48-гадовага айцішніка з Магілёва судзяць за данаты на дапамогу Украіне
Аляксей Лескавец можа атрымаць да 10 гадоў калоніі.
15.08.2024 / 07:00
Аляксей Лескавец. Фота з ягонай старонкі Укантакце
Аляксею Лескаўцу 48 гадоў. Па звестках праекта DIT, ён з Магілёва.
Аляксей — праграміст. З вядомых месцаў працы мужчыны толькі дзяржаўныя прадпрыемствы. Ён працаваў на Магілёўскім металургічным заводзе і адміністраваў сайт кампаніі, у Праектным спецыялізаваным бюро, інжынерам-праграмістам у Цэнтры гарадскіх інфармацыйных сістэмаў Магілёва.
Хобі мужчыны — фатаграфія. Ён фатаграфуе як на стужку, гэтак і на лічбавыя фотаапараты. Аляксей рэгулярна здымае розныя гарадскія мерапрыемствы і дзеліцца фота ў сацсетках. Любіць ён і падарожнічаць, як па Беларусі, гэтак і па замежжы.
Аляксей Лескавец. Фота з ягонай старонкі Укантакце
Суд над Лескаўцом пачнецца 22 жніўня ў Магілёўскім абласным судзе. Судзіць яго будзе Васіль Галкоўскі, які мае на рахунку «сціплыя» шэсць прысудаў па палітычных справах.
Лескаўца абвінавачваюць па двух артыкулах — «фінансаванне або іншае матэрыяльнае забеспячэнне вайны» (ч. 2 арт. 361-3 КК) і «фінансаванне экстрэмісцкага фарміравання» (арт. 361-2 КК, страціў моц у маі 2021).
Аляксею пагражае да 10 гадоў калоніі. Акалічнасці справы невядомыя.
Каго садзяць за данаты, а каму дазваляюць адкупіцца. Вось якая логіка
Пенсіянерцы з Брэста далі тры з паловай гады калоніі за дапамогу палітвязням
Айцішніка, які вярнуўся з Вільні ў Мінск, затрымалі за данаты і ўдзел у плане «Перамога»