Spačatku maŭčańnie, potym — burnaja reakcyja. Chto prymusiŭ Łukašenku mitusicca
Ciaham troch dzion, padčas jakich razhortvałasia vajskovaja apieracyja ŭkrainskich uzbrojenych siłaŭ u Kurskaj vobłaści Rasii, ułady Biełarusi maŭčali. Nie było aficyjnych zajavaŭ. Dziaržaŭnyja miedyja tolki tranślavali rasijski aficyjoz. Maŭčaŭ i Alaksandar Łukašenka. Ale paśla praciahłaj paŭzy hučna adreahavaŭ, piša Valer Karbalevič u svaim błohu na sajcie Radyjo Svaboda.
12.08.2024 / 13:38
President.gov.by
Niezvyčajnuju aktyŭnaść prajaviła MZS, jakoje paśpieła za adzin dzień vystupić z asudžeńniem rejdu ŭkrainskich vojskaŭ u Kurskuju vobłaść, zajavić pratest časovamu pavieranamu ŭ spravach Ukrainy i navat paskardzicca u AAN i ABSIE na ŭkrainskija bieśpiłotniki.
Vybuchnuli ŭsie prapahandysckija resursy. Navypieradki stali kamientavać dziejańni Ukrainy deputaty.
Što adbyvajecca nasamreč? Najpierš — ci była sapraŭdy ataka bieśpiłotnikaŭ z terytoryi Ukrainy na Biełaruś? Ukrainski bok heta źniapraŭdžvaje. Pavodle manitorynhavaj hrupy «Biełaruski Hajun», nijakich dronaŭ z terytoryi Ukrainy ŭ hetyja dni vyjaŭlena nie było, jak nie było nijakich zapuskaŭ rakiet sa źniščalnika Su-30 abo viertalota Mi-24 Uzbrojenych siłaŭ Biełarusi.
Taksama ŭkrainskaja pamiežnaja słužba zajaŭlaje, što dadatkovych biełaruskich vojskaŭ kala miažy pakul niama.
Z usiaho hetaha možna zrabić nastupnyja vysnovy.
Najpierš — zdaryŭsia niejki mocny šturšok, jaki prymusiŭ aficyjny Minsk zaŭvažna mitusicca i aktyŭna demanstravać svaju padtrymku rasijskamu sajuźniku. I takim šturškom, vidavočna, stali nie dakory z boku rasijskich Z-błohieraŭ, na jakija Łukašenka dasiul nie nadta reahavaŭ. Možna mierkavać, što heta byŭ niejki mocny sihnał z vyšejšych rasiejskich instancyjaŭ. I sihnał taki, jaki nielha było praihnaravać.
Reakcyja aficyjnaha Minska na hety syhnał ci šturšok z Maskvy vyjaviłasia davoli štučnaja. Vyhladaje, nie było času prydumać niešta bolš realistyčnaje. Varta źviarnuć uvahu na peŭnuju razhublenaść palityčnaha kiraŭnictva Biełarusi. Nie było ŭžo tradycyjnaj narady Łukašenki z kiraŭnikami siłavych viedamstvaŭ.
10 žniŭnia Łukašenka ŭ časie razmovy z žycharami vioski Haradzišča Škłoŭskaha rajona zajaviŭ: «Tam užo na miažy niespakojna. Voś ja pavinien terminova zaŭtra być na miescy i raźbiracca z hetymi prablemami». Ale nazaŭtra jon čamuści nie pajechaŭ na biełaruska-ŭkrainskuju miažu, jak anansavaŭ, a naviedaŭ ahrakambinat «Jubilejny» ŭ Aršanskim rajonie.
Treba adznačyć, što reakcyja aficyjnaha Miensku na padziei vielmi demanstratyŭnaja. Šmat šumu, publičnych dziejańniaŭ, raźličanych na toje, kab heta ŭchvalna ŭspryniali ŭ Maskvie.
Maŭlaŭ, my pierasoŭvajem da ŭkrainskaj miažy dadatkovyja vojski, adciavajem uvahu vajskoŭcaŭ Ukrainy, tym samym padtrymlivajem rasijskaha sajuźnika. Tamu nie treba nas paprakać.
Možna mierkavać, što hetym usio i abmiažujecca. Imaviernaść realnaha ŭdziełu biełaruskaj armii ŭ rasijska-ŭkrainskaj vajnie zastajecca nievysokaj.
Łukašenka zajaviŭ pra źniščeńnie pavietranych celaŭ z Ukrainy nad terytoryjaj Biełarusi
Chrenin: «Pałanez» i «Iskander» atrymali zadačy na ździajśnieńnie maršaŭ na ŭkrainskuju miažu
MZS pahražaje vyhnać ź Biełarusi pasolstva Ukrainy
«Biełaruski Hajun» abviarhaje infarmacyju Łukašenki pra źbity nad Biełaruśsiu ŭkrainski dron