Trapiŭ pad zvalnieńnie ŭ Polščy i nie znajšoŭ novaj pracy za 30 dzion. Što budzie z DNŽ?
Kanał dla ajcišnikaŭ u Polščy Dzik Pic daviedaŭsia ŭ jurysta, jak dziejničać u takoj situacyi.
14.08.2024 / 21:54
Kali ŭ vas DNŽ pa pracy i vas zvolnili, to vy pavinny apaviaścić vajavodu pra stratu pracy na praciahu 15 dzion. A źmianić pracadaŭcu z najaŭnym DNŽ možna tolki na praciahu 30 dzion paśla zvalnieńnia.
Pavodle praviłaŭ, kali nie znajści novaj pracy za 30 dzion, to maje pačacca praces anulavańnia pracoŭnaha DNŽ. Ale na praktycy heta doŭhi praces, kala paŭhoda, na praciahu jakoha inšaziemiec moža znachodzicca ŭ Polščy lehalna.
Voś kiejs dziaŭčyny, jakaja nie «ŭkłałasia» ŭ 30-dzionnuju normu, a taksama kamientar jurystki.
Historyja biełaruski: «Praviła «30 dzion» nie takoje ŭžo strašnaje, kab źbirać valizki»
— U mianie ŭsio pačałosia z taho, što inkubatar vielmi kasiaknuŭ z padrychtoŭkaj dakumientaŭ na źmienu decyzii.
Ja ŭkłała damovu z kampanijaj, jakaja dapamahaje. U pracesie my zrazumieli, što z takimi dakumientami mnie ŭ źmienie decyzii admoviać. Inšaja praca ŭ mianie była, i ja spytałasia ŭ jurystki, što mnie rabić u takoj situacyi. Jana adkazała, što my možam padać dakumienty na novuju kartu pobytu, navat niahledziačy na toje, što minułaja decyzija dziejničaje.
My padali dakumienty pra toje, što ja zvolnienaja, 1 sakavika (hierainia śćviardžaje, što ŭkłałasia ŭ 15-dzionny termin dla apaviaščeńnia — zaŭv. Dzika). Pry hetym jurystka skazała: niahledziačy na toje, što ja nie vykonvaju 30-dzionnaj źmieny pracy, maja decyzija ŭsio roŭna nie pieratvorycca ŭ harbuz.
Ja padałasia 8 maja na novuju kartu i ciapier čakaju rašeńnia. Maja staraja karta i decyzija ŭ paradku, ja praciahvaju padarožničać pa Šenhienie. Nijakich listoŭ pa staroj decyzii nie prychodziła.
Na hetaj padstavie ja miarkuju, što praviła «30 dzion» nie takoje ŭžo strašnaje, kab źbirać valizki na vyjezd z Polščy.
Jurystka: «Pakul va ŭładalnika DNŽ jość na rukach aktyŭnaje rašeńnie pa im, to jon znachodzicca ŭ Polščy lehalna»
Na pytańnie: «A tak chiba možna?», — adkazała śpiecyjalistka ŭ mihracyjnych pytańniach Darja Hryšanovič:
— Zhodna z č. 1 art. 101 Zakona ab inšaziemcach dazvoł na časovaje pražyvańnie (DNŽ) anulujecca, kali meta znachodžańnia, dla jakoj byŭ vydadzieny dazvoł, pierastała isnavać.
To-bok, u hetym vypadku, kali DNŽ byŭ vydadzieny na kankretnaha pracadaŭcu, to spynieńnie ź im pracoŭnych abo hramadzianska-pravavych adnosin aznačaje spynieńnie isnavańnia mety, ź jakoj DNŽ byŭ vydadzieny.
Na praktycy ŭ vajavody niama mahčymaści daviedacca, ci skasavali z vami damovu. Tamu va ŭładalnika DNŽ jość abaviazak prainfarmavać pra heta vajavodu na praciahu 15 pracoŭnych dzion (art. 113 Zakona ab inšaziemcach).
Ale ŭ vypadku sa zvyčajnym DNŽ pa pracy praces anulavańnia pačynajecca nie adrazu. Zhodna z č. 1 art. 123 usio taho ž Zakona ab inšaziemcach, kali vy adpravili apaviaščeńnie na praciahu 15 pracoŭnych dzion, to ŭ vas jość 30 kalandarnych dzion ad momantu straty pracy, kali vy možacie padać novuju zajavu na DNŽ.
Nie važna, jakoj budzie novaja meta: praca, uźjadnańnie z sužencam, palicealnaja škoła i h. d. — praces anulavańnia DNŽ u hetyja 30 dzion nie pačniecca.
Maja parada: navat kali vy pakul nie znajšli novaj mety, usio roŭna padajcie zajavu poštaj abo adniasicie jaho ŭ kancylaryju i paznačcie lubuju metu.
Na adbitki i tak pryjdziecca krychu pačakać. A da taho času vy abo znojdziecie novuju pracu, abo inšuju metu znachodžańnia.
Toje ž samaje tyčycca i zajavy na źmienu DNŽ pa pracy. Vy možacie vysłać zajavu biez dadatkaŭ ad novaha pracadaŭcy. List z prośbaj danieści nieabchodnyja dakumienty ŭsio roŭna pryjdzie praź niekalki miesiacaŭ. Tak vy vyjhrajecie čas.
Što budzie, kali ničoha nie zrabić u hetyja 30 dzion?
— Kali zamiežnik nie zrobić nijakich zachadaŭ na praciahu 30 dzion, to vajavoda maje pačać praceduru anulavańnia vydadzienaha dazvołu na žycharstva.
Ale, miarkujučy z praktyki, dziaržorhany nie dajuć rady abjomu nakiroŭvanych zajaŭ, i heta moža raściahnucca na doŭhija miesiacy, a to i hady. To-bok vierahodnaść taho, što DNŽ budzie anulavany pa zakančeńni 30 dzion, u ciapierašnich realijach vielmi nizkaja.
Važna: pry anulavańni vy atrymlivajecie list, što vaš DNŽ anulavany, i ŭ vas jość termin dla dobraachvotnaha vyjezdu z Polščy. DNŽ nia anulujecca aŭtamatyčna biez vašaha viedama, na ŭsio jość aficyjny list.
Čamu tak važna paviedamić vajavodu pra stratu pracy mienavita na praciahu 15 pracoŭnych dzion?
— Kali inšaziemiec nie paviedamić u termin vajavodu pra stratu mety, ź jakoj jamu vydali dazvoł na žycharstva, to:
- jamu/ioj moža być admoŭlena ŭ vydačy nastupnaha dazvołu na časovaje pražyvańnie — kali inšaziemiec padaŭ zajavu na novy DNŽ raniej čym praz hod z dnia zakančeńnia terminu dziejańnia papiaredniaha dazvołu na žycharstva abo z daty, kali rašeńnie ab anulavańni DNŽ ustupiła ŭ zakonnuju siłu (č. 2 art. 100 Zakona ab inšaziemcach);
- zamiežniku admoviać u źmienie DNŽ (p. 6 č. 4 art. 120 Zakona ab inšaziemcach).
Akramia taho, niametavaje vykarystańnie DNŽ źjaŭlajecca adnoj z pryčyn admovy ŭ vydačy rezidenta ES.
Atrymlivajecca, čytačka znachodzicca ŭ Polščy na zakonnych padstavach?
— U dadzienaj historyi apaviadalnica skazała, što nie padała zajavy ciaham 30 dzion, adnak apaviaściła pra stratu pracy ciaham 15 pracoŭnych dzion.
Jak ja zhadała vyšej, u biahučych realijach dziaržorhany nie anulujuć DNŽ u termin, choć pa zakonie i majuć heta rabić. Pakul va ŭładalnika dazvołu na žycharstva jość na rukach aktyŭnaje rašeńnie pa DNŽ (to-bok nie byŭ atrymany list ab anulavańni), to jon znachodzicca ŭ Polščy absalutna lehalna, i, adpaviedna, moža padać zajavu ab davańni novaha DNŽ.
Pry hetym pad uvahu budzie bracca mienavita toje, ci apaviaściŭ uładalnik DNŽ pra stratu mety znachodžańnia na praciahu 15 pracoŭnych dzion.
Jakija mohuć być niehatyŭnyja nastupstvy?
— U haradach, dzie Upraŭleńnie ŭ spravach zamiežnikaŭ pracuje efiektyŭniej, anulavańnie mohuć vysłać ciaham niekalkich miesiacaŭ. Uličvajučy, što apaviadalnica ŭsio ž paśpieła padać dakumienty na novy DNŽ da atrymańnia lista ź infarmacyjaj ab anulavańni, to prablem u jaje vypadku nie budzie.
Ale kali ŭjavić, što chtości zaciahnuŭ, nie paśpieŭ padać novuju zajavu i jamu pryjšoŭ list ź infarmacyjaj ab anulavańni DNŽ, to padać na novy DNŽ užo nie atrymajecca. Bo zhodna z p. 9 č. 1 art. 99 Zakona ab zamiežnikach u raspačynańni vytvorčaści pa spravie budzie admoŭlena.
I ŭsio jašče zastajecca ryzyka, što list z anulavańniem mohuć dasłać u luby momant. Kali chtości vyrašyć u hety čas pažyć u Ispanii na zimoŭcy, to jon apyniecca ŭ vielmi niepryjemnaj situacyi.