Siarod zahinułych pry ŭdary pa handlovym centry ŭ Kanstancinaŭcy — dvoje dziaciej
Usiaho ŭ vyniku ŭdaru zahinuli 14 čałaviek.
10.08.2024 / 10:43
Pa stanie na ranicu suboty ŭ horadzie Kanstancinaŭka Danieckaj vobłaści Ukrainy, jaki napiaredadni padvierhsia rakietnaj atacy z boku Rasii, identyfikavany cieły dvuch zahinułych dziaciej — heta dziaŭčynki 9 i 11 hadoŭ, paviedamlaje Hienprakuratura Ukrainy, adznačajučy, što hetyja źviestki mohuć być nie kančatkovymi, piša Bi-bi-si.
Jak my raskazvali napiaredadni, u piatnicu Rasija naniesła rakietny ŭdar pa handlovym centry ŭ Kanstancinaŭcy, u vyniku jakoha zahinuli 14 čałaviek, bolš za 40 byli paranieny.
Pavodle papiaredniaj infarmacyi, udar byŭ naniesieny rakietaj «pavietra-ziamla» Ch-38. Akramia handlovaha centra byli razburany abo paškodžany adździaleńnie pošty, kramy, čatyry pryvatnyja damy i aŭtamyjka.
Jak paviedamlaje Hienprakuratura ŭ svaim telehram-kanale, praciahvajucca ekśpiertyzy pa ŭstanaŭleńni asoby jašče šaści čałaviek, u tym liku, vierahodna, jašče adno dzicia.
Rasiejskija vajskoŭcy ŭdar pa Kanstancinaŭcy nie kamientavali.