ» (č. 4 art. 295 KK) i «pryviadzieńnie ŭ niaspraŭnaść transpartnaha srodku» (č. 4 art. 309 KK).
Samy ciažki ź ich — «akt teraryzmu, ździejśnieny arhanizavanaj hrupaj». Za heta moža pahražać ad dziesiaci hadoŭ turmy da rasstrełu.
U abvinavačańni varta źviarnuć uvahu na artykuł «pryviadzieńnie ŭ niaspraŭnaść transpartnaha srodku». Zhodna z farmuloŭkaj artykułu 309 KK, srodak pavietranaha transpartu, rasijski samalot, musiŭ być paškodžany tak, kab być «nieprydatnym dla ekspłuatacyi». Taksama takoje paškodžańnie musiła mieć mahčymaść paciahnuć za saboj «krušeńnie, avaryju abo inšyja ciažkija nastupstvy». Kali b dyviersija ŭsio ž nie atrymałasia, ludziej by sudzili tolki za sprobu pravieści jaje, i ŭ abvinavačvańnie dadaŭsia b jašče adzin artykuł.
Paškodžany samalot vylataje z Mačuliščaŭ. Skrynšot ź videa dziaržSMI
Sud pačniecca 19 žniŭnia ŭ Minskim haradskim sudzie. Sudzić budzie Valancina Ziańkievič. Samaja viadomaja sprava, jakuju jana viała — sprava Tut.by. Maryna Zołatava i Ludmiła Čekina atrymali pa dvanaccać hadoŭ kałonii.
Valancina Ziańkievič. Fota: «Dzikaje palavańnie»
Nahadajem, dyviersija na aeradromie Mačuliščy pad Minskam adbyłasia 26 lutaha 2023 hoda. Tady byŭ paškodžany vielmi darahi rasijski samalot radyjoelektronnaj vyviedki A-50. Nieŭzabavie paśla hetaha jaho nazaŭždy vyvieli ź Biełarusi.
Navat pa viersii prapahandy ŭsie fihuranty, aproč Šviaca, byli nie ŭ kursie spravaŭ, tamu byli niedatyčnyja da vykanańnia dyviersii.
Ci zatrymali tych biełarusaŭ, chto vyvieŭ z ładu samalot u Mačuliščach? Nikoha nie pakazali
Prapahandysty pakazali «žyvy i zdarovy» rasijski samalot A-50. Ale jość važnyja niuansy
«Bajpoł» raskazaŭ, čym padryvali samalot u Mačuliščach i što ŭ im moža być paškodžana