Pačynajuć sudzić baćku palitviaźnia Mikity Załatarova. Jamu pahražaje da siami hadoŭ kałonii za padtrymku syna
Spravu vioŭ homielski KDB.
12.08.2024 / 16:01
Michaił Łapunoŭ. Fota: «Biełsat»
Baćku Mikity Załatarova kličuć Michaił Łapunoŭ. Jamu 54 hady, žyŭ u Homieli.
Jahony syn Mikita Załataroŭ — adzin z samych maładych palitviaźniaŭ. Jon trapiŭ za kraty ŭ žniŭni 2020-ha va ŭzroście 15 hadoŭ. Padčas zatrymańnia jaho mocna źbivali, niahledziačy na toje, što chłopiec chvory na epilepsiju. Mikitu abvinavačvali ŭ tym, što jon «kinuŭ butelku z vadkaściu z charakternym pacham bienzinu ŭ bok supracoŭnikaŭ milicyi».
Mikita Załataroŭ. Fota «Radyjo Svaboda»
Mikitu spačatku dali piać hadoŭ kałonii, u 2021-m sudzili jašče raz za «napad na supracoŭnika kałonii» i dadali jašče kala hoda źniavoleńnia. U 2022-m Mikitu pieraviali na strohi režym u turmu Žodzina. A miesiac tamu sudzili za «niepadparadkavańnie administracyi kałonii» i mahli dadać jašče da dvuch hadoŭ kałonii.
Michaił uvieś čas padtrymlivaŭ Mikitu. Jon davaŭ intervju, dzie raspaviadaŭ pra ciažkija ŭmovy, jakija stvarali dla syna, chadziŭ na sudy nad im i staraŭsia zrabić jaho pobyt u kałonii lepšym.
Michaił Łapunoŭ. Fota: Biełsat
Baćku ŭpieršyniu zatrymali 8 žniŭnia 2023 hoda i prysudzili 15 sutak aryštu. Paśla hetaha jaho pierazatrymlivali siem razoŭ zapar. Na sutkach jon adbyŭ bolš za 100 dzion.
Pakul Michaił Łapunoŭ byŭ za kratami, zakryty čat «Homiel za Mikitu Załatarova», u jakim abmiarkoŭvałasia padtrymka dla Mikity, pryznali pa rašeńni KDB «ekstremisckim farmiravańniem.
Michaiła Łapunova pierazatrymali praz paru tydniaŭ paśla vyzvaleńnia z sutak. Stała viadoma, što suprać jaho zaviali kryminalnuju spravu i pieraviali ŭ SIZA №3 u Homieli.
Sud nad Michaiłam pačniecca 22 žniŭnia 2024 hoda ŭ Homielskim abłasnym sudzie. Jaho abvinavačvajuć pa dvuch artykułach — «stvareńnie ekstremisckaha farmiravańnia» (č. 1 art. 361 KK) i «sadziejničańnie ekstremisckaj dziejnaści».
Viadoma, što spravu suprać mužčyny viało Upraŭleńnie KDB pa Homielskaj vobłaści.
Sudzić Michaiła jaho budzie Alesia Osipava — sudździa, jakaja vynosić palityčnyja prysudy z 2017-ha hoda, z časoŭ maršaŭ niedarmajedaŭ u Homieli.
Alesia Osipava. Fota: «Dzikaje palavańnie»
Palitźniavolenuju mamu błohierki Volhi Takarčuk pačnuć sudzić 1 žniŭnia