Ja vypadkova najeŭsia ličynak charčovaj moli razam ź ježaj — heta niebiaśpiečna? Adkaz niečakany
Amal u kožnaha na kuchni choć raz zavodzilisia ličynki. A što budzie, kali nie zaŭvažyŭ i pajeŭ takuju stravu, a zaŭvažyŭ užo pad kaniec? I jak pazbavicca ad škodnikaŭ? Raspaviadajem.
21.08.2024 / 08:30
«Vandroŭny drozd z čarviakami» by Mbz1 pad licenzijaj CC BY-SA 4.0
Chto žyvie na našaj kuchni?
Nasamreč nie ŭsio, što my nazyvajem «ličynkami charčovaj moli» — heta sapraŭdy vid Sitotroga cerealella. Toje, što nazyvajecca charčovaj mollu, čaściakom heta tak zvanaja indyjskaja mol, viadomaja taksama jak paŭdniovaja śvirnavaja ahnioŭka, dy mielničnaja ahnioŭka, jakuju nazyvajuć mižmorskaj mučnoj mollu.
Vodziacca ŭ nas i roznyja vidy daŭhanosikaŭ dy mukajedaŭ, niekatoryja ź jakich lotajuć. Niekatoryja ź ich jaduć navat prypravy kštałtu vostraha pierca! Ličynki hetych vidaŭ nieśpiecyjalistu adroźnić ciažka, pakul jany nie vyraśli.
Prablema ŭ tym, što ličynki chavajucca ŭnutry ježy. Zrazumieć, što strava nie ŭ paradku možna pa «pavucińni» ŭ ježy abo najaŭnaści tam nasiakomych. Zaŭvažyć ich moža być niaprosta, bo častka ź vidaŭ chavajecca ŭnutry ziernia abo ŭ samym nizie.
Ličynka moli. Jany mohuć być roznych koleraŭ — ad biełaha da karyčnievaha. Fota: U.S. Department of Agriculture/flickr.com/CC BY 2.0
Akramia taho, niekatoryja vidy mohuć prahryzać papiarovuju ŭpakoŭku dy tonki płastyk, tamu mohuć być i ŭ praduktach prosta z kramy.
Ale ci niebiaśpiečna ich jeści?
Dobraja navina ŭ tym, što amal zaŭždy adkaz — nie. Jany nie pieranosiać anijakich chvarobaŭ i nivodny z tych, što vodzicca ŭ Biełarusi, nie atrutny.
Adzinaje, što z vami moža zdarycca — alerhija, ale jana vyklučna redkaja. Kali jana zdaryłasia, to varta źviarnucca da miedykaŭ.
Entamołah i dyjetołah Skaj Błekbiern u intervju The Guardian raspavioŭ, što takaja «ježa» navat moža być karysnaj. «Heta dadatkovy białok. Siaredniestatystyčny čałaviek źjadaje kala 250 hramaŭ nasiakomych štohod!» — kaža navukoviec. Skaj navat adkryŭ biznes pa vyroščvańni spažyŭnych nasiakomych.
A na forumie Quora žartujuć, što tak možna dałučycca da ruchu ludziej, jakija razmnažajuć i jaduć nasiakomych zamiest miasa ŭ jakaści krynicy białkoŭ.
Ale ježu, jakaja tearetyčna moža ŭtrymlivać ličynki (kali vy nie viedajecie, ale jana pastajała doŭha adkrytaj) varta hatavać nie mienš za 15 chvilinaŭ — tady vas u talercy dakładna nie čakaje žyvy «siurpryz».
A jak jaje pazbavicca?
Darosłaja mol. Fota: «Indyjskaja charčovaja mol» by CSIRO/CC BY 3.0
U pramysłovych maštabach heta robicca z dapamohaj piestycydaŭ i jadaŭ. Ale na vašaj kuchni prymianiać ich adnaznačna nielha.
Kali vy znajšli takich haściej, to pierahladzicie ŭsie vašy adkrytyja suchija pradukty. Chutčej za ŭsio, u častcy ź ich taksama buduć parazity.
Dla hetaha pavysypajcie ich u niejkuju taru i ŭvažliva pierahladzicie — u ich buduć darosłyja asobiny, ličynki abo pavucinki, jakija robiać ličynki. Vykińcie jaje adrazu na vulicu.
Paśla pryborki pamyjcie ŭsie palicy dy vyčyścicie adtul ježu i kropli vadkaściaŭ. Skarystajciesia pyłasosam, kab vydalić reštki ličynak i kukałak. Źviarnicie asablivuju ŭvahu na kuty šafaŭ.
Rysavyja daŭhanosiki — i takija parazity byvajuć na kuchni. Fota: animalia.bio/CC BY-SA 3.0
Pierakładzicie ŭsiu ježu ŭ hiermietyčnyja płastykavyja abo šklanyja kantejniery. Nie zabyvajciesia ich ščylna zakryvać.
Ekśpierty rajać nie kuplać zašmat ježy na zapas, navat kali heta trochu tańniej. Imaviernaść taho, što vy adšukajecie ŭ joj škodnikaŭ, u takim razie značna mienšaja.
Taksama ŭ internecie pradajucca admysłovyja pastki i repielenty ad moli. Kažuć, što dapamahaje taksama raskłaści łaŭrovy list u šafach ź ježaj, ale hety sposab my nie praviarali.
U homielskaj žanočaj kałonii našeście charčovaj moli
Kupili muku? Spačatku pakładzicie jaje ŭ maraziłku
Žycharka Vilejki znajšła ŭ aŭsiancy žyvoha vusienia