«Strašna padumać, što mahło adbycca, kali b dzieci byli doma». U Maładziečnie elektryčnaść spaliła ŭsiu bytavuju techniku ŭ adnym z damoŭ
Pa ščaślivaj vypadkovaści, abyšłosia biez čałaviečych achviar u domie № 66A na vulicy Šaranhoviča Zaliniejnaha mikrarajona.
15.08.2024 / 13:45
Incydent z elektryčnaściu spaliŭ žycharam doma ladoŭniu, mikrachvaloŭku, kampjutar. Ciapier dzieciam nielha ni pasmažyć katlety, ni svaryć sup, piša Kraj.by.
Trochpaviarchovy dom №66A na vulicy Šaranhoviča, u jakim dzieviać kvater, znachodzicca pobač z terytoryjaj pradpryjemstva «Minsktelekambud». Paškodžańnie elektryčnaha kabiela na hetym pradpryjemstvie ŭ vyniku stała prablemaj dla žycharoŭ trochpaviarchovika.
Zdareńnie adbyłosia ŭ sieradu, 7 žniŭnia. Ludzi ŭžo tydzień nie mohuć apamiatacca, likvidujuć stvoranyja incydentam niazručnaści i spadziajucca znajści adkaz na pytańnie: chto im uvieś hety hałaŭny bol kampiensuje?
U dźviuch kvaterach, paciarpiełych bolš za inšych, u toj momant nie było doma dziaciej, uzrost jakich ad piaci da 14 hadoŭ. Mahčyma, dziakujučy hetamu ŭdałosia paźbiehnuć trahiedyi.
U Aliny i jaje muža padrastajuć 14-hadovy syn i piacihadovaja dačka. Maleńkaj Vieranicy 13 žniŭnia mama prapanuje syravendžanuju kaŭbasu i čypsy. Katlet pasmažyć niama na čym. Taksama zhareła mikrachvaleŭka.
Pradukty, jakija chutka psujucca, Alina taksama nie kuplaje — ich nie pakładzieš u zhareły chaładzilnik. U vychadnyja mamie pryjšłosia karmić dačku haračaj ježaj u restaranie KFC.
— U nas zhareli ladoŭnia, mikrachvaloŭka, kampjutar, kałonki i elektryčnaja paiłka dla koški, — raspaviadaje Alina.
— Kampjutar addali ŭ ramont. Nam skazali, što błok siłkavańnia adramantavać niemahčyma, jaho treba mianiać. Doma ad kampjutara zastalisia tolki draty.
Kotka Miejz vadu ciapier pje z akvaryuma z rybkami
Pa słovach Aliny, chaładzilnik kupili ŭ rasterminoŭku, jaho pavinny pryvieźci. Mikrachvaloŭka — taksama ŭ rasterminoŭku.
Kali 7 žniŭnia ŭsio heta zdaryłasia, Alina i jaje muž byli na pracy. 14-hadovy syn Illa — u babuli, a maleńkaja Vieranika — u dziciačym sadku.
— Moj syn, jak i ŭsie padletki, časam stavić na zaradku mabilny telefon i adnačasova pa im razmaŭlaje. Ja bajusia navat ujavić, što mahło zdarycca, kali b syn u hety dzień byŭ doma i staŭ razmaŭlać pa ŭklučanym u razietku mabilniku, — kaža Alina.
Nie mienš paciarpieła siamja Viktoryi, jakaja z mužam haduje piacihadovuju dačku i šaścihadovaha syna. U kvatery 7 žniŭnia taksama nikoha nie było. Muž Viktoryi — na pracy, syn — u babuli, a sama jana z dačkoj lažała ŭ balnicy. Viktoryja pakazvaje pradpryjemstva kala svajho doma, jakoje, na dumku žycharoŭ trochpaviarchovika, i stała pryčynaj ich bied.
— Za tydzień da hetaha vypadku, u noč na 30 lipienia, na vulicy pamiž našym domam i pradpryjemstvam niešta stała stralać. Viedajecie, takija vopleski, jak byccam pietardy, i ŭspyški jarkaha śviatła. My vyklikali avaryjnuju słužbu, jakaja pryjechała i nijakich pałomak u nas nie znajšła. A praz tydzień paśla hetaha vypadku ŭ nas zhareła bytavaja technika.
Dźvie kvatery ź dzieviaci ŭ našym domie niežyłyja, tam u razietki ničoha nie ŭklučana. U inšych kvaterach žyvuć piensijaniery, jakija paśpieli vyciahnuć z razietak elektraprybory i mocna nie paciarpieli. Lampački tam u ich pierahareli. A ŭ mianie zhareli chaładzilnik, elektryčnaja varačnaja panel, duchavaja šafa, vyciažka, akustyčnaja sistema, padśviatleńnie lištvy, zaradka noŭtbuka i baza robata-pyłasosa. Ciapier pyłasos jeździć pa padłozie, nie moža znajści svoj «dom», — sumna žartuje Viktoryja.
— Vytrymali mikrachvaloŭka i elektračajnik. Z dynamikaŭ televizara niešta kapała. Jon pracuje, ale takoje adčuvańnie, što ledź trymajecca da pary da času.
— Z dačkoj viarnulisia z balnicy, a pakarmić dzicia niama čym. Pałovu praduktaŭ sa zharełaha chaładzilnika pryjšłosia vykinuć, jany sapsavalisia. Chaładzilnik i elektraplitu, jakija pracujuć, ciapier uziali ŭ znajomych u arendu, — skazała Viktoryja.
Dom absłuhoŭvaje ŽREU-2. Pa słovach maładych mam, u domakiraŭnictvie im skazali, što ŭsiu sapsavanuju techniku jany sami pavinny addać na ekśpiertyzu, kab dakazać, što jana zhareła mienavita pa pryčynie niepaładak z elektryčnaściu.
— Potym my sami pavinny znajści majstroŭ, jakija našu techniku adramantujuć, i tolki paśla hetaha «Kamunalnik» usio kampiensuje praz «Biełdziaržstrach». Ale, nakolki my viedajem, padobnaja ekśpiertyza taksama kaštuje niemałych hrošaj. Pravodzicca jana ŭ Minsku. Da taho ž, śpis paškodžanaj techniki majstar ŽREU skłaŭ, ale nijakich aktaŭ i zaklučeńniaŭ nam na ruki nie vydajuć, — adznačyli paciarpiełyja žančyny.
Načalnik Maładziečanskaha ŭčastka AAT «Minsktelekambud» Aleh Błažko nie admaŭlaje, što incydent adbyŭsia ŭ vyniku likvidacyi niepaładak elektrazabieśpiačeńnia na jaho pradpryjemstvie, ale śćviardžaje, što ni jon, ni elektryki, jakich jon pryciahvaŭ da pracy, u incydencie nie vinavatyja.
— Unačy 30 lipienia ŭ nas zhareŭ naš elektryčny kabiel, i jaho treba było mianiać, — raspaviadaje Aleh Błažko.
— A pakolki my siłkujemsia ad doma № 66A, to ja źviarnuŭsia ŭ «Kamunalnik», adkul mianie nakiravali ŭ ŽREU-2. 7 žniŭnia pryjechaŭ elektryk z ŽREU-2. Jon adklučaŭ elektryčnaść ad doma dla praviadzieńnia rabot, a potym uklučaŭ jaho nazad. U hety momant usio i zdaryłasia.
Dumaju, pryčyna ŭ niedastatkovym zaziamleńni elektryčnaj šafy doma №66A i ŭ tym, što elektryk naležnym čynam nie atrymaŭ dostup na praviadzieńnie hetych rabot. Ja paśla incydentu znoŭ byŭ u ŽREU-2. Tam nie admaŭlajuć viny svajho elektryka. Čuŭ, što jaho navat premii pazbavili, — skazaŭ načalnik Maładziečanskaha ŭčastka AAT «Minsktelekambud».
Žurnalisty źviazalisia pa telefonie z načalnikam ŽREU-2 Julijaj Siačko i prapanavali vykłaści svajo bačańnie hetaj situacyi.
Julija Michajłaŭna była bolš čym łakaničnaja: «Biez kamientaroŭ».