Pasolstva Biełarusi raić nie pramaŭlać u Iranie słovy «Kirkoraŭ» i «kirpič». Čamu?
Dypłamatyčnaje pradstaŭnictva apublikavała rekamiendacyi dla tych biełarusaŭ, chto choča naviedać Iran.
16.08.2024 / 14:40
Ilustracyjnaje fota. Fatemiech Bachrami / Anadolu via Getty Images
Pasolstva Biełarusi ŭ Iranie raić tym, chto vyrašyć naviedać Isłamskuju Respubliku, nie ŭžyvać niekatoryja słovy.
Tak, lepš nie pramaŭlać słovy typu «abrykos», «kosmas», «kirpič», «Kirkoraŭ» i inšyja, u jakich utrymlivajucca hukaspałučeńni «kir» i «kos». Akazvajecca, hetyja spałučeńni na farsi aznačajuć dzietarodnyja orhany.
Kab paźbiehnuć kiepskich situacyj, dypłamaty rajać ustrymacca ad častaha vykarystańnia pacałunkaŭ, movy žestaŭ i parušeńnia asabistaj prastory miascovych žycharoŭ.
Abraźlivymi ŭ Iranie ličać takija žesty: «kiść ruki, ścisnutaja ŭ kułak z padniatym uvierch vialikim palcam», «padniaty ŭvierch siaredni palec», «ruch pravaj ci levaj ruki, jaki pakazvaje ŭdar pa padbarodku źnizu ŭvierch». Takija žesty pakazvać nie varta.
Pasolstva nahadvaje i pra patrabavańni da adzieńnia: inšaziemki, jak i miascovyja žančyny, abaviazany nasić «chidžab» — śpiecyjalnuju formu adzieńnia, jakaja pakryvaje ŭsio cieła, akramia tvaru i kiściaŭ ruk.
Rekamiendujecca nasić svabodnuju vopratku, jakaja nie padkreślivaje formy cieła. Mužčynam varta paźbiahać šortaŭ vyšejšych za kalena i majek z adkrytymi plačyma.
Biełaruskija dypłamaty zajaŭlajuć, što žančyn u Iranie nie dyskryminujuć, a abaviazak nasić chidžab nibyta tolki padkreślivaje asablivy sacyjalny status žančyn.
Adnak pasolstva ŭsio ž raić nie sprabavać paznajomicca z žanočaj častkaj siamji haspadara doma, zaprašać žanočuju častku siamji za ahulny stoł, nie praciahvać žančynie ruku pry znajomstvie, nie ŭvachodzić u žanočaje adździaleńnie hramadskaha transpartnaha srodku, nie zadavać pytańni zamiežnamu surazmoŭcu ab jaho žoncy, nie hladzieć pilna na žančyn, nie pakazvać na ich rukoj abo palcam, nie sprabavać zahavaryć abo paznajomicca z žančynami na vulicy i nie adpuskać kamientary ŭ ich adras.
Nielha ŭvozić u Iran ałkahol, śvininu, narkatyčnyja rečyvy, ekstremisckuju litaraturu, drukavanyja i elektronnyja nośbity infarmacyi, jakija abražajuć isłam albo dziaržaŭnuju ŭładu ŭ Iranie, prapahandujuć «zachodniuju sistemu kaštoŭnaściaŭ» i supiarečać normam šaryjatu, a taksama źmiaščajuć parnahrafičny kantent. Za ŭžyvańnie ałkaholu ŭ Iranie mohuć pryznačyć 40 udaraŭ pałkami. Kryminalnaje pakarańnie praduhledžana za demanstracyju homaseksualnaści.
Pasolstva raić nie jechać u Iran tym, u kaho ŭ pašparcie jość izrailskaja viza.