Vučonyja vyznačyli ŭ žyćci čałavieka dva piki stareńnia
Novaje daśledavańnie kaža, što malekularnyja źmieny, źviazanyja sa stareńniem, adbyvajucca nie liniejna, a prypadajuć na dva pieryjady ŭ našym žyćci. Što za jany?
18.08.2024 / 22:13
Jak piša The Washington Post, u novym daśledavańni navukoŭcy Stenfardskaha ŭniviersiteta adsočvali ŭzrostavyja źmieny ŭ bolš čym 135 tysiač typaŭ malekuł i mikrobaŭ, uziatych u bolš čym 100 darosłych ludziej. Jany vyjavili, što zruchi ŭ ich kolkaści — pavieličeńnie abo pamianšeńnie — nie adbyvalisia pastupova ź ciaham času, a zhrupavalisia vakoł dvuch uzrostaŭ.
Na słovach aŭtaraŭ daśledavańnia, niahledziačy na toje, što my mianiajemsia na praciahu ŭsiaho žyćcia, jość dva asnoŭnyja pieryjady, kali adbyvajucca sapraŭdy kardynalnyja źmieny. Adzin prypadaje na siaredzinu piataha dziasiatka (u siarednim heta 44 hady), a druhi — na 60 hadoŭ.
Vyniki daśledavańnia apublikavanyja ŭ časopisie Nature Aging.
Daśledavańniem było achoplena 108 zdarovych darosłych ludziej roznaha etničnaha pachodžańnia va ŭzroście ad 25 da 75 hadoŭ. Kožnyja try-šeść miesiacaŭ na praciahu prykładna dvuch hadoŭ navukoŭcy brali ŭ ich mazki z rota, skury i nosa, a taksama ŭzory kryvi i kała.
U ramkach daśledavańnia vučonyja nazirali źmieny ŭ malekułach i mikrobach, uklučajučy białki, mietabality i lipidy, jakija źviazany z funkcyjaj sardečna-sasudzistaj i imunnaj sistem, mietabalizmam, skuraj i ciahlicami. Usiaho analizam było achoplena kala 135 239 roznych malekuł i mikrobaŭ.
Statystyčny analiz pakazaŭ, što bolšaść malekuł (81%) u arhaniźmie čałavieka istotna źmianiałasia, kali jon dasiahaŭ 44 i 60 hadoŭ. Vučonyja taksama zaŭvažyli niekatoryja adroźnieńni ŭ źmienach pamiž dvuma pikami.
Na siaredzinu 40-ch hadoŭ prypadajuć prykmietnyja źmieny kolkaści malekuł, źviazanych z sardečna-sasudzistymi zachvorvańniami, mietabalizmam ałkaholu i lipidaŭ (tłuščaŭ). U tych, kamu za 60 hadoŭ, prykmietnyja vahańni naziralisia ŭ kolkaści malekuł, źviazanych ź imunnaj rehulacyjaj, funkcyjaj nyrak i mietabalizmam vuhlavodaŭ, a taksama sardečna-sasudzistaj sistemaj.
Aŭtary adznačajuć, što nie byli ździŭleny pikam, jaki prypadaje na 60 hadoŭ, bo daŭno viadoma, što ŭ hety pieryjad uźnikajuć mnohija ŭzrostavyja zachvorvańni, takija jak sardečna-sasudzistyja ci rak.
A voś pik siaredziny 40-ch hadoŭ dla ich byŭ dziŭnym z-za taho, što jon achoplivaje jak žančyn, tak i mužčyn. Atrymlivajecca, što dramatyčnyja źmieny ŭ arhaniźmie nielha tłumačyć vyklučna nadychodam pierymienapaŭzy abo mienapaŭzy ŭ žančyn. Isnujuć inšyja, bolš značymyja faktary, jakija ŭpłyvajuć na źmieny ŭ arhaniźmie jak mužčyn, tak i žančyn.
Dakładnaja pryčyna hetych malekularnych źmianieńniaŭ, jakija prypadajuć na 44 i 60 hadoŭ, niezrazumiełaja. Ale aŭtary daśledavańnia adznačajuć, što ich vysnovy pavinny paspryjać tamu, kab ludzi paśla 40 hadoŭ bolš kłapacilisia pra svajo zdaroŭje. Heta ŭklučaje ŭ siabie jak prachodžańnie rehularnych miedycynskich ahladaŭ, tak i karekciroŭku ładu žyćcia i dyjety.
Vučonyja spadziajucca, što dalejšyja daśledavańni malekularnych źmien daduć padkazku ab pryčynach uzrostavych zachvorvańniaŭ.
Ci adpaviadaje vaša fizičnaja forma vašym hadam? A nu praviercie z dapamohaj hetych testaŭ
Žyćcio pobač z parkami zapavolvaje bijałahičnaje stareńnie
Hetyja simptomy mohuć śviedčyć ab sardečnaj niedastatkovaści